ವಿರಾಟ್ ಕೊಹ್ಲಿ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಪರ 19ನೇ ಆವೃತ್ತಿಯಲ್ಲಿ ಆಡುತ್ತಿದ್ದಾರೆ. ವಿಶೇಷ ಎಂದರೆ ಐಪಿಎಲ್‌ನ ಎಲ್ಲ 19 ಸೀಸನ್‌ಗಳಲ್ಲಿ ಒಂದೇ ತಂಡಕ್ಕಾಗಿ ಆಡಿದ ಮೊದಲ ಆಟಗಾರ ಕಿಂಗ್ ಕೊಹ್ಲಿ ಆಗಿದ್ದಾರೆ. ಒಂದೇ ಐಪಿಎಲ್ ಸೀಸನ್‌ನಲ್ಲಿ ನಾಲ್ಕು ಶತಕಗಳನ್ನು ಗಳಿಸುವುದರಿಂದ ಹಿಡಿದು 2016ರಲ್ಲಿ 973 ರನ್ ಗಳಿಸುವವರೆಗೆ, ವಿರಾಟ್ ಕೊಹ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿ ಹಲವಾರು ದಾಖಲೆಗಳನ್ನು ನಿರ್ಮಿಸಿದ್ದಾರೆ. ಆರ್‌ಸಿಬಿ ಹಂಚಿಕೊಂಡಿರುವ ವಿಡಿಯೋದಲ್ಲಿ, ಕೊಹ್ಲಿಗೆ ಅವರ ಐಪಿಎಲ್ ವೃತ್ತಿಜೀವನದ ಬಗ್ಗೆ ಐದು ಪ್ರಶ್ನೆಗಳನ್ನು ಕೇಳಲಾಯಿತು. ಈ ಪೈಕಿ ಅವರು ಒಂದು ಪ್ರಶ್ನೆಗೆ ತಪ್ಪು ಉತ್ತರ ನೀಡಿದ್ದಾರೆ.

'2011ರ ಆವೃತ್ತಿಯಲ್ಲಿ ನೀವು ಎಷ್ಟು ರನ್ ಗಳಿಸಿದ್ದೀರಿ?' ಎಂಬ ಪ್ರಶ್ನೆಗೆ ಕೊಹ್ಲಿ 505 ಎಂದು ಉತ್ತರಿಸಿದ್ದರು. ಆದರೆ, ಆ ಆವೃತ್ತಿಯಲ್ಲಿ ಅವರು 557 ರನ್ ಗಳಿಸಿದರು.

ಇಂಡಿಯನ್ ಪ್ರೀಮಿಯರ್ ಲೀಗ್ ಇತಿಹಾಸದಲ್ಲಿ ಚೇಸಿಂಗ್‌ನಲ್ಲಿ 4,000 ರನ್‌ಗಳನ್ನು ದಾಟಿದ ಮೊದಲ ಬ್ಯಾಟ್ಸ್‌ಮನ್ ಎಂಬ ಹೆಗ್ಗಳಿಕೆಗೆ ಕೊಹ್ಲಿ ಪಾತ್ರರಾಗಿದ್ದಾರೆ. ಮಾರ್ಚ್ 28ರಂದು ಬೆಂಗಳೂರಿನ ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಮತ್ತು ಸನ್‌ರೈಸರ್ಸ್ ಹೈದರಾಬಾದ್ (ಎಸ್‌ಆರ್‌ಹೆಚ್) ನಡುವಿನ ಐಪಿಎಲ್ 2026ರ ಉದ್ಘಾಟನಾ ಪಂದ್ಯದಲ್ಲಿ ಬಲಗೈ ಬ್ಯಾಟ್ಸ್‌ಮನ್ ಈ ಐತಿಹಾಸಿಕ ಸಾಧನೆ ಮಾಡಿದರು.

ಇದರ ಜೊತೆಗೆ, ಕೊಹ್ಲಿ ಪಾಕಿಸ್ತಾನದ ಮಾಜಿ ಬ್ಯಾಟ್ಸ್‌ಮನ್ ಶೋಯೆಬ್ ಮಲಿಕ್ ಅವರನ್ನು ಹಿಂದಿಕ್ಕಿ ಟಿ20 ಕ್ರಿಕೆಟ್‌ನಲ್ಲಿ ಆರನೇ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಮಲಿಕ್ 557 ಪಂದ್ಯಗಳು ಮತ್ತು 515 ಇನಿಂಗ್ಸ್‌ಗಳಲ್ಲಿ 13,571 ರನ್ ಗಳಿಸಿದ್ದಾರೆ. ಮಾಜಿ ಕ್ರಿಕೆಟಿಗ 35.99 ಸರಾಸರಿಯಲ್ಲಿ 83 ಅರ್ಧಶತಕಗಳನ್ನು ದಾಖಲಿಸಿದ್ದಾರೆ.

ಸ್ಟಾರ್ ಸ್ಪೋರ್ಟ್ಸ್‌ನಲ್ಲಿ ಮಾತನಾಡಿದ ದಕ್ಷಿಣ ಆಫ್ರಿಕಾದ ಮಾಜಿ ವೇಗಿ ಡೇಲ್ ಸ್ಟೇನ್, ವಿರಾಟ್ ಕೊಹ್ಲಿ ಅವರು ಬ್ಯಾಟ್ಸ್‌ಮನ್ ಆಗಿ ವಿಕಸನಗೊಂಡ ಬಗ್ಗೆ ಮಾತನಾಡಿದರು.

'ವಿರಾಟ್ ಕೊಹ್ಲಿ ಈಗಿರುವ ಮಟ್ಟವನ್ನು ತಲುಪಿದ ನಂತರ, ಬಹಳಷ್ಟು ಆಟಗಾರರು ತಮ್ಮ ಆಟವನ್ನು ಶೇ ಒಂದೆರಡು ಪ್ರಮಾಣದಲ್ಲಿ ಬದಲಿಸಲು ನೋಡುತ್ತಾರೆ. ವಿರಾಟ್ ಪ್ರತಿ ಐಪಿಎಲ್ ಆವೃತ್ತಿಯಲ್ಲಿ ಅದನ್ನೇ ಮಾಡುತ್ತಿದ್ದಾರೆ. ಅವರು ತಮ್ಮನ್ನು ತಾವು ಸುಧಾರಿಸಿಕೊಳ್ಳಲು ಮಾರ್ಗಗಳನ್ನು ಹುಡುಕುತ್ತಾರೆ ಮತ್ತು ಅವರು ತಮ್ಮ ಆಟದಲ್ಲಿ ಮಾಡಿರುವ ಹೊಸ ಸುಧಾರಣೆ ಅವರ ಸಿಕ್ಸ್-ಹಿಟ್ಟಿಂಗ್ ಸಾಮರ್ಥ್ಯ. ಇದು ಕಳೆದ ಎರಡು ಆವೃತ್ತಿಗಳಲ್ಲಿ ಹೆಚ್ಚಾಗಿದೆ' ಎಂದು ಸ್ಟೇನ್ ಹೇಳಿದರು.

'ಒಬ್ಬ ಬ್ಯಾಟ್ಸ್‌ಮನ್ ಆಗಿ, ನೀವು ಸಿಕ್ಸ್ ಹೊಡೆಯಲು ಬಯಸುವ ಚೆಂಡನ್ನು ಗುರುತಿಸುವುದು ಮುಖ್ಯ. ಹಿಂದೆ, ವಿರಾಟ್ ನಿರ್ದಿಷ್ಟ ಶಾಟ್ ಆಡುವ ಮನಸ್ಥಿತಿಯನ್ನು ಹೊಂದಿದ್ದರು. ಆದರೆ ಈಗ, ಟೆಸ್ಟ್ ಕ್ರಿಕೆಟ್‌ನಿಂದ ನಿವೃತ್ತರಾದ ನಂತರ ಅವರ ಮನಸ್ಥಿತಿ ಬಹಳಷ್ಟು ಬದಲಾಗಿದೆ. ವಿರಾಟ್ ತುಂಬಾ ಒಳ್ಳೆಯವರು ಮತ್ತು ತಮ್ಮನ್ನು ತಾವು ತುಂಬಾ ಬೆಂಬಲಿಸುತ್ತಾರೆ. ಅವರು ಏರಿಯಲ್ ಶಾಟ್‌ಗಳನ್ನು ಪದೇ ಪದೆ ಕಾರ್ಯಗತಗೊಳಿಸಲು ಸಮರ್ಥರಾಗಿದ್ದಾರೆ. ಇದು ಆ ವ್ಯಕ್ತಿಯ ಕ್ಲಾಸ್ ಅನ್ನು ತೋರಿಸುತ್ತದೆ' ಎಂದು ಅವರು ಹೇಳಿದರು.