ಮುದಗಲ್: ಪಟ್ಟಣದ ಹೃದಯ ಭಾಗವಾಗಿರುವ ಪ.ಪಂ. ಸುತ್ತ ಮುತ್ತ ಸಾರ್ವಜನಿಕರಿಗೆ ಮೂತ್ರಾಲಯ ಇಲ್ಲದ ಕಾರಣ ಜನರು ಪ.ಪಂ. ನೂತನ ಕಟ್ಟಡದ ಗೋಡೆಯನ್ನು ಬಯಲು ಮೂತ್ರಾಲಯವನ್ನಾಗಿ ಮಾಡಿದ್ದಾರೆ. ನೂತನ ಮೂತ್ರಾಲಯ ಕಟ್ಟಡ ಕಾಮಗಾರಿ ವಿಳಂಬವಾಗಲು ಕಾರಣವೇನು ಎಂದು ಆಗ್ರಹಿಸಿ ಕರವೇ ಕಾರ್ಯಕರ್ತರು ಪ.ಪಂ. ಅಧ್ಯಕ್ಷರಿಗೆ, ಮುಖ್ಯಾಧಿಕಾರಿಗಳಿಗೆ ಮುತ್ತಿಗೆ ಹಾಕಿದರು.
ಕರವೇ ಕಾರ್ಯಕರ್ತರನ್ನುದ್ದೇಶಿಸಿ ಅಧ್ಯಕ್ಷೆ ಶರಣಮ್ಮ ಪಿ. ಮಠ ಮಾತನಾಡಿ, ಸಾರ್ವಜನಿಕ ಮೂತ್ರಾಲಯ ನಿಮಾರ್ಣಕ್ಕೆ ಎಸ್‌ಎಫ್‌ಸಿ ಯೋಜನೆಯಡಿ ರು. 2 ಲಕ್ಷ ಮಂಜೂರು ಮಾಡಿ ಟೆಂಡರ್ ಕಾಮಗಾರಿ ಗುತ್ತಿಗೆ ನೀಡಲಾಗಿದೆ.
ಗುತ್ತಿಗೆದಾರರು ಕಾಮಾಗಾರಿ ಆರಂಭಿಸಿದ್ದಾರೆ. ಕಾಮಗಾರಿ ಸ್ಥಗಿತಕ್ಕೆ ಕಾರಣ ತಿಳಿದಿಲ್ಲ. ಮುಖ್ಯಾಧಿಕಾರಿಗಳನ್ನು ವಿಚಾರಿಸಿದಾಗ ಖಾಸಗಿ ವ್ಯಕ್ತಿಯೊಬ್ಬರು ದೂರು ನೀಡಿದ್ದಾರೆ ಎಂದರು.
ಸಮರ್ಪಕ ಉತ್ತರ ನೀಡದೆ ಮುಖ್ಯಾಧಿಕಾರಿಗಳು ತಡವರಿಸಿದಾಗ ಕಾರ್ಯಕರ್ತರು ಇನ್ನು ನಾಲ್ಕು ದಿನಗಳೊಳಗಾಗಿ ಕಾಮಗಾರಿಯನ್ನು ಪುನಾ ಆರಂಭಿಸಬೇಕು. ಇಲ್ಲದಿದ್ದರೆ ಪಟ್ಟಣ ಪಂಚಾಯಿತಿ ಮುಂಭಾಗದಲ್ಲಿ ಅನಿರ್ಧಿಷ್ಟಾವಧಿ ಧರಣಿ ನಡೆಸುವುದಾಗಿ ಕರವೇ ಅಧ್ಯಕ್ಷ ಎಸ್.ಎ. ನಹಿಂ, ಎಸ್.ಎನ್. ಖಾದ್ರಿ ಮೊದಲಾದವರು ಮುತ್ತಿಗೆಯಲ್ಲಿ ಎಚ್ಚರಿಕೆ ನೀಡಿದರು.
 ಪ್ರತಿಭಟನಕಾರರನ್ನು ಸಮಜಾಸಿದ ಅಧ್ಯಕ್ಷರು ಕಾಮಗಾರಿ ಪುನಾರಂಭಿಸುವ ವ್ಯವಸ್ಥೆ ಮಾಡುವುದಾಗಿ ಭರವಸೆ ನೀಡಿದರು.