ಆದಿತ್ಯ ಬಿರ್ಲಾ ಗ್ರೂಪ್ ನೇತೃತ್ವದ ಒಕ್ಕೂಟವು ಮಂಗಳವಾರ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಫ್ರಾಂಚೈಸಿಯಾದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಯನ್ನು ₹1.78 ಬಿಲಿಯನ್‌ಗೆ (₹16,000 ಕೋಟಿಗಿಂತ ಹೆಚ್ಚು) ಖರೀದಿಸಿದೆ. ಈ ಒಕ್ಕೂಟವು ಟೈಮ್ಸ್ ಆಫ್ ಇಂಡಿಯಾ ಗ್ರೂಪ್, ಡೇವಿಡ್ ಬ್ಲಿಟ್ಜರ್ ಅವರ ಬೋಲ್ಟ್ ವೆಂಚರ್ಸ್ ಮತ್ತು ಯುಎಸ್ ಮೂಲದ ಬ್ಲಾಕ್‌ಸ್ಟೋನ್ ಹೂಡಿಕೆ ಗ್ರೂಪ್‌ ಅನ್ನು ಸಹ ಒಳಗೊಂಡಿದೆ. ಪುರುಷ ಮತ್ತು ಮಹಿಳಾ (ಡಬ್ಲ್ಯುಪಿಎಲ್) ತಂಡಗಳಾದ ಆರ್‌ಸಿಬಿಯ ಶೇ 100ರಷ್ಟು ಪಾಲನ್ನು ಸ್ವಾಧೀನಪಡಿಸಿಕೊಳ್ಳಲು ಯುಕೆ-ಡಿಯಾಜಿಯೊ ಪಿಎಲ್‌ಸಿಯ ಅಂಗಸಂಸ್ಥೆಯಾದ ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್ (ಯುಎಸ್‌ಎಲ್) ನೊಂದಿಗೆ ಒಪ್ಪಂದ ಮಾಡಿಕೊಂಡಿದೆ. ಈ ಸ್ವಾಧೀನದ ನಂತರ, ಆರ್ಯಮಾನ್ ಬಿರ್ಲಾ ಫ್ರಾಂಚೈಸಿಯ ಅಧ್ಯಕ್ಷರಾಗುತ್ತಾರೆ.

ಆರ್ಯಮಾನ್ ಬಿರ್ಲಾ ಯಾರು?

ಆರ್ಯಮನ್ ಬಿರ್ಲಾ, ಆದಿತ್ಯ ಬಿರ್ಲಾ ಗ್ರೂಪ್‌ನ ಅಧ್ಯಕ್ಷ ಕುಮಾರ್ ಮಂಗಲಂ ಬಿರ್ಲಾ ಅವರ ಪುತ್ರ. 28 ವರ್ಷದ ಈ ಆಟಗಾರ ದೇಶೀಯ ಕ್ರಿಕೆಟ್‌ನಲ್ಲಿ ಮಧ್ಯಪ್ರದೇಶ ಪರ ಆಡಿದ್ದರು. ಆರ್‌ಸಿಬಿ ನಾಯಕ ರಜತ್ ಪಾಟೀದಾರ್ ಮತ್ತು ಹರಾಜಿನಲ್ಲಿ ₹7 ಕೋಟಿಗೆ ಖರೀದಿಯಾದ ಆಲ್‌ರೌಂಡರ್ ವೆಂಕಟೇಶ್ ಅಯ್ಯರ್ ಅವರೊಂದಿಗೆ ಡ್ರೆಸ್ಸಿಂಗ್ ರೂಂ ಹಂಚಿಕೊಂಡಿದ್ದಾರೆ.

ಎಡಗೈ ಬ್ಯಾಟ್ಸ್‌ಮನ್ ಮಧ್ಯಪ್ರದೇಶ ಪರ ಒಂಬತ್ತು ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿದ್ದಾರೆ ಮತ್ತು ಈಡನ್ ಗಾರ್ಡನ್ಸ್‌ನಲ್ಲಿ ಬಂಗಾಳ ವಿರುದ್ಧದ ಒಂದು ಶತಕ ಸೇರಿದಂತೆ 414 ರನ್‌ಗಳನ್ನು ಗಳಿಸಿದ್ದಾರೆ ಮತ್ತು ನಾಲ್ಕು ಲಿಸ್ಟ್-ಎ ಪಂದ್ಯಗಳಲ್ಲಿ 36 ರನ್‌ಗಳನ್ನು ಗಳಿಸಿದ್ದಾರೆ.

ಆರ್ಯಮಾನ್ ಐಪಿಎಲ್ 2018ರ ಮೆಗಾ ಹರಾಜಿನಲ್ಲಿ ಭಾಗವಹಿಸಿದ್ದರು ಮತ್ತು ಅವರನ್ನು ರಾಜಸ್ಥಾನ ರಾಯಲ್ಸ್ ₹30 ಲಕ್ಷಕ್ಕೆ ಖರೀದಿಸಿತು. ಆದಾಗ್ಯೂ, ಅವರು ಫ್ರಾಂಚೈಸಿಗಾಗಿ ಒಂದೇ ಒಂದು ಪಂದ್ಯವನ್ನು ಆಡಲಿಲ್ಲ ಮತ್ತು 2020ರ ಆವೃತ್ತಿಗೆ ಮುಂಚಿತವಾಗಿ ಅವರನ್ನು ಕೈಬಿಡಲಾಯಿತು.

ಆ ಸಮಯದಲ್ಲಿ 'ತೀವ್ರ ಆತಂಕ'ವನ್ನು ನಿಭಾಯಿಸಲು ಆರ್ಯಮಾನ್ ಕ್ರಿಕೆಟ್‌ನಿಂದ 'ವಿಶ್ರಾಂತಿ' ತೆಗೆದುಕೊಂಡರು.

'ನಾನು ಸಿಕ್ಕಿಬಿದ್ದಂತೆ ಭಾಸವಾಗುತ್ತಿದೆ. ಇಲ್ಲಿಯವರೆಗೆ ಎಲ್ಲ ಸಂಕಷ್ಟಗಳಿಂದ ನನ್ನನ್ನು ನಾನು ಹೊರತಂದಿದ್ದೇನೆ. ಆದರೆ, ಈಗ ನನ್ನ ಮಾನಸಿಕ ಆರೋಗ್ಯ ಮತ್ತು ಯೋಗಕ್ಷೇಮವನ್ನು ಎಲ್ಲಕ್ಕಿಂತ ಹೆಚ್ಚಾಗಿ ಇಡುವ ಅಗತ್ಯವನ್ನು ನಾನು ಅನುಭವಿಸುತ್ತಿದ್ದೇನೆ. ನಮಗೆಲ್ಲರಿಗೂ ನಮ್ಮದೇ ಆದ ಪ್ರಯಾಣಗಳಿವೆ ಮತ್ತು ನನ್ನನ್ನು ಚೆನ್ನಾಗಿ ಅರ್ಥಮಾಡಿಕೊಳ್ಳಲು, ಹೊಸ ಮತ್ತು ವೈವಿಧ್ಯಮಯ ದೃಷ್ಟಿಕೋನಗಳಿಗೆ ನನ್ನ ಮನಸ್ಸನ್ನು ತೆರೆಯಲು ಮತ್ತು ನನ್ನ ಸಂಶೋಧನೆಗಳಲ್ಲಿ ಉದ್ದೇಶವನ್ನು ಹುಡುಕಲು ನಾನು ಈ ಸಮಯವನ್ನು ತೆಗೆದುಕೊಳ್ಳಲು ಬಯಸುತ್ತೇನೆ' ಎಂದು ಬಿರ್ಲಾ ಇನ್‌ಸ್ಟಾಗ್ರಾಂನಲ್ಲಿ ಬರೆದಿದ್ದರು.

ಬಳಿಕ ಅವರು ಕ್ರಿಕೆಟ್‌ಗೆ ಹಿಂತಿರುಗಲಿಲ್ಲ ಮತ್ತು ಸದ್ಯ ಆದಿತ್ಯ ಬಿರ್ಲಾ ಮ್ಯಾನೇಜ್‌ಮೆಂಟ್ ಕಾರ್ಪೊರೇಷನ್ ಲಿಮಿಟೆಡ್‌ನ ನಿರ್ದೇಶಕರಾಗಿದ್ದಾರೆ.

'ಆರ್‌ಸಿಬಿಯ ಮುಂದಿನ ಹಂತದ ಬೆಳವಣಿಗೆಯನ್ನು ರೂಪಿಸಲು ಈ ಪಾಲುದಾರಿಕೆಯಲ್ಲಿ ಒಟ್ಟಿಗೆ ಸೇರುವುದು ಒಂದು ಸೌಭಾಗ್ಯ. ಈ ಪಾಲುದಾರಿಕೆಯು ಕ್ರೀಡೆ, ಮಾಧ್ಯಮ ಮತ್ತು ಗ್ರಾಹಕ ವ್ಯವಹಾರಗಳ ಬಗ್ಗೆ ಆಳವಾದ ತಿಳುವಳಿಕೆಯನ್ನು ಒಟ್ಟುಗೂಡಿಸುತ್ತದೆ' ಎಂದು ಆರ್ಯಮಾನ್ ಬಿರ್ಲಾ ಹೇಳಿದ್ದಾರೆ.