ಕ.ಪ್ರ.ವಾರ್ತೆ ್ಣ ತುರುವೇಕೆರೆ ್ಣ ಮಾ.30
ಪ್ರಯಾಣಿಕರನ್ನು ಕರೆ ತರುತ್ತಿದ್ದ ಆಟೋಗೆ ಟ್ರ್ಯಾಕ್ಟರ್ ಡಿಕ್ಕಿ ಹೊಡೆದ ಪರಿಣಾಮ ಒಬ್ಬ ಮೃತಪಟ್ಟು ಮೂವರು ಗಾಯಗೊಂಡಿರುವ ಘಟನೆ ಸಮೀಪದ ಮುದ್ದನಹಳ್ಳಿ ಗೇಟ್ ಬಳಿ ನಡೆದಿದೆ. ಶುಕ್ರವಾರ ರಾತ್ರಿ ಮಾಯಸಂದ್ರದ ಕಡೆಯಿಂದ ಆಟೋದಲ್ಲಿ ತುರುವೇಕೆರೆ ಕಡೆಗೆ ಹಬ್ಬಕ್ಕೆಂದು ಡಿಬಿ ಹಟ್ಟಿಯ ನಿವಾಸಿಗಳು ತೆರಳುತ್ತಿದ್ದರು. ಆ ವೇಳೆ ತಾಲೂಕಿನ ಮುದ್ದನಹಳ್ಳಿ ಸಮೀಪ ಕತ್ತಲೆಯಲ್ಲಿ ರಭಸವಾಗಿ ಬರುತ್ತಿದ್ದ ಟ್ರ್ಯಾಕ್ಟರ್ ಒಂದು ಆಟೋಗೆ ಡಿಕ್ಕಿ ಹೊಡೆಯಿತು. ಪರಿಣಾಮವಾಗಿ ಆಟೋದಲ್ಲಿದ್ದ ನಂದೀಶ್, ರಾಮಕೃಷ್ಣಯ್ಯ, ತಿಮ್ಮಯ್ಯ ಹಾಗೂ ನರಸಿಂಹಯ್ಯನವರಿಗೆ ಪೆಟ್ಟು ಬಿದ್ದಿತ್ತು. ಡಿಕ್ಕಿ ಹೊಡೆದ ತರುವಾಯ ಟ್ರ್ಯಾಕ್ಟರ್ ಚಾಲಕ ವಾಹನವನ್ನು ನಿಲ್ಲಿಸದೇ ಕತ್ತಲಿನಲ್ಲಿ ಪರಾರಿಯಾದ. 108 ಸಹಾಯದಿಂದ ಸ್ಥಳೀಯ ಸರ್ಕಾರಿ ಆಸ್ಪತ್ರೆಗೆ ಗಾಯಾಳುಗಳನ್ನು ಕರೆತರಲಾಯಿತು.
 ಪ್ರಥಮ ಚಿಕಿತ್ಸೆ ನೀಡಿ ಹೆಚ್ಚಿನ ಚಿಕಿತ್ಸೆಗಾಗಿ ಬೆಳ್ಳೂರು ಆದಿಚುಂಚನಗಿರಿ ಆಸ್ಪತ್ರೆಗೆ ದಾಖಲು ಮಾಡಲು ಶಿಫಾರಸು ಮಾಡಲಾಗಿತ್ತು. ದಾರಿ ಮಧ್ಯೆ ತೀವ್ರವಾಗಿ ಗಾಯಗೊಂಡಿದ್ದ ರಾಮಕೃಷ್ಣ ಕೊನೆಯುಸಿರೆಳೆದರು. ಗಾಯಗೊಂಡಿರುವ ತಿಮ್ಮಯ್ಯ, ನರಸಿಂಹಯ್ಯ ಹಾಗೂ ನಂದೀಶ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.  ಸ್ಥಳೀಯ ಪೋಲಿಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.