ಕನ್ನಡಪ್ರಭ ವಾರ್ತೆ, ಧಾರವಾಡ, ಜ. 27
ಹಲವು ಗೊಂದಲ, ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದ್ದ ಧಾರವಾಡ ಸಾಹಿತ್ಯ ಸಂಭ್ರಮ ಯಶಸ್ಸು ಕಂಡಿದೆ ಎಂದು ಹಿರಿಯ ವಿಮರ್ಶಕ ಮೈಸೂರಿನ ಜಿ.ಎಚ್. ನಾಯಕ ಹೇಳಿದರು.
ಕಳೆದ ಶುಕ್ರವಾರದಿಂದ ಭಾನುವಾರದವರೆಗೂ ಇಲ್ಲಿನ ಕವಿವಿ ಸುವರ್ಣ ಮಹೋತ್ಸವ ಸಭಾಂಗಣದಲ್ಲಿ ನಡೆದ ಸಾಹಿತ್ಯ ಸಂಭ್ರಮದ ಸಮಾರೋಪ ಭಾಷಣದಲ್ಲಿ ಮಾತನಾಡಿದ ಅವರು, ಈ ಸಂಭ್ರಮ ಹಿರಿಯ ಹಾಗೂ ಎಲ್ಲಾ ಮಾದರಿಯ ಸಾಹಿತಿಗಳಿಗೆ ಪುನಶ್ಚೇತನ ಕಾರ್ಯಾಗಾರ ನೀಡಿದಂತಾಗಿತ್ತು. ಆದರೆ, ಈ ಯಶಸ್ವಿ ಮಧ್ಯೆ ಸಂಘಟಕರು ಸಮಾರಂಭದ ಮುಂಚೆ ಹಾಕಿದ್ದ ನಿಬಂಧನೆಗಳು ಹುಕುಂ ತರಹ ಇದ್ದ ಕಾರಣ ನನಗೂ ಆತಂಕ ಸೃಷ್ಟಿಸಿದ್ದವು. ಈ ಹುಕುಂ ನೀಡುವ ನಿಬಂಧನೆಗಳು ಸಲ್ಲದು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಪ್ರಾಸ್ತಾವಿಕವಾಗಿ ಮಾತನಾಡಿದ ಹಿರಿಯ ಸಾಹಿತಿ ಟಿ.ಪಿ. ಅಶೋಕ, ಗೋಷ್ಠಿಗಳಲ್ಲಿ ಯುವಕರಿಗೆ ಪ್ರಾತಿನಿಧ್ಯ ಸಿಗಬೇಕಿತ್ತು ಎಂದು ಪ್ರತಿಪಾದಿಸಿದರು.
ಹದಗೆಡಿಸುವುದು ಬೇಡ: ಸಾಹಿತ್ಯ ಸಂಭ್ರಮ ಟ್ರಸ್ಟ್ ಅಧ್ಯಕ್ಷ ಡಾ. ಗಿರಡ್ಡಿ ಗೋವಿಂದರಾಜ ಮಾತನಾಡಿ, ಈ ಸಂಭ್ರಮ ಆರಂಭಿಸುವ ಮುನ್ನ ಹಾಗೂ ನಂತರವೂ ಎದುರಾದ ಎಲ್ಲಾ ತರಹದ ವಿರೋಧವನ್ನು ಮುಕ್ತವಾಗಿ ಸ್ವಾಗತಿಸುತ್ತೇನೆ. ಈ ವಿರೋಧದ ಹಿಂದೆ ಸಮಾರಂಭ ಹದಗೆಡಿಸುವ ಮನೋಭಾವ ಬೇಡ. ಅದು ಒಳ್ಳೆಯ ಉದ್ದೇಶ ಮಾತ್ರ ಇರಲಿ ಎಂದರು. ಕರ್ನಾಟಕ ವಿವಿ ಕುಲಪತಿ ಡಾ. ಎಚ್.ಬಿ. ವಾಲೀಕಾರ ಮಾತನಾಡಿ, ಸಾಂಸ್ಕೃತಿಕ ಸಿರಿವಂತಿಕೆಯ ಹಿರಿಮೆಯ ಧಾರವಾಡದಲ್ಲಿ ಇಂತಹ ಒಂದು ಅಭೂತಪೂರ್ವ ಕಾರ್ಯಕ್ರಮಕ್ಕೆ ವಿಶ್ವವಿದ್ಯಾಲಯ ವೇದಿಕೆಯಾಗಿದ್ದು ಸಂತಸ ತಂದಿದೆ. ಭವಿಷ್ಯದಲ್ಲಿ ಈ ರೀತಿ ಕಾರ್ಯಕ್ರಮಗಳಿಗೆ ಎಲ್ಲ ರೀತಿಯ ಸಹಕಾರ ನೀಡುತ್ತೇನೆಂದರು.
ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಆಯುಕ್ತ ಕೆ.ಆರ್. ರಾಮಕೃಷ್ಣ ಮಾತನಾಡಿದರು. ವಿಮರ್ಶಕ ಡಾ. ಜಿ.ಎಸ್. ಆಮೂರ, ಡಾ. ಗಿರೀಶ ಕರ್ನಾಡ , ನಾಡೋಜ ಚನ್ನವೀರ ಕಣವಿ, ಡಾ. ಎಂ.ಎಂ. ಕಲಬುರ್ಗಿ, ಹ.ವೆಂ. ಕಾಖಂಡಕಿ ಇದ್ದರು.