ಕೃತಕ ಬುದ್ಧಿಮತ್ತೆಯ ಈ ಜಗತ್ತಿನಲ್ಲಿ ಡೀಪ್ಫೇಕ್ ವಿಡಿಯೋಗಳನ್ನು ರಚಿಸುವುದು ಇದೀಗ ಕಷ್ಟವಾಗಿ ಉಳಿದಿಲ್ಲ. ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ನೇ ಆವೃತ್ತಿ ಮುಕ್ತಾಯಗೊಳ್ಳುತ್ತಿದ್ದಂತೆ, ರಾಜಸ್ಥಾನ್ ರಾಯಲ್ಸ್ (RR) ತಂಡದ ವಂಡರ್ ಕಿಡ್ ವೈಭವ್ ಸೂರ್ಯವಂಶಿ ಅವರ ವಿಡಿಯೋ ಒಂದು ಇದೀಗ ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.
ಕ್ಲಿಪ್ನಲ್ಲಿ, ಸೂರ್ಯವಂಶಿ ವಿರಾಟ್ ಕೊಹ್ಲಿ ಅವರನ್ನು 'ನಿಧಾನ' ಮತ್ತು 'ಸೆಲ್ಫಿಶ್' ಎಂದು ಕರೆದಿರುವುದನ್ನು ಕಾಣಬಹುದು. ಖ್ಯಾತ ಕ್ರಿಕೆಟ್ ನಿರೂಪಕ ಹರ್ಷ ಭೋಗ್ಲೆ ಅವರು ಕೊಹ್ಲಿಯಂತೆ 'ಕಿಂಗ್' ಆಗಲು ಬಯಸುತ್ತೀರಾ ಎಂದು ಕೇಳಿದ ನಂತರ ಈ ಪ್ರತಿಕ್ರಿಯೆ ಬಂದಿದೆ ಎಂದು ಹೇಳಲಾಗಿದೆ. ಆದರೆ, ಈ ವಿಡಿಯೋ ನಕಲಿ ಎಂದು ತಿಳಿದುಬಂದಿದೆ.
ವಿಡಿಯೋ ವೈರಲ್ ಆದ ನಂತರ ಹರ್ಷ ಭೋಗ್ಲೆ ಸಾಮಾಜಿಕ ಮಾಧ್ಯಮದಲ್ಲಿ ಸ್ಪಷ್ಟನೆ ನೀಡಿದ್ದು, ತಾವು ಅಂತಹ ಪ್ರಶ್ನೆಯನ್ನು ಕೇಳಿಲ್ಲ ಅಥವಾ ವೈಭವ್ ಸೂರ್ಯವಂಶಿ ಆ ರೀತಿಯಲ್ಲಿ ಪ್ರತಿಕ್ರಿಯಿಸಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
'ನಾನು ಮತ್ತು ವೈಭವ್ ಸೂರ್ಯವಂಶಿ ಇರುವ ನಕಲಿ ವಿಡಿಯೋವೊಂದು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ. ಅದರಲ್ಲಿ ವೈಭವ್ ಅಸಭ್ಯ ಮತ್ತು ದುರಹಂಕಾರಿ ಎಂದು ಚಿತ್ರಿಸಲಾಗಿದೆ. ಆ ಪ್ರಶ್ನೆಯನ್ನು ನಾನು ಅವರಿಗೆ ಕೇಳಿಲ್ಲ ಅಥವಾ ಅಂತಹ ಉತ್ತರವೂ ಅವರಿಂದ ಬಂದಿಲ್ಲ. ಇದು ಕ್ರೂರ ಮತ್ತು ಚೇಷ್ಟೆಯ ಕೆಲಸವಾಗಿದೆ, ವಿಶೇಷವಾಗಿ ತನ್ನ ಕೆಲವು ಮಾತುಕತೆಗಳಲ್ಲಿ ಬಹಳ ಗೌರವಯುತವಾಗಿ ವರ್ತಿಸಿದ ಚಿಕ್ಕ ಮಗುವಿನ ಕಡೆಗೆ ಈ ರೀತಿಯ ವರ್ತನೆ ಸರಿಯಲ್ಲ' ಎಂದು ಎಕ್ಸ್ನಲ್ಲಿನ ಪೋಸ್ಟ್ನಲ್ಲಿ ಬರೆದಿದ್ದಾರೆ.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಮತ್ತು ಗುಜರಾತ್ ಟೈಟಾನ್ಸ್ ನಡುವಿನ ಐಪಿಎಲ್ 2026ರ ಫೈನಲ್ ಪಂದ್ಯದ ನಂತರ ಸೂರ್ಯವಂಶಿ ಮತ್ತು ಕೊಹ್ಲಿ ಸಂವಾದ ನಡೆಸಿದರು. ಐಪಿಎಲ್ನ ಅಧಿಕೃತ ಖಾತೆಯು ಈ ವಿಡಿಯೋವನ್ನು ಹಂಚಿಕೊಂಡಿದೆ. ಇದರಲ್ಲಿ ಕೊಹ್ಲಿ ಸೂರ್ಯವಂಶಿಗೆ 'ವೆಲ್ ಪ್ಲೇಯಡ್, ಯಂಗ್ ಮ್ಯಾನ್' ಎಂದು ಹೇಳುವುದನ್ನು ಕೇಳಬಹುದು. 15 ವರ್ಷದ ಬಾಲಕ ಆರ್ಸಿಬಿ ದಿಗ್ಗಜರನ್ನು ಭೇಟಿಯಾಗಿ ಕೈಜೋಡಿಸಿ ಅವರಿಗೆ ಗೌರವ ಸಲ್ಲಿಸಿದರು.
2026ರ ಐಪಿಎಲ್ ಅಭಿಯಾನದಲ್ಲಿ ಟೂರ್ನಮೆಂಟ್ನ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರನಾಗಿ 776 ರನ್ ಗಳಿಸುವ ಮೂಲಕ ಸೂರ್ಯವಂಶಿ ಆರೆಂಜ್ ಕ್ಯಾಪ್ ಪ್ರಶಸ್ತಿ ಸ್ವೀಕರಿಸಲು ವೇದಿಕೆಗೆ ಹೋದಾಗ, ಕೊಹ್ಲಿ ತಮ್ಮ ಆರ್ಸಿಬಿ ತಂಡದ ಮಾಜಿ ಸಹ ಆಟಗಾರ ಎಬಿ ಡಿವಿಲಿಯರ್ಸ್ಗೆ, 'ಈ ಮಗು ವಿಶೇಷ, ಅವನು ಅದ್ಭುತವಾಗಿ ಬ್ಯಾಟಿಂಗ್ ಮಾಡಬಹುದು' ಎಂದು ಹೇಳಿದರು.
ಸೂರ್ಯವಂಶಿ ಮತ್ತು ಕೊಹ್ಲಿ ನಡುವಿನ ಪರಸ್ಪರ ಮೆಚ್ಚುಗೆಯ ಹೊರತಾಗಿಯೂ, ಸಾಮಾಜಿಕ ಮಾಧ್ಯಮಗಳು ನಕಲಿ ವಿಡಿಯೋಗಳು ಹರಡುವಲ್ಲಿ ನಿರತವಾಗಿವೆ.