ನವದೆಹಲಿ: ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ಇಂದು ಸಂಜೆ ನಡೆಯಲಿರುವ ಬಾಂಗ್ಲಾದೇಶ ವಿರುದ್ಧದ ಮೊದಲ ಟಿ-20 ಅಂತಾರಾಷ್ಟ್ರೀಯ ಪಂದ್ಯದ ಮೂಲಕ ಶಿವಂ ದುಬೆ ಚೊಚ್ಚಲ ಪಂದ್ಯವನ್ನಾಡಲಿದ್ದಾರೆ.

ದೇಶಿಯ ಕ್ರಿಕೆಟ್ ನಲ್ಲಿ ಉತ್ತಮ ಆಟ ಪ್ರದರ್ಶಿಸಿರುವ ದುಬೆ, ಮೊದಲ ಬಾರಿಗೆ ಅಂತಾರಾಷ್ಟ್ರೀಯ ಟಿ-20 ಪಂದ್ಯವನ್ನಾಡುತ್ತಿರುವಂತೆ ಬಿಸಿಸಿಐ ಶೇರ್ ಮಾಡಿರುವ ಅವರ ಪ್ರಾಕ್ಟೀಸ್ ಅವಧಿಯ ವಿಡಿಯೋಗೆ ಕ್ರಿಕೆಟ್ ಅಭಿಮಾನಿಗಳು ಮನಸೋತಿದ್ದಾರೆ.

ಪ್ರಾಕ್ಟೀಸ್ ವೇಳೆಯಲ್ಲಿ ಕೆಲವು ಶಾಟ್ ಗಳನ್ನು ಎತ್ತಿದ್ದು, ಅವರ ಬ್ಯಾಕ್ ಲಿಪ್ಟ್  ಮಾಜಿ ಟೀ ಇಂಡಿಯಾ ಆಲ್ ರೌಂಡರ್ ಯುವರಾಜ್ ಸಿಂಗ್ ಅವರ ಆಟಕ್ಕೆ ಹೋಲಿಕೆಯಾಗುತ್ತಿದೆ. ಶಿವಂ ದುಬೆ ಮುಂದಿನ ಯುವರಾಜ್ ಸಿಂಗ್ ಎಂದು ಅಭಿಮಾನಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಯುವರಾಜ್ ಸಿಂಗ್ ಕೂಡಾ ಕೆಲವು ವೇಳೆಯಲ್ಲಿ ಬೌಲಿಂಗ್ ಮಾಡುತ್ತಿದ್ದರು. ಅದರಂತೆ ಆಲ್ ರೌಂಡರ್ ದುಬೆ ಸ್ಪೀನ್ ಬೌಲ್ ಕೂಡಾ ಮಾಡಬಲ್ಲವರಾಗಿದ್ದು, ಅವರ ನೆಟ್ ಅಭ್ಯಾಸಕ್ಕೆ ಕ್ರಿಕೆಟ್ ಅಭಿಮಾನಿಗಳು ಮನಸೋತಿದ್ದಾರೆ.

ಮುಂಬೈನ ಆಲ್ ರೌಂಡರ್ ಶಿವಂ ದುಬೆ 2018ರಲ್ಲಿ ನಡೆದ ರಣಜಿ ಟ್ರೋಫಿಯಲ್ಲಿ ಐದು ಎಸೆತಗಳಲ್ಲಿ ಐದು ಸಿಕ್ಸರ್ ಸಿಡಿಸುವ ಮೂಲಕ ಐಪಿಎಲ್ ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಫ್ರಾಂಚೈಸಿಗೆ 5 ಕೋಟಿ ಗೆ  ಖರೀದಿಯಾಗಿದ್ದರು.  ಆದರೆ 2019ರ ಐಪಿಎಲ್ ನಲ್ಲಿ ಉತ್ತಮ ಪ್ರದರ್ಶನ ತೋರುವಲ್ಲಿ ವಿಫಲರಾಗಿದ್ದರು