ಧರ್ಮಶಾಲಾ:ಟ್ವೀಟರ್ ನಲ್ಲಿ ಇತ್ತೀಚಿಗೆ ಮಹೇಂದ್ರ ಸಿಂಗ್ ಧೋನಿ ಅವರ ಭಾವಚಿತ್ರ ಹಾಕಿ ಕೆಲ ಸಾಲು ಬರೆದಿದ್ದ ಬಗ್ಗೆ ಟೀಂ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಸ್ಪಷ್ಟನೆ ನೀಡಿದ್ದು, ಇನ್ನು ಮುಂದೆ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡುವುದಕ್ಕೂ ಮುನ್ನ ಯೋಚನೆ ಮಾಡುವೆ ಎಂದಿದ್ದಾರೆ.

 ವಿರಾಟ್ ಕೊಹ್ಲಿ ಗುರುವಾರ ತಮ್ಮ ಖಾತೆಯಲ್ಲಿ ಧೋನಿ ಹಾಗೂ ತಾವು ಬ್ಯಾಟಿಂಗ್ ಮಾಡುತ್ತಿದ್ದ ಪೋಟೋ ಹಾಕಿದ್ದರು. ಅಲ್ಲದೇ, ನಾನು ಆ ಪಂದ್ಯ ಮರೆಯಲು ಸಾಧ್ಯವಿಲ್ಲ. ಮಾಹಿ ನನಗೆ ಫಿಟ್ನೆಸ್ ಟೆಸ್ಟ್ ಗೆ ಒಳಪಡಿಸಿದ ರೀತಿ ಓಡಿಸಿದ್ದರು ಎಂದು ಬರೆದುಕೊಂಡಿದ್ದರು.

ಈ ಪೋಸ್ಟ್ ಬಳಿಕ ಸಾಮಾಜಿಕ ಜಾಲತಾಣದಲ್ಲಿ ಧೋನಿ ನಿವೃತ್ತಿಗೊಳ್ಳುವ ಬಗ್ಗೆ ಚರ್ಚೆಗಳು ವ್ಯಾಪಕವಾಗಿ ನಡೆದಿದ್ದವು. ಅಲ್ಲದೆ ಸಂಜೆ ಏಳು ಗಂಟೆಗೆ ಧೋನಿ ಅವರು ಮುಂಬೈಯಲ್ಲಿ ಸುದ್ದಿಗೋಷ್ಠಿ ನಡೆಸುವ ಬಗ್ಗೆ ಊಹಾಪೋಹಗಳು ಎದಿದ್ದವು.

ಇಡೀ ವಿಶ್ವ ನನ್ನ ರೀತಿಯಲ್ಲಿಯೇ ಯೋಚಿಸುವುದಿಲ್ಲ ಎಂಬ ಪಾಠವನ್ನು ಕಲಿತಿದ್ದೇನೆ. ಧೋನಿ ನಿವೃತ್ತಿ ಕಲ್ಪನೆ ಮಾಡಿಕೊಂಡು ಆ ಚಿತ್ರವನ್ನು ಸಾಮಾಜಿಕ ಜಾಲತಾಣಗಳಲ್ಲಿ  ಹಾಕಿರಲಿಲ್ಲ. ಆದರೆ, ಆ ಪೋಸ್ಟನ್ನು ಬೇರೆಯದೇ ರೀತಿಯಲ್ಲಿ ಅರ್ಥೈಸಲಾಗಿದೆ ಎಂದು ಕೊಹ್ಲಿ ಹೇಳಿದ್ದಾರೆ.

A game I can never forget. Special night. This man, made me run like in a fitness test @msdhoni