ಧಾರವಾಡ: ಲೋಕಸಭೆ ಚುನಾವಣೆಯಲ್ಲಿ ಧಾರವಾಡ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಪ್ರಹ್ಲಾದ ಜೋಶಿ ಅವರಿಗೆ ಅಂಚೆ ಮತಗಳಲ್ಲಿಯೂ ಹೆಚ್ಚು ಮತಗಳು ಲಭಿಸಿವೆ. ಧಾರವಾಡ ಕೃಷಿ ವಿಶ್ವವಿದ್ಯಾಲಯದ ಮತಎಣಿಕೆ ಕೇಂದ್ರದಲ್ಲಿ ಮಾಧ್ಯಮ ಪ್ರತಿನಿಧಿಗಳಿಗೆ ಈ ವಿಷಯ ತಿಳಿಸಿದ ಚುನಾವಣಾಧಿಕಾರಿಯೂ ಆಗಿರುವ ಜಿಲ್ಲಾಧಿಕಾರಿ ಸಮೀರ ಶುಕ್ಲಾ, ಒಟ್ಟು ಅಂಚೆ ಮತಗಳಲ್ಲಿ 244 ಮತಗಳು ತಿರಸ್ಕೃತಗೊಂಡಿವೆ ಎಂದು ಹೇಳಿದರು. ಒಟ್ಟು 1,044 ಅಂಚೆ ಮತಗಳಲ್ಲಿ ಬಿಜೆಪಿಗೆ 538, ಕಾಂಗ್ರೆಸ್‌ಗೆ 229, ಆಪ್‌ಗೆ 5, ಪಕ್ಷೇತರ ಅಭ್ಯರ್ಥಿ ಪ್ರಮೋದ ಮುತಾಲಿಕಗೆ 6 ಮತಗಳು ಲಭಿಸಿವೆ ಎಂದರು. ಧಾರವಾಡ ಮತಕ್ಷೇತ್ರದ ಒಟ್ಟು 15,77,344 ಮತಗಳಲ್ಲಿ 10,28,281 ಮತಗಳು ಚಲಾವಣೆಯಾಗಿವೆ. 12,937 ಮತಗಳು ನೋಟಾಗೆ ಲಭಿಸಿವೆ. ಬಿಜೆಪಿ ಅಭ್ಯರ್ಥಿ ಪ್ರಹ್ಲಾದ ಜೋಶಿ 5,45,395 ಮತಗಳನ್ನು ಪಡೆದಿದ್ದರೆ, ಸಮೀಪದ ಅಭ್ಯರ್ಥಿ ಕಾಂಗ್ರೆಸ್‌ನ ವಿನಯ ಕುಲಕರ್ಣಿ 4,31,738 ಮತಗಳನ್ನು ಪಡೆದುಕೊಂಡಿದ್ದಾರೆ. ಒಟ್ಟು 17 ಸುತ್ತಿನಲ್ಲಿ ಮತ ಎಣಿಕೆ ನಡೆಸಲಾಯಿತು. ಮರು ಎಣಿಕೆಗೆ ಯಾವುದೇ ಅಭ್ಯರ್ಥಿ ಮನವಿ ಮಾಡಿಲ್ಲ ಎಂದು ಶುಕ್ಲಾ ಹೇಳಿದರು.