ಅಂಡರ್-19 ಏಷ್ಯಾ ಕಪ್ ಪಂದ್ಯದಲ್ಲಿ ಅಭಿಗ್ಯಾನ್ ಕುಂಡು ಅವರ ದಾಖಲೆ ಮುರಿದ ಅಜೇಯ 209 ರನ್ ಮತ್ತು ದೀಪೇಶ್ ದೇವೇಂದ್ರನ್ ಐದು ವಿಕೆಟ್ ಗೊಂಚಲು, ಭಾರತ ಮಲೇಷ್ಯಾವನ್ನು 315 ರನ್ಗಳಿಂದ ಸೋಲಿಸಲು ಸಹಾಯ ಮಾಡಿತು. ಇದು ಅಂಡರ್-19 ಏಷ್ಯಾ ಕಪ್ನಲ್ಲಿ ಭಾರತದ ಇದುವರೆಗಿನ ಅತಿದೊಡ್ಡ ಗೆಲುವು. ಆದಾಗ್ಯೂ, ಈ 315 ರನ್ಗಳ ಗೆಲುವಿನ ಹೊರತಾಗಿಯೂ, ಭಾರತವು ಬಾಂಗ್ಲಾದೇಶದ ವಿಶ್ವ ದಾಖಲೆಯನ್ನು ಮುರಿಯಲು ವಿಫಲವಾಯಿತು. 2012ರಲ್ಲಿ ಕತಾರ್ ವಿರುದ್ಧ ಬಾಂಗ್ಲಾದೇಶವು ಅಂಡರ್-19 ಏಷ್ಯಾ ಕಪ್ ಏಕದಿನ ಕ್ರಿಕೆಟ್ನಲ್ಲಿ 328 ರನ್ಗಳಿಂದ ಸಾಧಿಸಿದ ಅತಿದೊಡ್ಡ ಗೆಲುವಿನ ದಾಖಲೆಯನ್ನು ಹೊಂದಿದೆ. ಇದು ಅಂಡರ್ 19 ಏಕದಿನ ಪಂದ್ಯಗಳಲ್ಲಿ ಭಾರತದ ಎರಡನೇ ಅತಿದೊಡ್ಡ ಗೆಲುವು. ಇದಕ್ಕೂ ಮೊದಲು, 2022 ರಲ್ಲಿ ಭಾರತ ಉಗಾಂಡಾವನ್ನು 322 ರನ್ಗಳಿಂದ ಸೋಲಿಸಿತು.
ಕುಂಡು ಕಿರಿಯರ ಏಕದಿನ ಪಂದ್ಯದಲ್ಲಿ ದ್ವಿಶತಕ ಗಳಿಸಿದ ಮೊದಲ ಭಾರತೀಯ ಕ್ರಿಕೆಟಿಗರಾದರು. ಅವರು ತಮ್ಮ ಇನ್ನಿಂಗ್ಸ್ನಲ್ಲಿ 125 ಎಸೆತಗಳನ್ನು ಎದುರಿಸಿದರು. 17 ಬೌಂಡರಿಗಳು ಮತ್ತು 9 ಸಿಕ್ಸರ್ಗಳನ್ನು ಬಾರಿಸಿದರು. ಭಾರತವು 7 ವಿಕೆಟ್ಗಳಿಗೆ 408 ರನ್ ಗಳಿಸಲು ನೆರವಾಯಿತು. ಇದಕ್ಕೆ ಉತ್ತರವಾಗಿ, ಬಲಗೈ ಮಧ್ಯಮ ವೇಗದ ಬೌಲರ್ ದೇವೇಂದ್ರನ್ 22 ರನ್ಗಳಿಗೆ ಐದು ವಿಕೆಟ್ಗಳನ್ನು ಕಬಳಿಸುವ ಮೂಲಕ ಮಲೇಷ್ಯಾ ಬ್ಯಾಟಿಂಗ್ನ ಬೆನ್ನೆಲುಬನ್ನು ಮುರಿದರು. ಮಲೇಷ್ಯಾ 32.1 ಓವರ್ಗಳಲ್ಲಿ 93 ರನ್ಗಳಿಗೆ ಆಲೌಟ್ ಆಯಿತು.
ಭಾರತದ ಪರವಾಗಿ, ವೈಭವ್ ಸೂರ್ಯವಂಶಿ 26 ಎಸೆತಗಳಲ್ಲಿ 50 ರನ್ ಗಳಿಸಿದರು. ಅದೇ ಪಂದ್ಯಾವಳಿಯಲ್ಲಿ ಅವರು ಯುಎಇ ವಿರುದ್ಧ 171 ರನ್ ಗಳಿಸಿದ್ದರು. ನಾಲ್ಕನೇ ಸ್ಥಾನದಲ್ಲಿ ಬಂದ ವೇದಾಂತ್ ತ್ರಿವೇದಿ ಮತ್ತು ಕುಂಡು ನಾಲ್ಕನೇ ವಿಕೆಟ್ಗೆ 209 ರನ್ಗಳ ಪಾಲುದಾರಿಕೆಯನ್ನು ಹಂಚಿಕೊಂಡರು. ಕುಂಡು ತಮ್ಮ ಇನ್ನಿಂಗ್ಸ್ನಲ್ಲಿ 55 ಸಿಂಗಲ್ಸ್ಗಳನ್ನು ಗಳಿಸಿದರು.
17 ವರ್ಷದ ಕುಂಡು ಕಿರಿಯರ ಏಕದಿನ ಪಂದ್ಯದಲ್ಲಿ ದ್ವಿಶತಕ ಗಳಿಸಿದ ದಕ್ಷಿಣ ಆಫ್ರಿಕಾದ ಝೋರಿಚ್ ವ್ಯಾನ್ ಶೌಕ್ವಿಕ್ ನಂತರ ಎರಡನೇ ಬ್ಯಾಟ್ಸ್ಮನ್ ಆದರು. ಈ ವರ್ಷದ ಆರಂಭದಲ್ಲಿ ಹರಾರೆಯಲ್ಲಿ ಜಿಂಬಾಬ್ವೆ ವಿರುದ್ಧ ಝೋರಿಚ್ 153 ಎಸೆತಗಳಲ್ಲಿ 215 ರನ್ ಗಳಿಸಿದ್ದರು. ತ್ರಿವೇದಿ 106 ಎಸೆತಗಳಲ್ಲಿ 7 ಬೌಂಡರಿಗಳೊಂದಿಗೆ 90 ರನ್ ಗಳಿಸಿದರು. ಕುಂದು ಐದನೇ ವಿಕೆಟ್ಗೆ ಕನಿಷ್ಕ್ ಚೌಹಾಣ್ ಅವರೊಂದಿಗೆ 87 ರನ್ಗಳ ಜೊತೆಯಾಟ ನಡೆಸಿದರು.