ನವದೆಹಲಿ: ದೇಶದಲ್ಲಿ ಬರ ಪರಿಸ್ಥಿತಿ ಎದುರಾಗಿದ್ದು, ಈ ನಡುವೆ ಇಂಡಿಯನ್ ಪ್ರಿಮಿಯರ್ ಲೀಗ್(ಐಪಿಎಲ್) ಕುರಿತಾಗಿ ದಿನಕ್ಕೊಂದು ಸಾರ್ವಜನಿಕ ಹಿತಾಸಕ್ತಿ ಅರ್ಜಿಗಳು ದಾಖಲಾಗುತ್ತಿರುವುದರಿಂದ 10ನೇ ಆವೃತ್ತಿಯ ಟೂರ್ನಿಯನ್ನು ವಿದೇಶದಲ್ಲಿ ನಡೆಸುವ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ(ಬಿಸಿಸಿಐ) ಅಭಿಪ್ರಾಯಕ್ಕೆ ಫ್ರಾಂಚೈಸಿ ಮಾಲೀಕರು ಸಮ್ಮತಿ ಸೂಚಿಸಿದ್ದಾರೆ ಎಂದು ವರದಿಯಾಗಿದೆ.

ಸದ್ಯ ಐಪಿಎಲ್ ಮನರಂಜನೆ ಹಾಗೂ ಹಣದ ಹೊಳೆಯನ್ನೇ ಹರಿಸುತ್ತಿದ್ದು, ಎಲ್ಲರಿಗೂ ಐಪಿಎಲ್ ಟೂರ್ನಿಯಿಂದಲೇ ಸಮಸ್ಯೆ ಎಂದು ಕಾಣುತ್ತದೆ. ಹೀಗಾಗಿ 10ನೇ ಲೀಗ್ ವಿದೇಶದಲ್ಲಿ ನಡೆಯುವುದು ಸೂಕ್ತ. ಭಾರತದಲ್ಲಿ ಲೀಗ್ ನಡೆಸಿ ವಾಣಿಜ್ಯ ವ್ಯವಹಾರ ನಡೆಸುವುದು ಕಷ್ಟ ಎಂದು ಐಪಿಎಲ್‌ನ ಪ್ರಮುಖ ತಂಡದ ಮುಖ್ಯ ವ್ಯವಸ್ಥಾಪಕ ಅಧಿಕಾರಿ ತಿಳಿಸಿದ್ದಾರೆ.

ರಾಜ್ಯಗಳಲ್ಲಿ ಬರ ಇದ್ದರೆ ಅದರ ಪರಿಹಾರಕ್ಕೆ ಅಲ್ಲಿನ ಸರ್ಕಾರಗಳು ಕ್ರಮ ಕೈಗೊಳ್ಳಬೇಕು. ಅದರ ಬದಲು ಐಪಿಎಲ್ ನಡೆಸಬಾರದು ಎಂದರೆ ಪರಿಹಾರ ಸಿಗುವುದಿಲ್ಲ. ಐಪಿಎಲ್ ವಿದೇಶದಲ್ಲಿ ನಡೆದರೆ ಖಂಡಿತ ಬೇಸರವಾಗಲಿದೆ ಎಂದು ಫ್ರಾಂಚೈಸಿ ಮಾಲೀಕರು ಹೇಳಿರುವುದಾಗಿ ತಿಳಿಸಿದ್ದಾರೆ.