ಮಂಗಳೂರು: ಜಿಲ್ಲೆಯಲ್ಲಿಯೂ ಕೋರ್ ಬ್ಯಾಂಕಿಂಗ್ ವ್ಯವಸ್ಥೆಗೆ ತೊಂದರೆಯಾಗಿದೆ. ಬೆಳಗ್ಗೆ 10ರಿಂದ ಸಂಜೆ 5.15ರವರೆಗೂ ಸರ್ವರ್‍ಗಳು ನಿಧಾನವಾಗಿ ಕೋರ್ ಬ್ಯಾಂಕಿಂಗ್ ಕೆಲಸಕ್ಕೆ ತೊಂದರೆಯಾಗುತ್ತಿದೆ.

ಇದರಿಂದ ಅಂಚೆ ಕಚೇರಿಗಳಲ್ಲಿ ಗ್ರಾಹಕರಿಗೆ ತೊಂದರೆಯಾಗಿದೆ. ದೇಶದಾದ್ಯಂತ ಕಳೆದ ಎರಡು ಮೂರು ದಿನಗಳಿಂದ ಈ ತೊಂದರೆ ಕಾಣಿಸಿದೆ. ಪಿನಾಕಲ್ ಸಾಫ್ಟ್ ವೇರ್‍ನಿಂದ ಇನ್ಫೋಸಿಸ್  ತಂತ್ರಜ್ಞರು ಕೋರ್ ಬ್ಯಾಂಕಿಂಗ್ ಸಂಪರ್ಕ ಕಲ್ಪಿಸುವ ಕಾರ್ಯ ನಡೆಸುತ್ತಿದ್ದಾರೆ. ಕೋರ್ ಬ್ಯಾಂಕಿಂಗ್ ನಲ್ಲಿ ಒಂದು ಅಂಚೆ ಕಚೇರಿಯ ಗ್ರಾಹಕರ ಎಲ್ಲ ವಿವರಗಳನ್ನು ಎಲ್ಲ ಅಂಚೆ ಕಚೇರಿಗಳಿಗೆ  ಡಾಟಾ ಮೂಲಕ ರವಾನಿಸುವುದು. ಈ ಸೌಲಭ್ಯದಿಂದ ಗ್ರಾಹಕರು ಯಾವುದೇ ಅಂಚೆ ಕಚೇರಿಯಲ್ಲಿ ಹಣಕಾಸು ವಹಿವಾಟು ನಡೆಸಬಹುದು.

ಅಂಚೆ ಕಚೇರಿಯ ಬ್ಯಾಂಕಿಂಗ್‍ನ ಮುಖ್ಯ ಸರ್ವರ್ ಮುಂಬಯಿನಲ್ಲಿದೆ. ಎಲ್ಲ ಅಂಚೆ ಕಚೇರಿಗಳ ಸರ್ವರ್ ಗಳಿಗೆ ಸಂಪರ್ಕ ಕಲ್ಪಿಸುವ ಕಾರ್ಯ ನಡೆಯುತ್ತಿದ್ದು ಸರ್ವರ್‍ಗಳ ಕೆಲಸ ನಿಧಾನವಾಗುತ್ತಿದೆ.  ಈ ಕಾರ್ಯ ಮಾರ್ಚ್ ಒಳಗೆ ಮುಕ್ತಾಯಗೊಳ್ಳಬೇಕು. ರಾಜ್ಯದಲ್ಲಿ ಸುಮಾರು 1,580 ಅಂಚೆ ಕಚೇರಿಗಳಿದ್ದು, ಇನ್ನೂ 70 ಕಚೇರಿಗಳನ್ನು ಕೋರ್‍ಬ್ಯಾಂಕಿಂಗ್ ಸೌಲಭ್ಯಕ್ಕೆ ಸೇರ್ಪಡೆಗೊಳಿಸಲು ಬಾಕಿ  ಇದೆ. ಮುಂದಿನ ದಿನಗಳಲ್ಲಿ ದೇಶಾದ್ಯಂತ 28 ಸಾವಿರ ಅಂಚೆ ಕಚೇರಿಗಳಲ್ಲಿ ಕೋರ್ ಬ್ಯಾಂಕಿಂಗ್ ಸೇವೆಗಳು ಗ್ರಾಹಕರಿಗೆ ಲಭ್ಯವಾಗಲಿದೆ.