ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2027ರ ಹರಾಜು ಸಮೀಪಿಸುತ್ತಿದ್ದಂತೆ, ಫ್ರಾಂಚೈಸಿಗಳು ತಮ್ಮ ರಿಟೆನ್ಶನ್ ಮತ್ತು ರಿಲೀಸ್ ಮಾಡಲು ಬಯಸುವ ಆಟಗಾರರ ಪಟ್ಟಿಯನ್ನು ಅಂತಿಮಗೊಳಿಸುವಲ್ಲಿ ನಿರತವಾಗಿವೆ. ಕೆಲವು ತಂಡಗಳು ಸಂಭಾವ್ಯ ಟ್ರೇಡಿಂಗ್ ಕುರಿತು ಇತರ ಫ್ರಾಂಚೈಸಿಗಳೊಂದಿಗೆ ಮಾತುಕತೆಯಲ್ಲಿ ತೊಡಗಿವೆ. ಟ್ರೇಡ್ ಕುರಿತು ಅನೇಕ ಫ್ರಾಂಚೈಸಿಗಳೊಂದಿಗೆ ಚರ್ಚೆ ನಡೆಸುತ್ತಿರುವ ಡೆಲ್ಲಿ ಕ್ಯಾಪಿಟಲ್ಸ್ ಈಗ ದೊಡ್ಡ ತಲೆನೋವನ್ನು ಎದುರಿಸುತ್ತಿದೆ. ವರದಿಗಳ ಪ್ರಕಾರ, ಫ್ರಾಂಚೈಸಿಯ ನಾಯಕ ಅಕ್ಷರ್ ಪಟೇಲ್ ತಂಡದ ನಾಯಕರಾಗಿ ಮುಂದುವರಿಸಲು ಹಿಂಜರಿಯುತ್ತಿದ್ದಾರೆ ಎನ್ನಲಾಗಿದ್ದು, ತಂಡದ ನಿರ್ವಹಣೆ ಇದೀಗ ಸಂಕಷ್ಟಕ್ಕೆ ಸಿಲುಕಿದೆ.

ಟೈಮ್ಸ್ ಆಫ್ ಇಂಡಿಯಾ ವರದಿ ಪ್ರಕಾರ, ಡೆಲ್ಲಿ ಕ್ಯಾಪಿಟಲ್ಸ್ ಮ್ಯಾನೇಜ್ಮೆಂಟ್‌ಗೆ ಅಕ್ಷರ್ ಪಟೇಲ್ ಅವರನ್ನು ನಾಯಕ ಸ್ಥಾನದಿಂದ ಕೆಳಗಿಳಿಸುವುದು ಇಷ್ಟವಿಲ್ಲ. ಹೀಗಾಗಿ, ತಂಡದ ನಾಯಕರಾಗಿ ಮುಂದುವರಿಯುವಂತೆ ಅಕ್ಷರ್ ಅವರಿಗೆ ಮನವೊಲಿಸಲು ಸಾಕಷ್ಟು ಪ್ರಯತ್ನ ಮಾಡಲಿದೆ ಎನ್ನಲಾಗಿದೆ.

ಅಕ್ಷರ್ ಅವರ ನಾಯಕತ್ವದಲ್ಲಿ ದೆಹಲಿ ತಂಡದ ಪ್ರದರ್ಶನವು ಮಿಶ್ರ ಫಲಿತಾಂಶಗಳನ್ನು ಕಂಡಿದೆ; ಕಳೆದ ಎರಡು ಸೀಸನ್‌ಗಳಲ್ಲಿ ತಂಡವು ಪ್ಲೇಆಫ್‌ಗೆ ಪ್ರವೇಶಿಸಲು ವಿಫಲವಾಗಿದೆ. ನಾಯಕತ್ವದ ಹೊರೆಯು ಅಕ್ಷರ್ ಅವರ ಬ್ಯಾಟಿಂಗ್ ಮತ್ತು ಬೌಲಿಂಗ್ ಪ್ರದರ್ಶನದ ಮೇಲೆ ಪರಿಣಾಮ ಬೀರಿದಂತಿದೆ. ಐಪಿಎಲ್ (IPL) 2026ರಲ್ಲಿ, ಅವರು ಆಡಿದ 14 ಪಂದ್ಯಗಳಲ್ಲಿ ಕೇವಲ 173 ರನ್‌ಗಳನ್ನು ಗಳಿಸಿದರು ಮತ್ತು 11 ವಿಕೆಟ್‌ಗಳನ್ನು ಪಡೆದರು.

ಅಲ್ಲದೆ, ಅಕ್ಷರ್ ಅವರನ್ನು ತಮ್ಮ ತಂಡಕ್ಕೆ ಸೇರಿಸಿಕೊಳ್ಳಲು (ಟ್ರೇಡ್ ಡೀಲ್ ಮೂಲಕ) ಹಲವು ಫ್ರಾಂಚೈಸಿಗಳು ಡೆಲ್ಲಿ ತಂಡವನ್ನು ಸಂಪರ್ಕಿಸಿದ್ದವು. ಆದರೆ, ಆಕರ್ಷಕ ಪ್ರಸ್ತಾಪಗಳು ಸೇರಿದಂತೆ ಬಂದಿದ್ದ ಎಲ್ಲ ಆಫರ್‌ಗಳನ್ನು ದೆಹಲಿ ತಂಡದ ಆಡಳಿತ ಮಂಡಳಿಯು ತಿರಸ್ಕರಿಸಿತು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

'ಅಕ್ಷರ್ ನಾಯಕರಾಗಿ ಮುಂದುವರಿಯಲು ಹೆಚ್ಚು ಆಸಕ್ತಿ ಹೊಂದಿಲ್ಲ. ಅವರನ್ನು ಒಪ್ಪಿಸಲು ಆಡಳಿತ ಮಂಡಳಿ ಪ್ರಯತ್ನಿಸುತ್ತಿದೆ. ಫ್ರಾಂಚೈಸಿಗೆ ಅಕ್ಷರ್ ಅತ್ಯಂತ ಪ್ರಮುಖ ಆಟಗಾರ. ಈ ಆವೃತ್ತಿಯಲ್ಲಿ 'ಕ್ಯಾಪಿಟಲ್ಸ್' ತಂಡವು ಆಟಗಾರರ ವಿನಿಮಯಕ್ಕೆ (trade) ಬಂದಿದ್ದ ಹಲವು ಲಾಭದಾಯಕ ಪ್ರಸ್ತಾಪಗಳನ್ನು ತಿರಸ್ಕರಿಸಿದೆ. ಹರಾಜು ಪ್ರಕ್ರಿಯೆ ಮುಗಿಯುವವರೆಗೂ ನಾಯಕನ ಆಯ್ಕೆಯನ್ನು ಅಂತಿಮಗೊಳಿಸದಿರಲು ಆಡಳಿತ ಮಂಡಳಿ ನಿರ್ಧರಿಸಿದೆ' ಎಂದು ಮೂಲವೊಂದು ತಿಳಿಸಿರುವುದಾಗಿ TOI ವರದಿ ಮಾಡಿದೆ.

ಈ ವರ್ಷದ ಡಿಸೆಂಬರ್‌ನಲ್ಲಿ ನಡೆಯಲಿರುವ ಹರಾಜಿಗೂ ಮುನ್ನ, ಡೆಲ್ಲಿ ಕ್ಯಾಪಿಟಲ್ಸ್ ತಂಡವು ದೊಡ್ಡ ಮಟ್ಟದ ಪುನರ್ರಚನೆಗೆ ಒಳಗಾಗಿದೆ. ಸೌರವ್ ಗಂಗೂಲಿ ಮುಖ್ಯ ಕೋಚ್ ಆಗಿ ಜವಾಬ್ದಾರಿ ವಹಿಸಿಕೊಂಡಿದ್ದರೆ, ಯುವರಾಜ್ ಸಿಂಗ್, ಚಮಿಂಡಾ ವಾಸ್ ಮತ್ತು ಅಮಿತ್ ಮಿಶ್ರಾ ಅವರಂತಹವರು ಸಹಾಯಕ ಸಿಬ್ಬಂದಿಯಾಗಿ (support staff) ತಂಡ ಸೇರಿದ್ದಾರೆ.

ವರ್ಷಗಳಿಂದ ಫ್ರಾಂಚೈಸಿಯ ಪ್ರಮುಖ ಮುಖವಾಗಿದ್ದ ರಿಷಬ್ ಪಂತ್, ಲಕ್ನೋ ಸೂಪರ್ ಜೈಂಟ್ಸ್ ತಂಡದೊಂದಿಗೆ ಕಳೆದ ಕೆಲವು ಆವೃತ್ತಿಗಳ ನಂತರ ಇದೀಗ ಡೆಲ್ಲಿಗೆ ಮರಳಿದ್ದಾರೆ. ಆದಾಗ್ಯೂ, ಮುಂದಿನ ವರ್ಷದ ಐಪಿಎಲ್ ಆವೃತ್ತಿ ಆರಂಭವಾಗುವ ಮೊದಲು ಇನ್ನೂ ಕೆಲವು ಪ್ರಮುಖ ಬದಲಾವಣೆಗಳು ನಡೆಯುವ ನಿರೀಕ್ಷೆಯಿದೆ.