ಮೊಹಾಲಿ: ಮೊಹಾಲಿಯಲ್ಲಿ ಭಾನುವಾರ ರಾತ್ರಿ ನಡೆದ ಆಸ್ಟ್ರೇಲಿಯಾ ವಿರುದ್ಧ ಪಂದ್ಯದಲ್ಲಿ ಅದ್ಭುತ ಇನ್ನಿಂಗ್ಸ್ ಕಟ್ಟುವ ಮೂಲಕ ಭಾರತದ ಸೆಮೀಸ್ ಹಾದಿಯನ್ನು ಸುಗಮಗೊಳಿಸಿದ ಭಾರತದ ಸ್ಫೋಟಕ ಬ್ಯಾಟ್ಸಮನ್ ವಿರಾಟ್ ಕೊಹ್ಲಿ, ಇದು ತಮ್ಮ ವೃತ್ತಿ ಜೀವನದ ಮರೆಯಲಾಗದ ಉತ್ತಮ ಇನ್ನಿಂಗ್ಸ್ ಎಂದು ಬಣ್ಣಿಸಿದ್ದಾರೆ.

ಪಂದ್ಯದ ಬಳಿಕ ಭಾವನಾತ್ಮಕವಾಗಿ ಮಾತನಾಡಿದ ವಿರಾಟ್ ಕೊಹ್ಲಿ, ಬಹುಶಃ ಈ ಇನ್ನಿಂಗ್ಸ್ ನನ್ನ ವೃತ್ತಿ ಜೀವನದ ಮೊದಲ ಮೂರು ಸ್ಥಾನದಲ್ಲಿಡಲು ನಾನು ಬಯಸುತ್ತೇನೆ. ಟೀಂ ಇಂಡಿಯಾದ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದ ಗೌರವ ನನಗೆ ದೊರೆತದ್ದರಿಂದ ಪ್ರಸ್ತುತ ನಾನು ಕೊಂಚ ಭಾವುಕನಾಗಿದ್ದೇನೆ. ಹೀಗಾಗಿ ಈ ಇನ್ನಿಂಗ್ಸ್ ನನ್ನ ಪಾಲಿಗೆ ವಿಶೇಷವಾಗಿದ್ದು, ಇದನ್ನು ನನ್ನ ಟಿ20 ವೃತ್ತಿ ಜೀವನ ಅತ್ಯಂತ ಮಹತ್ವದ ಇನ್ನಿಂಗ್ಸ್ ಎಂದು ಭಾವಿಸುತ್ತೇನೆ ಎಂದು ಹೇಳಿದ್ದಾರೆ.

ಆಸ್ಟ್ರೇಲಿಯಾದಂತಹ ಬಲಿಷ್ಠ ತಂಡದೆದುರು ಆಡುವಾಗ ನಿಜಕ್ಕೂ ನಾವು ಶೇ.100ರಷ್ಟುಸಾಮರ್ಥ್ಯ ಪ್ರದರ್ಶನ ಮಾಡಿದಾಗ ಮಾತ್ರ ಗೆಲುವು ಸಾಧ್ಯ. ನಿಜಕ್ಕೂ ಮೊಹಾಲಿ ಪಂದ್ಯ ನಮಗೆ ಕ್ವಾರ್ಟರ್ ಫೈನಲ್ ಪಂದ್ಯವಾಗಿತ್ತು. ಹೀಗಾಗಿ ನಾವು ಈ ಚಾಲೆಂಜ್ ಅನ್ನು ತೆಗೆದುಕೊಳ್ಳಲೇಬೇಕಿತ್ತು. ಪ್ರಸಕ್ತ ಟಿ20 ಸರಣಿಯಲ್ಲಿ ನಮ್ಮ ಮೇಲೆ ಸಾಕಷ್ಟು ಭರವಸೆಗಳಿವೆ. ಅಲ್ಲದೆ ನಾವು ತವರಿನಲ್ಲಿ ಆಡುತ್ತಿರುವ ಒತ್ತಡವೂ ಕೂಡ ಇದ್ದು, ಇದು ನಮ್ಮ ಜವಾಬ್ದಾರಿಯನ್ನು ಹೆಚ್ಚಿಸಿದೆ. ಭಾರತದ ಪಂದ್ಯ ವೀಕ್ಷಿಸಲು ಪ್ರತಿಯೊಂದು ಕ್ರೀಡಾಂಗಣದಲ್ಲೂ ಸಾವಿರಾರು ಮಂದಿ ಭಾರತೀಯರು ಸೇರುತ್ತಾರೆ. ಅವರನ್ನು ನಮ್ಮ ಉತ್ತಮ ಆಟದ ಮೂಲಕ ರಂಜಿಸುವುದು ನಮ್ಮ ಕರ್ತವ್ಯ ಎಂದು ಕೊಹ್ಲಿ ಹೇಳಿದ್ದಾರೆ.

ಪ್ರಸ್ತುತ ಭಾರತ ತಂಡದ ಮೇಲಿನ ನಿರೀಕ್ಷೆಗಳನ್ನು ನೋಡಿದರೆ ನನಗೇನು ಹೇಳುವುದೋ ತಿಳಿಯುತ್ತಿಲ್ಲ. ನಿಜಕ್ಕೂ ನಮ್ಮ ಪಾಲಿಗೆ ಇದೊಂದು ಗೌರವ. ತಂಡ ಗೆಲುವು ಸಾಧಿಸುತ್ತಿದ್ದಂತೆಯೇ ನಾನು ಮೈದಾನದಲ್ಲಿ ಕೊಂಚ ಭಾವುಕನಾಗಿದ್ದೆ. ಆದರೆ ಧೋನಿ ನನ್ನನ್ನು ಸಮಾಧಾನಪಡಿಸಿದ್ದರು. ಆ ಸಂದರ್ಭದಲ್ಲಿ ನಾನು ನಿಜಕ್ಕೂ ಭಾವೋದ್ವೇಗಕ್ಕೆ ಒಳಗಾಗಿದ್ದೆ ಎಂದು ಕೊಹ್ಲಿ ತಮ್ಮ ಮನದಾಳದ ಮಾತನ್ನಾಡಿದ್ದಾರೆ.