ಮೊಹಾಲಿ: ಇಂಗ್ಲೆಂಡ್ ವಿರುದ್ಧದ ಮೂರನೇ ಟೆಸ್ಟ್ ಪಂದ್ಯ ಮೊದಲ ಇನ್ನಿಂಗ್ಸ್ ನಲ್ಲಿ ಟೀಂ ಇಂಡಿಯಾ 417 ರನ್ ಗಳಿಗೆ ಆಲೌಟ್ ಆಗಿದ್ದು 134 ರನ್ ಗಳ ಮುನ್ನಡೆ ಪಡೆದಿದೆ. 

ಮೊಹಾಲಿಯ ಐಎಸ್ ಬಿಂದ್ರಾ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಮೊದಲ ಇನ್ನಿಂಗ್ಸ್ ಪ್ರಾರಂಭಿಸಿದ್ದ ಇಂಗ್ಲೆಂಡ್ 283 ರನ್ ಗಳಿಗೆ ಆಲೌಟ್ ಆಗಿತ್ತು. ನಂತರ ಇನ್ನಿಂಗ್ಸ್ ಪ್ರಾರಂಭಿಸಿದ್ದ ಟೀಂ ಇಂಡಿಯಾಗೆ ಆರ್ ಅಶ್ವಿನ್ ಹಾಗೂ ರವೀಂದ್ರ ಜಡೇಜಾರ ಅದ್ಭುತ ಬ್ಯಾಟಿಂಗ್ ನೆರವಿನಿಂದ 417 ರನ್ ಬೃಹತ್ ಮೊತ್ತ ಕಲೆ ಹಾಕಲು ಸಾಧ್ಯವಾಯಿತು. ಇದರೊಂದಿಗೆ ಭಾರತ 134 ರನ್ ಮುನ್ನಡೆ ಸಾಧಿಸಿದೆ. 

ಭಾರತ ಪರ ಮುರಳಿ ವಿಜಯ್ 12, ಪಾರ್ಥಿವ್ ಪಟೇಲ್ 42, ಚೇತೇಶ್ವರ ಪೂಜಾರ 51, ವಿರಾಟ್ ಕೊಹ್ಲಿ 62, ಅಜಿಂಕ್ಯಾ ರಹಾನೆ 0, ಕರುಣ್ ನಾಯರ್ 4, ಆರ್ ಅಶ್ವಿನ್ 72, ರವೀಂದ್ರ ಜಡೇಜಾ 90, ಜಯಂತ್ ಯಾದವ್ 55, ಉಮೇಶ್ ಯಾದವ್ 12, ಮೊಹಮ್ಮದ್ ಶಮಿ ಅಜೇಯ 1 ರನ್ ಗಳಿಸಿದ್ದಾರೆ. ಇಂಗ್ಲೆಂಡ್ ಪರ ಸ್ಟೋಕ್ಸ್ 5, ರಶೀದ್ 4 ವಿಕೆಟ್ ಪಡೆದಿದ್ದಾರೆ.