ಫೋರ್ಟ್ ಲಾರ್ಡರ್ ಡೇಲ್: ವೆಸ್ಟ್ ಇಂಡೀಸ್ ವಿರುದ್ಧದ ಟಿ20 ಪಂದ್ಯದಲ್ಲಿ 1 ರನ್ ನಿಂದ ವಿಶ್ವ ದಾಖಲೆ ರನ್ ಚೇಸ್ ಅನ್ನು ಟೀಂ ಇಂಡಿಯಾ ಕಳೆದುಕೊಂಡಿದೆ. 

ವಿಂಡೀಸ್ ನೀಡಿದ 246 ರನ್ ಗಳ ಬೃಹತ್ ಗುರಿ ಬೆನ್ನು ಹತ್ತಿದ ಭಾರತ ಆರಂಭಿಕ ಆಟಗಾರ ರೋಹಿತ್ ಶರ್ಮಾ (62 ರನ್, 28 ಎಸೆತ) ಹಾಗೂ ಕನ್ನಡಿಗ ಕೆಎಲ್ ರಾಹುಲ್ (110 ರನ್, 51 ಎಸೆತ) ಅವರ ಅಜೇಯ ಶತಕದ ಹೊರತಾಗಿಯೂ ತಂಡ 1 ರನ್ ಗಳ ರೋಚಕ ಸೋಲು ಕಾಣುವ ಮೂಲಕ ವಿಶ್ವ ದಾಖಲೆಯಿಂದ ವಂಚಿತವಾಯಿತು. 

ಅಂತಿಮ ಓವರ್ ನಲ್ಲಿ ಟೀಂ ಇಂಡಿಯಾ ಗೆಲ್ಲಲು 8 ರನ್ ಬೇಕಿತ್ತು. ಈ ವೇಳೆ ಕಣದಲ್ಲಿದ್ದಿದ್ದು ರಾಹುಲ್ ಹಾಗೂ ಸೂಪರ್ ಹಿಟ್ ಮೂಲಕ ಪಂದ್ಯ ಮುಗಿಸುವ ಚಾಕುಚಕ್ಯತೆ ಹೊಂದಿದ್ದ ಧೋನಿ. ಇವರಿಬ್ಬರ ಜೋಡಿ ಪಂದ್ಯವನ್ನು ಗೆಲ್ಲಿಸಿಕೊಡುತ್ತದೆ ಎಂದು ನಂಬಿದ್ದ ಕ್ರಿಕೆಟ್ ಅಭಿಮಾನಿಗಳಿಗೆ ಕೊನೆಯಲ್ಲಿ ತೀರಾ ನಿರಾಸೆ ಎದುರಾಯಿತು.

ಮೊದಲ ಐದು ಎಸೆತದಲ್ಲಿ ಬ್ರಾವೋ ಕೇವಲ 6 ರನ್ ನೀಡಿ ಅಂತಿಮ ಎಸೆತದವರೆಗೂ ಪಂದ್ಯ ಮುಂದುವರೆಯುವಂತೆ ಮಾಡಿದರು. ಅಂತಿಮ ಎಸೆತದವರೆಗೂ ಗೆಲುವು ಭಾರತದ್ದೇ ಎಂದು ಭಾವಿಸಲಾಗಿತ್ತಾದರೂ, ಅಂತಿಮ ಎಸೆತದಲ್ಲಿ 2 ರನ್ ಗಳ ಅವಶ್ಯಕತೆ ಇದ್ದಾಗ ಧೋನಿ ಸ್ಯಾಮುಯೆಲ್ಸ್ ಗೆ ವಿಕೆಟ್ ನೀಡುವ ಮೂಲಕ ಭಾರತ 1 ರನ್ ಅಂತರದ ವಿರೋಚಿತ ಸೋಲು ಅನುಭವಿಸಿತು.