ನವದೆಹಲಿ: ಮುಂಬರುವ ಐರ್ ಲ್ಯಾಂಡ್ ಹಾಗೂ ಇಂಗ್ಲೆಂಡ್  ವಿರುದ್ಧದ  ಎರಡು ತಿಂಗಳ ಧೀರ್ಘ ಕಾಲಿನ ಎಲ್ಲಾ ಮಾದರಿಯ ಕ್ರಿಕೆಟ್  ಸರಣಿಗಾಗಿ  ವಿರಾಟ್ ಕೊಹ್ಲಿ ನಾಯಕತ್ವದ  ಟೀಂ ಇಂಡಿಯಾ ಇಂದು ಇಲ್ಲಿನ ಇಂದಿರಾಗಾಂಧಿ ವಿಮಾನ ನಿಲ್ದಾಣದಿಂದ ಪ್ರಯಾಣ ಬೆಳೆಸಿತು.

ಬೆಂಗಳೂರಿನಲ್ಲಿ ನಡೆದ ಎರಡು ದಿನಗಳ ಅಪ್ಘಾನಿಸ್ತಾನ ವಿರುದ್ಧದ ಚೊಚ್ಚಲ ಟೆಸ್ಟ್ ಕ್ರಿಕೆಟ್ ಪಂದ್ಯವನ್ನು 262 ರನ್ ಗಳ ಅಂತರದಿಂದ ಭಾರತ  ಇನ್ನಿಂಗ್ಸ್ ಜಯ ದಾಖಲಿಸಿದ್ದರೆ, ಆಸ್ಟ್ರೇಲಿಯಾ ವಿರುದ್ಧದ ಐದು ಪಂದ್ಯಗಳ ಏಕದಿನ ಸರಣಿಯಲ್ಲಿ ಇಂಗ್ಲೆಂಡ್  ಅಭೂತಪೂರ್ವ ಗೆಲುವು ದಾಖಲಿಸಿ ಹೊಸ ಹುಮ್ಮಸ್ಸಿನಲ್ಲಿದೆ.

 ಈ ಮಧ್ಯೆ  ಐರ್ ಲ್ಯಾಂಡ್  ಪಾಕಿಸ್ತಾನ ವಿರುದ್ಧದ ಟೆಸ್ಟ್ ಪಂದ್ಯದಲ್ಲಿ ಐದು ವಿಕೆಟ್ ಗಳ ಜಯ ದಾಖಲಿಸುವ ಮೂಲಕ ಆತ್ಮವಿಶ್ವಾಸ ಇಮ್ಮಡಿಗೊಳಿಸಿಕೊಂಡಿದೆ.ಐಪಿಎಲ್ ಪಂದ್ಯದ ವೇಳೆ  ಗಾಯಗೊಂಡಿದ್ದ  29 ವರ್ಷದ ನಾಯಕ ವಿರಾಟ್ ಕೊಹ್ಲಿ ,ಇಂಗ್ಲೆಂಡ್ ವಿರುದ್ಧದ ಸರಣಿಗಾಗಿ ಸಂಪೂರ್ಣವಾಗಿ ಸದೃಢವಾಗಿರುವುದಾಗಿ  ಹೇಳಿಕೆ ನೀಡಿದ್ದಾರೆ.

ಮುಂಬರುವ ಸರಣಿಗಾಗಿ ಶೇ. 100 ರಷ್ಟು ಸಿದ್ದನಿದ್ದೇನೆ. ಕುತ್ತಿಗೆ ಈಗ ಉತ್ತಮವಾಗಿದೆ. ಸಂಪೂರ್ಣ ತಯಾರಿ ನಡೆಸಿದ್ದು, ಫಿಟ್ನೆಸ್ ಪರೀಕ್ಷೆಯಲ್ಲೂ ದೇಹ ಉತ್ತಮವಾಗಿರುವ ಅನುಭವ ಮೂಡಿದೆ.  ಪಂದ್ಯ ಆಡಲು ಕಾತುರರಿಂದ ಕಾಯುತ್ತಿರುವುದಾಗಿ  ಕೊಹ್ಲಿ ಹೇಳಿದ್ದಾರೆ.

ಇಂಗ್ಲೆಂಡ್ ವಾತವಾರಣದಲ್ಲಿ ಆಟದ ಕಾರ್ಯತಂತ್ರ ಕುರಿತಂತೆ ಪ್ರತಿಕ್ರಿಯಿಸಿದ ಕೊಹ್ಲಿ, ವೃತ್ತಿಪರ ಆಟಗಾರರಾಗಿ ಮೈದಾನದಲ್ಲಿ  ತಂಡದ ರೀತಿಯಲ್ಲಿ ಪ್ರದರ್ಶನ ನೀಡಲಾಗುವುದು, ಗೆಲುವಿನ ಮನಸ್ಥಿತಿ ಮುಖ್ಯವಾಗಿದ್ದು, ಮೈದಾನದಲ್ಲಿ ತಂಡ ಉತ್ತಮ ಪ್ರದರ್ಶನ ನೀಡುವ ವಿಶ್ವಾಸವಿರುವುದಾಗಿ ಹೇಳಿದರು.