ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್(ಐಪಿಎಲ್) 12ನೇ ಆವೃತ್ತಿ ಆರಂಭಕ್ಕೆ ದಿನಗಣನೆ ಆರಂಭವಾಗಿದ್ದು ಈಗಾಗಲೇ ಎಲ್ಲಾ ಫ್ರಾಂಚೈಸಿಗಳು ತಮಗೆ ಬೇಕಾದ ಆಟಗಾರರನ್ನು ಹರಾಜಿನಲ್ಲಿ ಖರೀದಿಸಿ ಈಗಾಗಲೇ ಪ್ರಶಸ್ತಿಯ ಕನವರಿಕೆಯಲ್ಲಿದೆ. 

11 ಆವೃತ್ತಿಗಳಿಂದಲೂ ಕಪ್ ಗೆಲ್ಲಲು ವಿಫಲವಾಗಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು(ಆರ್‌ಸಿಬಿ) ತಂಡ ಟೂರ್ನಿ ಆರಂಭಕ್ಕೂ ಮುನ್ನವೇ ಟ್ವೀಟ್ ವೊಂದನ್ನು ಮಾಡಿ ಭಾರೀ ಮುಖಭಂಗಕ್ಕೆ ಒಳಗಾಗಿದೆ. 

ಇತ್ತೀಚೆಗಷ್ಟೇ ಆರ್‌ಸಿಬಿ ತಂಡ ತನ್ನ ಟ್ವೀಟರ್ ನಲ್ಲಿ ಒಂದು ಒಡೆದ ಮೊಟ್ಟೆಯ ಫೋಟೋವನ್ನು ಹಾಕಿದೆ. ಈ ಫೋಟೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಈ ಫೋಟೋ ಕುರಿತಂತೆ ಆರ್ಸಿಬಿ ಅಭಿಮಾನಿಗಳು ಖುಷಿಯಾಗಿದ್ದರೆ ಇತರ ಫ್ರಾಂಚೈಸಿ ತಂಡಗಳು ಮಾತ್ರ ಉರಿದು ಬೀಳುತ್ತಿವೆ.

ಅಸಲಿಗೆ ಒಡೆಯದೆ ಇರುವ ಒಂದು ಮೊಟ್ಟೆಯ ಫೋಟೋ ಇನ್ ಸ್ಟಾಗ್ರಾಮ್ ನಲ್ಲಿ ಅತೀ ಹೆಚ್ಚು ವೀಕ್ಷಣೆ ಮತ್ತು ಲೈಕ್ಸ್ ಪಡೆದಿದೆ. ಆದರೆ ಇದೇ ಫೋಟೋವನ್ನು ತೆಗೆದುಕೊಂಡು ಆರ್ಸಿಬಿ ತಂಡ ಮೊಟ್ಟೆಯನ್ನು ಒಡೆದು ತನ್ನ ಟ್ವೀಟರ್ ಖಾತೆಯಲ್ಲಿ ಫೋಸ್ಟ್ ಮಾಡಿದ್ದು ಅದರ ಕೆಳಗೆ ಅದಾಗಲೇ ದಾಖಲೆ ಬರೆದಿರುವವರ ದಾಖಲೆಗಳನ್ನು ಧೂಳಿಪಟ ಮಾಡುತ್ತೇವೆ ಎಂಬಂತೆ ಬರೆದುಕೊಂಡಿದೆ. ಇದೇ ಕಾರಣಕ್ಕೆ ಇತರ ಫ್ರಾಂಚೈಸಿ ತಂಡಗಳು ಆರ್ಸಿಬಿ ವಿರುದ್ಧ ಕೆಂಡಕಾರುತ್ತಿವೆ.