ಧರ್ಮಶಾಲಾ: ಐಪಿಎಲ್ ಟೂರ್ನಿಯ ಇಂದಿನ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ 23 ರನ್ ಗಳ ಅಂತರದಲ್ಲಿ ಗೆದ್ದ ಆರ್ ಸಿಬಿ ಪ್ಲೇಆಫ್ ಗೆ ಲಗ್ಗೆ ಇಟ್ಟಿದ್ದು ಆ ಮೂಲಕ ಪ್ಲೇಆಫ್ ಗೆ ಎಂಟ್ರಿ ಕೊಟ್ಟ ಮೊದಲ ತಂಡ ಎಂಬ ಕೀರ್ತಿಗೂ ಭಾಜನವಾಗಿದೆ.
ಧರ್ಮಶಾಲಾದ ಹಿಮಾಚಲ ಪ್ರದೇಶ ಕ್ರಿಕೆಟ್ ಮೈದಾನದಲ್ಲಿ ಭಾನುವಾರ ನಡೆದ ಲೀಗ್ ಹಂತದ ಪಂದ್ಯದಲ್ಲಿ ಬೆಂಗಳೂರು ತಂಡ ಪಂಜಾಬ್ ತಂಡವನ್ನು 23 ರನ್ ಗಳ ಅಂತರದಲ್ಲಿ ಮಣಿಸಿ ಐಪಿಎಲ್ 2026 ಟೂರ್ನಿಯ ಪ್ಲೇಆಫ್ ಗೆ ಲಗ್ಗೆ ಇಟ್ಟಿದೆ.
ಇದೇ ಹೊತ್ತಿನಲ್ಲೇ ವಿರಾಟ್ ಕೊಹ್ಲಿ ಮತ್ತು ದೇವದತ್ ಪಡಿಕ್ಕಲ್ ಅವರ ವಿಡಿಯೋವೊಂದು ವ್ಯಾಪಕ ವೈರಲ್ ಆಗುತ್ತಿದೆ.
ಬೌಂಡರಿ ಹೋಗದಿದ್ದರೂ 4 ರನ್
ಪಂದ್ಯದ ವೇಳೆ ನಡೆದ ಈ ಒಂದು ವಿಶೇಷ ಕ್ಷಣ ಅಭಿಮಾನಿಗಳು ಮತ್ತು ಕಾಮೆಂಟೇಟರ್ಗಳ ಗಮನ ಸೆಳೆಯಿತು. ಕೊಹ್ಲಿ ಮತ್ತು ಪಡಿಕ್ಕಲ್ ಅವರು ಬೌಂಡರಿ ಹೊಡೆಯದೇ ಕೇವಲ ವಿಕೆಟ್ಗಳ ನಡುವೆ ವೇಗವಾಗಿ ಓಡುವ ಮೂಲಕ ನಾಲ್ಕು ರನ್ಗಳನ್ನು ಗಳಿಸಿದರು.
ಇಬ್ಬರೂ ಮೈದಾನದಲ್ಲಿ ಅತ್ಯುತ್ತಮ ಹೊಂದಾಣಿಕೆಯನ್ನು ತೋರಿಸಿ ಸಾಮಾನ್ಯ ಶಾಟ್ನನ್ನೇ ವೇಗದ ಓಟ ಮತ್ತು ಚುರುಕಿನ ನಿರ್ಧಾರಗಳಿಂದ ಬಹು ರನ್ಗಳಾಗಿ ಪರಿವರ್ತಿಸಿದರು.
ಬಾಲ್ ಗ್ಯಾಪ್ಗೆ ತೆರಳುತ್ತಿದ್ದಂತೆಯೇ ಇಬ್ಬರೂ ತಕ್ಷಣ ಸ್ಪಂದಿಸಿದರು. ಸಾಮಾನ್ಯವಾಗಿ ಒಂದು ಅಥವಾ ಎರಡು ರನ್ಗಳಿಗೆ ತೃಪ್ತಿಪಡುವ ಬದಲು, ಕೊಹ್ಲಿ ತಮ್ಮ ಖ್ಯಾತ ಆಕ್ರಮಣಕಾರಿ ಶೈಲಿಯಲ್ಲಿ ಹೆಚ್ಚುವರಿ ರನ್ಗಳಿಗೆ ಒತ್ತಾಯಿಸಿದರು. ಪಡಿಕ್ಕಲ್ ಕೂಡ ಅದೇ ಮಟ್ಟದ ಚುರುಕುತನ ತೋರಿಸಿ ಕೊಹ್ಲಿಯೊಂದಿಗೆ ಸಮಾನ ವೇಗದಲ್ಲಿ ಓಡಿದರು.
ವ್ಯಾಪಕ ಪ್ರಶಂಸೆ
ಆರ್ ಸಿಬಿ ಬ್ಯಾಟಿಂಗ್ ವೇಳೆ ವಿರಾಟ್ ಕೊಹ್ಲಿ ಮತ್ತು ದೇವದತ್ ಪಡಿಕ್ಕಲ್ ಜೋಡಿ ಅಸಾಧ್ಯ ಎಂಬುದನ್ನು ಸಾಧ್ಯ ಮಾಡಿ ತೋರಿಸಿತು. ಈ ಜೋಡಿ ಚಾಕ್ಯಚಕ್ಯತೆಗೆ ಪಂಜಾಬ್ ಆಟಗಾರರೇ ದಂಗಾಗಿ ಹೋಗಿದ್ದರು.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಮತ್ತು ಪಂಜಾಬ್ ಕಿಂಗ್ಸ್ (ಪಿಬಿಕೆಎಸ್) ನಡುವಿನ ಪಂದ್ಯದಲ್ಲಿ ಕೊಹ್ಲಿ ಮತ್ತು ಪಡಿಕ್ಕಲ್ ಜೋಡಿ ಅಸಾಧಾರಣ ಫಿಟ್ನೆಸ್, ಹೊಂದಾಣಿಕೆ ಮತ್ತು ಆಟದ ಅರಿವು ಪ್ರದರ್ಶಿಸಿ ಭಾರೀ ಪ್ರಶಂಸೆಗೆ ಪಾತ್ರರಾದರು.
ಈ ವೇಗದ ಓಟ ಪಂಜಾಬ್ ಕಿಂಗ್ಸ್ ಫೀಲ್ಡರ್ಗಳ ಮೇಲೆ ಒತ್ತಡ ಸೃಷ್ಟಿಸಿತು. ಅವರು ತುರ್ತು ಥ್ರೋ ಮಾಡಲು ಪ್ರಯತ್ನಿಸಿದ ಪರಿಣಾಮ ಔಟ್ಫೀಲ್ಡ್ನಲ್ಲಿ ಗೊಂದಲ ಉಂಟಾಗಿ, ಬಾಲ್ ಬೌಂಡರಿಗೆ ಹೋಗದೇ ಇದ್ದರೂ ಆರ್ಸಿಬಿ ನಾಲ್ಕು ಅಮೂಲ್ಯ ರನ್ಗಳನ್ನು ಸೇರಿಸಿತು.
ವೈರಲ್ ವಿಡಿಯೋ ಅಸಲೀಯತ್ತೇನು?
ಅಂದಹಾಗೆ ಈ ವಿಡಿಯೋ ಇಂದಿನ ಪಂದ್ಯದ್ದಲ್ಲ.. 2025ರ ಐಪಿಎಲ್ ಟೂರ್ನಿಯದ್ದು. ಅಂದು ಮುಲ್ಲನ್ ಪುರದಲ್ಲಿ ನಡೆದಿದ್ದ ಪಂದ್ಯದಲ್ಲಿ ಆರ್ ಸಿಬಿ ಚೇಸಿಂಗ್ ವೇಳೆ ಈ ಘಟನೆ ನಡೆದಿತ್ತು. ಆದರೆ ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ಇಂದಿನ ಪಂದ್ಯದ್ದು ಎಂದು ಬಿಂಬಿತವಾಗುತ್ತಿದೆ. @wokenupkohli ಎಂಬ ಎಕ್ಸ್ ಖಾತೆಯಲ್ಲಿ ನಿನ್ನೆಯೇ ಈ ವಿಡಿಯೋ ಅಪ್ಲೋಡ್ ಆಗಿದೆ. ಇಂದು ಆರ್ ಸಿಬಿ ಮತ್ತು ಪಂಜಾಬ್ ಪಂದ್ಯ ನಡೆಯುತ್ತಿದ್ದ ಸಂದರ್ಭದಲ್ಲೇ ಈ ವಿಡಿಯೋ ಕೂಡ ವೈರಲ್ ಆಗುತ್ತಿದೆ.
ಲೈವ್ ಮ್ಯಾಚ್ ನೋಡಿದವರೇ ಬೇಸ್ತು
ಇನ್ನ ಇಂದಿನ ಪಂದ್ಯದ ಲೈವ್ ಪಂದ್ಯ ವೀಕ್ಷಿಸಿದವರೇ ಈ ಘಟನೆ ಯಾವಾಗ ನಡೆಯಿತು ಎಂದು ಅಚ್ಚರಿ ಪಡುತ್ತಿದ್ದು, ಅಷ್ಟರ ಮಟ್ಟಿಗೆ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.