ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಮತ್ತು ಪಾಕಿಸ್ತಾನ ಸೂಪರ್ ಲೀಗ್ (ಪಿಎಸ್ಎಲ್) ನಡುವಿನ ವ್ಯತ್ಯಾಸಗಳನ್ನು ಎತ್ತಿ ತೋರಿಸಿರುವ ಪಾಕಿಸ್ತಾನದ ಅನುಭವಿ ಕ್ರಿಕೆಟಿಗ ಅಹ್ಮದ್ ಶೆಹಜಾದ್ ಟೀಕಿಸಿದ್ದಾರೆ. ಪಿಎಸ್ಎಲ್ 2026ಕ್ಕೆ ಮಾರಾಟವಾಗದ ಶೆಹಜಾದ್, ಪಾಕಿಸ್ತಾನಿ ಲೀಗ್ನಲ್ಲಿ ಆಡುತ್ತಿರುವ ವಿದೇಶಿ ಆಟಗಾರರು ನಿವೃತ್ತರಾಗಿದ್ದಾರೆ ಅಥವಾ ಐಪಿಎಲ್ ಹರಾಜಿನ ಸಮಯದಲ್ಲಿ ಮಾರಾಟವಾಗದೆ ಉಳಿದಿರುವವರು ಎಂದಿದ್ದಾರೆ. ಶ್ರೀಲಂಕಾದ ಕುಸಲ್ ಮೆಂಡಿಸ್ ಮತ್ತು ದಕ್ಷಿಣ ಆಫ್ರಿಕಾದ ರಿಲೀ ರೊಸೊವ್ ಅವರನ್ನು ಇತ್ತೀಚೆಗೆ ಪಾಕಿಸ್ತಾನಿ ಪತ್ರಕರ್ತರು ಐಪಿಎಲ್ ಮತ್ತು ಪಿಎಸ್ಎಲ್ನಲ್ಲಿ ಆಡಿದ ಅನುಭವಗಳನ್ನು ಹೋಲಿಸಲು ಕೇಳಿದ ನಂತರ ಅವರ ಹೇಳಿಕೆ ಬಂದಿದೆ.
ಐಪಿಎಲ್ನಲ್ಲಿ ಆಡಲು ವಿದೇಶಿ ಆಟಗಾರರು ತಮ್ಮ ಸಕ್ರಿಯ ಪಿಎಸ್ಎಲ್ ಒಪ್ಪಂದಗಳಿಂದ ಹಿಂದೆ ಸರಿದಿದ್ದಕ್ಕಾಗಿ ಅವರನ್ನು ನಿಷೇಧಿಸಿದ್ದಕ್ಕಾಗಿ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ)ಯನ್ನು ಶೆಹಜಾದ್ ಟೀಕಿಸಿದರು.
'ಪಿಎಸ್ಎಲ್ನಲ್ಲಿ ಈಗ ಉಳಿದಿರುವ ಬಹುತೇಕ ಆಟಗಾರರು ಐಪಿಎಲ್ನಿಂದ ನಿವೃತ್ತರಾದವರು, ಐಪಿಎಲ್ನಲ್ಲಿ ಮಾರಾಟವಾಗದೇ ಉಳಿದವರು ಅಥವಾ ಐಪಿಎಲ್ನಲ್ಲಿ ಯಾವುದೇ ಅವಕಾಶ (ಡೇವಿಡ್ ವಾರ್ನರ್, ಸ್ಟೀವ್ ಸ್ಮಿತ್) ಪಡೆಯದವರು. ಆಡಲು ಅವಕಾಶವಿರುವ ಯಾರಾದರೂ ಐಪಿಎಲ್ ಅನ್ನು ಮಾತ್ರ ಆಯ್ಕೆ ಮಾಡುತ್ತಾರೆ. ಹಾಗಾದರೆ, ನೀವು ಇನ್ನೂ ಎಷ್ಟು ಆಟಗಾರರನ್ನು ನಿಷೇಧಿಸುತ್ತೀರಿ?' ಎಂದು ಶೆಹಜಾದ್ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಹೇಳಿದ್ದಾರೆ.
ಪಿಎಸ್ಎಲ್ನಲ್ಲಿ ಆಡುತ್ತಿರುವ ಕುಸಲ್ ಮೆಂಡಿಸ್ ಮತ್ತು ರೀಲಿ ರೊಸೊವ್ ಅವರಿಗೆ ಕೇಳಿದ ಪ್ರಶ್ನೆಗಳ ಬಗ್ಗೆಯೂ ಶೆಹಜಾದ್ ಮಾತನಾಡಿದರು. ಮೆಂಡಿಸ್ ಈ ಪ್ರಶ್ನೆಗೆ ಪ್ರತಿಕ್ರಿಯಿಸದಿದ್ದರೂ, ಐಪಿಎಲ್ 'ನಿಜವಾದ ಕ್ರಿಕೆಟ್ಗಿಂತ ಹೆಚ್ಚು ಚಲನಚಿತ್ರದಂತೆ ಭಾಸವಾಗುತ್ತದೆ' ಎಂದು ರೊಸೊವ್ ಹೇಳಿಕೊಂಡಿದ್ದರು.
'ಕುಸಲ್ ಮೆಂಡಿಸ್ ಸದ್ಯ ಪಿಎಸ್ಎಲ್ನಲ್ಲಿ ಆಡುತ್ತಿದ್ದಾರೆ, ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ಆದರೆ, ಅವರಿಗೆ 'ಸರ್, ನೀವು ಕೊನೆಯ ಬಾರಿ ಐಪಿಎಲ್ ಗೆ ಹೋಗಿದ್ದರ ಬಗ್ಗೆ ನಿಮ್ಮ ಅಭಿಪ್ರಾಯವೇನು?' ಎಂಬಂತಹ ಪ್ರಶ್ನೆಗಳನ್ನು ಕೇಳಲಾಗುತ್ತಿದೆ. ಅವರು ಯಾವ ರೀತಿಯ ಪ್ರಶ್ನೆಗಳನ್ನು ಕೇಳುತ್ತಿದ್ದಾರೆಂದು ನೋಡಿ' ಎಂದು ಅವರು ಹೇಳಿದರು.
'ರಿಲೀ ರೊಸೊವ್ ಅವರನ್ನು ನೋಡಿ, ಅವರ ಪ್ರದರ್ಶನದ ಬಗ್ಗೆ (ಪಿಎಸ್ಎಲ್ನಲ್ಲಿ) ಸ್ಪಷ್ಟತೆ ಇಲ್ಲ. ಆದರೆ, ಅವರು ಹೇಳಿಕೆಗಳನ್ನು ನೀಡಿದ್ದಾರೆ. ಅವರನ್ನು ಐಪಿಎಲ್ ಬಗ್ಗೆ ಕೇಳಿದಾಗ - ಪಿಎಸ್ಎಲ್ ಆಡುವಾಗ, ನೀವು ಐಪಿಎಲ್ ಅನ್ನು ಹೊಗಳಲು ಸಾಧ್ಯವಿಲ್ಲ. ಆದ್ದರಿಂದ, ಅವರು, 'ಓಹ್, ಅದು ಬಾಲಿವುಡ್ ಸಿನಿಮಾದಂತೆ ಇರುತ್ತದೆ. ಇಲ್ಲಿ ಪಿಎಸ್ಎಲ್ನಲ್ಲಿ ನಿಜವಾದ ಸ್ಪರ್ಧಾತ್ಮಕ ಕ್ರಿಕೆಟ್ ನಡೆಯುತ್ತಿದೆ' ಎಂದಿದ್ದಾರೆ' ಎಂದು ಶೆಹಜಾದ್ ಹೇಳಿದರು.