ಕೋಲ್ಕತಾ: ಬೌಲಿಂಗ್ ಹಾಗೂ ಬ್ಯಾಟಿಂಗ್ ಎರಡೂ ವಿಭಾಗಗಳಲ್ಲಿ ಸಂಘಟಿತ ಪ್ರದರ್ಶನ ತೋರಿದ ಭಾರತ ತಂಡ, ಐತಿಹಾಸಿಕ ಹೊನಲು ಬೆಳಕಿನ ಟೆಸ್ಟ್‌ ಪಂದ್ಯದ ಮೊದಲನೇ ದಿನ ಬಾಂಗ್ಲಾದೇಶ ವಿರುದ್ಧ ಮೇಲುಗೈ ಸಾಧಿಸಿದೆ. 

ಇಲ್ಲಿನ ಈಡನ್ ಗಾರ್ಡನ್ಸ್‌ ಕ್ರೀಡಾಂಗಣದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಪ್ರವಾಸಿ ಬಾಂಗ್ಲಾದೇಶ, ಇಶಾಂತ್ ಶರ್ಮಾ (22 ಕ್ಕೆ 5) ಅವರ ಮಾರಕ ದಾಳಿಗೆ ನಲುಗಿ 30.3 ಓವರ್ ಗಳಿಗೆ 106 ರನ್ ಗಳಿಗೆ ಆಲೌಟ್ ಆಯಿತು. 

ನಂತರ, ಪ್ರಥಮ ಇನಿಂಗ್ಸ್‌ ಆರಂಭಿಸಿದ ಭಾರತ ತಂಡ, ಚೇತೇಶ್ವರ ಪೂಜಾರ (55 ರನ್) ಹಾಗೂ ನಾಯಕ ವಿರಾಟ್ ಕೊಹ್ಲಿ(ಔಟಾಗದೆ 59 ರನ್) ಅವರ ಅರ್ಧ ಶತಕಗಳ ಬಲದಿಂದ 46 ಓವರ್ ಗಳಿಗೆ ಮೂರು ವಿಕೆಟ್ ನಷ್ಟಕ್ಕೆ 174 ರನ್ ದಾಖಲಿಸಿದೆ. ಇದರೊಂದಿಗೆ 68 ರನ್ ಮುನ್ನಡೆ ಗಳಿಸಿದೆ. 

ರೋಚಕತೆ ಗಳಿಸಿದ್ದ ಪಿಂಕ್ ಚೆಂಡಿನ ಆಟದಲ್ಲಿ ಮೊದಲು ಬ್ಯಾಾಟಿಂಗ್ ಮಾಡಿದ್ದ ಬಾಂಗ್ಲಾದೇಶದ ಮೇಲೆ ಭಾರತದ ತ್ರಿವೇಗಿಗಳಾದ ಇಶಾಂತ್ ಶರ್ಮಾ, ಉಮೇಶ್ ಯಾದವ್ ಹಾಗೂ ಮೊಹಮ್ಮದ್ ಶಮಿ ಸವಾರಿ ಮಾಡಿದರು. 

ನಾಯಕ ಮೊಮಿನುಲ್ ಹಕ್ ಟಾಸ ಗೆದ್ದು ಮೊದಲು ಬ್ಯಾಟಿಂಗ್ ಮಾಡುವ ನಿರ್ಧಾರವನ್ನು ಭಾರತದ ವೇಗಿಗಳು ತಲೆ ಕೆಳಗಾಗುವಂತೆ ಮಾಡಿದರು. ಇಂದೋರ್ ಟೆಸ್ಟ್‌ ನಲ್ಲಿ ಇದೇ ತಪ್ಪು ಮಾಡಿದ್ದ ಮೊಮಿನುಲ್ ಹಕ್ ಎರಡನೇ ಪಂದ್ಯದಲ್ಲೂ ಅದೇ ತಪ್ಪು ಮಾಡಿದರು.