ರಾಂಚಿ: ದಕ್ಷಿಣ ಆಫ್ರಿಕಾ ಆರಂಭಿಕ ಬ್ಯಾಟ್ಸ್ ಮನ್ ಆಗಿ ಯಶಸ್ವಿಯಾಗಿರುವ ರೋಹಿತ್ ಶರ್ಮಾ ಅವರ ಮಾನಸಿಕ ಹೊಂದಾಣಿಕೆಯನ್ನು ಭಾರತ ತಂಡದ ಬ್ಯಾಟಿಂಗ್ ಕೋಚ್ ವಿಕ್ರಮ್ ರಾಥೋಡ್ ಅವರು ಶ್ಲಾಘಿಸಿದ್ದಾರೆ.
ಬ್ಯಾಟಿಂಗ್ ಲಯ ಮುಂದುವರಿಸಿರುವ ರೋಹಿತ್ ಶರ್ಮಾ ದಕ್ಷಿಣ ಆಫ್ರಿಕಾ ವಿರುದ್ಧ ಮೂರನೇ ಟೆಸ್ಟ್ ಪಂದ್ಯದ ಪ್ರಥಮ ಇನಿಂಗ್ಸ್ ಮೊದಲನೇ ದಿನ ವೃತ್ತಿ ಜೀವನದ ಆರನೇ ಹಾಗೂ ಪ್ರಸಕ್ತ ಸರಣಿಯ ಮೂರನೇ ಶತಕ ಸಿಡಿಸಿ ದಾಖಲೆ ಬರೆದರು. ಇದರೊಂದಿಗೆ ಭಾರತ ಮೊದಲನೇ ದಿನ ಮೂರು ವಿಕೆಟ್ ನಷ್ಟಕ್ಕೆ 224 ರನ್ ಗಳಿಸಿದೆ.
ಮೊದಲನೇ ದಿನದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ವಿಕ್ರಮ್ ರಾಥೋಡ್, "ರೋಹಿತ್ ಶರ್ಮಾ ಅನುಭವಿ ಬ್ಯಾಟ್ಸ್ ಮನ್. ಅವರ ಬ್ಯಾಟಿಂಗ್ ತಂತ್ರಗಳಲ್ಲಿ ಬದಲಾವಣೆ ಮಾಡಿಕೊಳ್ಳುವ ಅಗತ್ಯತೆ ಇಲ್ಲ ಎಂದೆನಿಸುತ್ತಿದೆ. ಪಂದ್ಯದ ಯೋಜನೆಗೆ ತಕ್ಕಂತೆ ಮಾನಸಿಕ ಹೊಂದಾಣಿಕೆ ಮಾಡಿಕೊಳ್ಳಬೇಕಷ್ಟೆ. ಅದನ್ನು ಅವರು ಅಳವಡಿಸಿಕೊಂಡಿದ್ದಾರೆ ಎಂದು ಹೇಳಿದರು.