ಟೀಂ ಇಂಡಿಯಾದಲ್ಲಿ ಕೋಚಿಂಗ್ ಬಿಕ್ಕಟ್ಟು ಉದ್ಭವಿಸುವ ನಿರೀಕ್ಷೆಯಿದ್ದು, ಸಹಾಯಕ ಕೋಚ್ ರಯಾನ್ ಟೆನ್ ಡೋಸ್ಚೇಟ್ ಅವರು ಹುದ್ದೆಯಿಂದ ಕೆಳಗಿಳಿಯುವ ತಮ್ಮ ನಿರ್ಧಾರವನ್ನು ಆಡಳಿತ ಮಂಡಳಿಗೆ ತಿಳಿಸಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಡಚ್ ಆಟಗಾರನ ಒಪ್ಪಂದದ ಅವಧಿ ಮುಗಿಯುವ ಮೊದಲೇ ಅವರನ್ನು ಬಿಡಲು ಅವಕಾಶ ನೀಡಬೇಕೆ ಎಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಇನ್ನೂ ನಿರ್ಧರಿಸಿಲ್ಲವಾದರೂ, ಗೌತಮ್ ಗಂಭೀರ್ ನೇತೃತ್ವದ ಆಡಳಿತ ಮಂಡಳಿಯ ಈಡೇರದ ಭರವಸೆಯು ಟೆನ್ ಡೋಸ್ಚೇಟ್ ಈ ಹೆಜ್ಜೆ ಇಡಲು ಕಾರಣ ಎಂದು ವರದಿಯೊಂದು ವಿವರಿಸಿದೆ.
ಸುದ್ದಿಸಂಸ್ಥೆ ಪಿಟಿಐ ವರದಿ ಪ್ರಕಾರ, ತಂಡದ ಫೀಲ್ಡಿಂಗ್ ಕೋಚ್ ಜವಾಬ್ದಾರಿಯನ್ನೂ ನೀಡಲಾಗುವುದು ಎಂಬ ಭರವಸೆಯ ಮೇರೆಗೆ ಟೆನ್ ಡೋಸ್ಚೇಟ್ (Ten Doeschate) ಭಾರತದ ಸಹಾಯಕ ಕೋಚ್ ಆಗಿ ನೇಮಕಗೊಂಡಿದ್ದರು. ಆದಾಗ್ಯೂ, ಮಾಜಿ ಮುಖ್ಯ ಕೋಚ್ ರಾಹುಲ್ ದ್ರಾವಿಡ್ ಅವರ ಅವಧಿಯಲ್ಲಿ ಭಾರತದ ಕೋಚಿಂಗ್ ತಂಡವನ್ನು ಸೇರಿಕೊಂಡಿದ್ದ ಟಿ ದಿಲೀಪ್), ಗೌತಮ್ ಗಂಭೀರ್ ಮುಖ್ಯ ಕೋಚ್ ಆಗಿ ನೇಮಕಗೊಂಡ ನಂತರವೂ ಆ ಹುದ್ದೆಯನ್ನು ಮುಂದುವರಿಸಿದರು.
ತಂಡಕ್ಕೆ ಸೇರ್ಪಡೆಯಾಗಿ ಎರಡು ವರ್ಷ ಕಳೆದಿದ್ದರೂ, ತಮಗೆ ನೀಡಿದ್ದ ಭರವಸೆ ಈಡೇರುವುದಕ್ಕಾಗಿ ರಯಾನ್ ಟೆನ್ ಇನ್ನೂ ಕಾಯುತ್ತಿದ್ದಾರೆ. ಒಮ್ಮೆ ತಂಡದಿಂದ ಕೈಬಿಡಲು ನಿರ್ಧರಿಸಲಾಗಿದ್ದ ದಿಲೀಪ್ ಅವರನ್ನು ನಂತರ ಫೀಲ್ಡಿಂಗ್ ಕೋಚ್ ಆಗಿ ಮರುನೇಮಕ ಮಾಡಿದ್ದು, ನೆದರ್ಲ್ಯಾಂಡ್ಸ್ನ ಮಾಜಿ ಬ್ಯಾಟರ್ನ ನಿರಾಶೆಯನ್ನು ಇನ್ನಷ್ಟು ಹೆಚ್ಚಿಸಿದೆ.
'ಬ್ಯಾಟಿಂಗ್ ಕೋಚ್ ಆಗಿ ಸಿತಾಂಶು ಕೋಟಕ್ ಇದ್ದಾರೆ. ಜೊತೆಗೆ ಬ್ಯಾಟರ್ಗಳ ಉಸ್ತುವಾರಿ ನೋಡಿಕೊಳ್ಳಲು ಸ್ವತಃ ಗೌತಿ (ಗಂಭೀರ್) ಕೂಡ ಇದ್ದಾರೆ. ವೇಗದ ಬೌಲರ್ಗಳ ಜವಾಬ್ದಾರಿಯನ್ನು ಮೊರ್ನೆ (ಮೋರ್ಕೆಲ್) ವಹಿಸಿಕೊಂಡಿದ್ದರೆ, ಸ್ಪಿನ್ನರ್ಗಳ ಉಸ್ತುವಾರಿಯನ್ನು ಸೈರಾಜ್ (ಬಹುತುಲೆ) ನೋಡಿಕೊಳ್ಳುತ್ತಿದ್ದಾರೆ. 'ಟೆಂಡೋ' (ರಯಾನ್ ಟೆನ್ ಅವರ ಅಡ್ಡಹೆಸರು) ಅವರನ್ನು ತಂಡಕ್ಕೆ ಸೇರಿಸಿಕೊಂಡಾಗ, ಅವರಿಗೆ ಫೀಲ್ಡಿಂಗ್ ಕೋಚ್ ಹುದ್ದೆ ನೀಡುವುದಾಗಿ ಭರವಸೆ ನೀಡಲಾಗಿತ್ತು' ಎಂದು ಬಿಸಿಸಿಐ ಮೂಲವೊಂದು ಪಿಟಿಐಗೆ ತಿಳಿಸಿದೆ.
'2025ರ ಚಾಂಪಿಯನ್ಸ್ ಟ್ರೋಫಿಯ ನಂತರ ದಿಲೀಪ್ ಅವರನ್ನು ಅಭಿಷೇಕ್ ನಾಯರ್ (ಸಹಾಯಕ ಕೋಚ್), ಸೋಹಮ್ ದೇಸಾಯಿ (ಎಸ್ & ಸಿ ಕೋಚ್) ಮತ್ತು ಅರುಣ್ ಕಾನಡೆ (ಮಸಾಜರ್) ಅವರೊಂದಿಗೆ ತೆಗೆದುಹಾಕಬೇಕಿತ್ತು. ಆದಾಗ್ಯೂ, ದಿಲೀಪ್ ಅವರ ಹೆಸರನ್ನು ಹಿರಿಯ ಆಟಗಾರರೊಬ್ಬರು ಬಲವಾಗಿ ಶಿಫಾರಸು ಮಾಡಿದ್ದರಿಂದ ಅವರ ಹುದ್ದೆ ಒಂದು ವರ್ಷ ವಿಸ್ತರಣೆಯಾಯಿತು. ಇದರ ಪರಿಣಾಮವಾಗಿ, ಟೆಂಡೊಗೆ ನಿರ್ದಿಷ್ಟ ಡೊಮೇನ್ ಪಾತ್ರವಿರಲಿಲ್ಲ. ಅವರು ಅದ್ಭುತ ಕೋಚ್ ಆಗಿದ್ದು, ದಿಲೀಪ್ ಇರುವುದರಿಂದ ಅವರನ್ನು ಸರಿಯಾಗಿ ಬಳಸಿಕೊಳ್ಳಲಾಗಿಲ್ಲ' ಎಂದು ಮೂಲಗಳು ತಿಳಿಸಿವೆ.
'ಅವರು ಅತ್ಯುತ್ತಮ ಕೋಚ್ ಆಗಿದ್ದಾರೆ, ಆದರೆ ಫೀಲ್ಡಿಂಗ್ ಕೋಚ್ ಹುದ್ದೆಯು ಈಗಾಗಲೇ ಭರ್ತಿಯಾಗಿರುವುದರಿಂದ ಅವರ ಪರಿಣತಿಯನ್ನು ಸಂಪೂರ್ಣವಾಗಿ ಬಳಸಿಕೊಳ್ಳಲು ಸಾಧ್ಯವಾಗಿಲ್ಲ' ಎಂದು ರಯಾನ್ ಟೆನ್ ಕುರಿತು ಮೂಲವು ತಿಳಿಸಿದೆ.
ಫೀಲ್ಡಿಂಗ್ ಕೋಚ್ ಹುದ್ದೆಗೆ ಸಂಬಂಧಿಸಿದ ವಿಷಯದಲ್ಲಿನ ಭಿನ್ನಾಭಿಪ್ರಾಯದಿಂದಾಗಿ, ಸದ್ಯದ ಮಟ್ಟಿಗೆ ದಿಲೀಪ್ ಮತ್ತು ಟೆನ್ ಡೋಸ್ಟೇಟ್ ಇವರಲ್ಲಿ ಒಬ್ಬರು ಮಾತ್ರ ಗಂಭೀರ್ ಅವರ ಕೋಚಿಂಗ್ ತಂಡದಲ್ಲಿ ಮುಂದುವರಿಯಲು ಸಾಧ್ಯವಿದೆ.