ಮೊದಲ ಟಿ20ಯಲ್ಲಿ ಆಸ್ಟ್ರೇಲಿಯಾ ತಂಡ ಟೀಂ ಇಂಡಿಯಾ ವಿರುದ್ಧ 3 ವಿಕೆಟ್​ಗಳ ರೋಚಕ ಗೆಲುವು ದಾಖಲಿಸಿದೆ. ಈ ಮೂಲಕ 2 ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.  ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡ ನಿಗದಿತ 20 ಓವರ್ ಗಳಲ್ಲಿ 126ರನ್ ಗಳಿಸಿ ಆಸಿಸ್ ಪಡೆಗೆ ಗೆಲ್ಲಲು 127 ರನ್ ಗಳ ಗುರಿ ನೀಡಿತು. 127 ರನ್​ಗಳ ಸುಲಭ ಗುರಿ ಬೆನ್ನಟ್ಟಿದ್ದ ಆಸ್ಟ್ರೇಲಿಯಾ ಒಂದು ಹಂತದಲ್ಲಿ ಭರ್ಜರಿ ಗೆಲುವಿನ ಹಾದಿಯಲ್ಲಿತ್ತು. ಆದರೆ ಟೀಮ್ ಇಂಡಿಯಾ ಬೌಲರ್​ಗಳ ಶಿಸ್ತುಬದ್ಧ ದಾಳಿ, ಹಾಗೂ ಪರಿಣಾಮಕಾರಿ​ ಫೀಲ್ಡಿಂಗ್​ನಿಂದಾಗಿ ಪಂದ್ಯದ ಕೊನೆಯ ಓವರ್​ ಕೊನೆಯ ಎಸೆತದವರೆಗೂ ಪಂದ್ಯ ಸಾಗಿತು.

ಪ್ರಮುಖವಾಗದಿ 19ನೇ ಓವರ್​​ನಲ್ಲಿ ಯಾರ್ಕರ್ ಸ್ಪೆಷಲಿಸ್ಟ್​​ ಜಸ್ ಪ್ರೀತ್ ಬುಮ್ರಾ, ಅದ್ಭುತ ಬೌಲಿಂಗ್ ಮೂಲಕ​  ಪಂದ್ಯ ಭಾರತದ ಪರ ವಾಲುವಂತೆ ಮಾಡಿದರು. ಆದರೆ ಕೊನೆಯ ಓವರ್ ನಲ್ಲಿ ಉಮೇಶ್​ ಯಾದವ್​ ಅದೇ ಯಶಸ್ಸು ಮುಂದುವರೆಸುವಲ್ಲಿ ವಿಫಲರಾದರು. ಜೇಯ್ ರಿಚರ್ಡ್​​ಸನ್ ಹಾಗು ಪ್ಯಾಟ್​ ಕಮ್ಮಿನ್ಸ್ ತಂಡಕ್ಕೆ ರೋಚಕ ಗೆಲುವು ತಂದುಕೊಟ್ಟರು. ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ ಮನ್ ಗ್ಲೇನ್ ಮ್ಯಾಕ್ಸ್ ​ವೆಲ್, ಅರ್ಧಶತಕ ಬಾರಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಭಾರತದ ಪರ ಬುಮ್ರಾ 3 ವಿಕೆಟ್​ ಪಡೆದರೆ, ಯಜುವೇಂದರ ಚಹಾಲ್ ಹಾಗು ಕೃಣಾಲ್ ಪಾಂಡ್ಯ ತಲಾ 1 ವಿಕೆಟ್ ಪಡೆದರು.