ಮುಂಬೈ: ಇಂಡಿಯನ್ ಪ್ರೀಮಿಯರ್ ಲೀಗ್ 2024 ಕ್ರಿಕೆಟ್ ಟೂರ್ನಿ ಮೊದಲ 10 ಪಂದ್ಯದಲ್ಲೇ ವೀಕ್ಷಣೆಯಲ್ಲಿ ದಾಖಲೆ ನಿರ್ಮಿಸಿದ್ದು, ಬರೊಬ್ಬರಿ 35 ಕೋಟಿ ಟಿವಿ ವೀಕ್ಷಣೆ ಕಂಡಿದೆ.
ಹಾಲಿ ನಡೆಯುತ್ತಿರುವ 17ನೇ ಆವೃತ್ತಿಯ ಟೂರ್ನಿಯ ಮೊದಲ ಹತ್ತು ಪಂದ್ಯಗಳ ವೀಕ್ಷಣೆಯ ಅವಧಿಯು ದಾಖಲೆ ಪುಟ ಸೇರಿದ್ದು, ಒಟ್ಟು 8028 ಕೋಟಿ ನಿಮಿಷಗಳ ದಾಖಲೆಯ ವೀಕ್ಷಣೆಯಾಗಿದೆ. ಕಳೆದ ಬಾರಿಯ ಟೂರ್ನಿಗಿಂತಲೂ ಶೇ.20ರಷ್ಟು ಹೆಚ್ಚಳವಾಗಿದೆ ಎಂದು ಟಿ.ವಿ. ನೇರಪ್ರಸಾರದ ಅಧಿಕೃತ ಸಂಸ್ಥೆಯಾದ ಡಿಸ್ನಿ ಸ್ಟಾರ್ ಸ್ಪೋರ್ಟ್ಸ್ ತಿಳಿಸಿದೆ.
ಈ ಕುರಿತು ಟ್ವೀಟ್ ಮಾಡಿರುವ ಸಂಸ್ಥೆಯ ಮುಖ್ಯಸ್ಥ ಸಂಜೋಗ್ ಗುಪ್ತಾ, 'ಅಭಿಮಾನಿಗಳ ಅಪಾರ ಆಸಕ್ತಿಯನ್ನು ನೋಡಿ ನಾವು ಮೂಕವಿಸ್ಮಿತರಾಗಿದ್ದೇವೆ. ಹೋದ ಬಾರಿಯ ಆವೃತ್ತಿಗಿಂತಲೂ ಈ ಸಲ ವೀಕ್ಷಣೆಯ ಅವಧಿ ಮತ್ತು ವೀಕ್ಷಕರ ಸಂಖ್ಯೆಯಲ್ಲಿ ಗಣನೀಯ ಏರಿಕೆಯಾಗಿದೆ’ ಎಂದು ಹೇಳಿದ್ದಾರೆ.