ಚಿಕ್ಕನಾಯಕನಹಳ್ಳಿ: ಅವಕಾಶ ವಂಚಿತರಾಗಿರುವ ಗ್ರಾಮೀಣ ಪ್ರತಿಭೆಗಳು ಬೆಳಕಿಗೆ ಬರಲು ದಿವ್ಯಜ್ಯೋತಿ ಕಲಾಸಂಘದಂತಹ ವೇದಿಕೆಗಳು ಬಹಳ ಉಪಯುಕ್ತ ಎಂದು ಕಿರುತೆರೆ ನಟ ಜೀವನ್ ನುಡಿದರು.
ಪಟ್ಟಣದಲ್ಲಿ ಆಷಾಢ-ಏಕಾದಶಿ ರಥೋತ್ಸವದ ಪ್ರಯುಕ್ತ ದಿವ್ಯಜ್ಯೋತಿ ಕಲಾಸಂಘ ಏರ್ಪಡಿಸಿದ್ದ ನವದಂಪತಿ ಸ್ಪರ್ಧೆಯ ಸಮಾರಂಭದಲ್ಲಿ ಮಾತನಾಡುತ್ತಿದ್ದರು. ಇಂದಿಗೂ ಹಳ್ಳಿಗಳಲ್ಲಿ ಅನೇಕ ಬಹುಮುಖ ಪ್ರತಿಭೆಗಳಿವೆ.ಅವರಿಗೆ ಸೂಕ್ತವಾದ ವೇದಿಕೆಗಳು ಸಿಗದೆ ಅವಕಾಶ ವಂಚಿತರಾಗಿ ಮುರುಟಿ ಹೋಗುತ್ತಿವೆ. ದಿವ್ಯಜ್ಯೋತಿ ಕಲಾ ಸಂಘದಂತಹ ವೇದಿಕೆಗಳು ಸಿಕ್ಕಲ್ಲಿ ಅವರು ಎತ್ತರಕ್ಕೆ ಬೆಳೆಯಬಹುದು.
ಸಾಮರಸ್ಯ: ಬಹುಮಾನ ವಿತರಿಸಿ ಮಾತನಾಡಿದ ಶಾಸಕ ಸಿ.ಬಿ. ಸುರೇಶ್ ಬಾಬು,  ಶರಣರು ನುಡಿದಂತೆ ಸತಿ-ಪತಿಗಳೊಂದಾದ ಭಕ್ತಿ ಹಿತವಪ್ಪುದು. ಗಂಡ ಹೆಂಡತಿ ಸಾಮರಸ್ಯದ ಜೀವನ ಕುಟುಂಬ ಏಳಿಗೆಗೆ ಸಹಕಾರಿ. ಬಾಳನೌಕೆಯಲ್ಲಿ, ಸಂಸಾರವೆಂಬ ಸಾಗರವ ದಾಟಲು ಬಾಳಪಯಣ ಸಮರಸದಿಂದ ಕೂಡಿರಬೇಕು ಎಂದರು.
ಸಂಘದ ಅಧ್ಯಕ್ಷ ಸಿ.ಡಿ. ಚಂದ್ರಶೇಖರ್ ಮಾತನಾಡಿ, ಇಲ್ಲಿನ ಸಾಹಿತ್ಯ ಮತ್ತು ಜಾನಪದ ರಂಗಗಳಿಗೆ ಸೂಕ್ತ ಸ್ಥಳಾವಕಾಶದ ಕೊರತೆಯಿದೆ. ಆದ್ದರಿಂದ ಇದೀಗ ನಿರ್ಮಾಣಗೊಳ್ಳುತ್ತಿರುವ ತೀನಂಶ್ರೀ ಭವನದ ಜೊತೆಗೆ ಜಾನಪದ ಕಲಾಭವನವನ್ನು ಸಹ ನಿರ್ಮಿಸಿದರೆ, ತಾಲೂಕಿನಲ್ಲಿ ನೂರಾರು ಜಾನಪದ ಕಲಾವಿದರಿಗೆ ಅನುಕೂಲವಾಗುತ್ತದೆ ಎಂದರು.
  ಸ್ಪರ್ಧೆಯಲ್ಲಿ ಪ್ರಥಮ ಬಹುಮಾನ ಪಡೆದ ಜೋಡಿಗೆ ಶಾಸಕರು ಡ್ರೆಸ್ಸಿಂಗ್ ಟೇಬಲ್ ಪ್ರಥಮ ಬಹುಮಾನವಾಗಿ ನೀಡಿದರು.
  ಸ್ಪರ್ಧೆಯಲ್ಲಿ 48 ಜೋಡಿ ನವದಂಪತಿಗಳು ಭಾಗವಹಿಸಿದ್ದರು. ವೈರಲ್ ಪೂಲ್ ವ್ಯವಸ್ಥಾಪಕ ವಿಜಯ ವಿ ಶೆಟ್ಟಿ ಕಾರ್ಯಕ್ರಮ ಉದ್ಘಾಟಿಸಿದರು.  ಗೌರವಾಧ್ಯಕ್ಷ ಗುರುಲಿಂಗಯ್ಯ, ತಹಶೀಲ್ದಾರ್ ಕಾಮಾಕ್ಷಮ್ಮ, ಪಿಎಸ್ ಐ ಮಹಾಲಕ್ಷ್ಮಮ್ಮ ಮುಂತಾದವರಿದ್ದರು.