ಹೈದರಾಬಾದ್‌: ಲೋಕಸಭೆ ಚುನಾವಣೆ ನಂತರ ಕೇಂದ್ರದಲ್ಲಿ ಸರ್ಕಾರ ರಚಿಸುವ ಅವಕಾಶ ಒದಗಿಬಂದರೆ ಪ್ರಾದೇಶಿಕ ಪಕ್ಷಗಳ ಪ್ರಸ್ತಾವಿತ ಫೆಡರಲ್ ಫ್ರಂಟ್ ಕಾಂಗ್ರೆಸ್ ಬೆಂಬಲ ಪಡೆಯಲು ಸಿದ್ಧವಿದೆ. ಆದರೆ ಅದು ಚಾಲಕನ ಸ್ಥಾನವನ್ನು ಕೇಳಬಾರದು ಎಂದು ಟಿಆರ್‌ಎಸ್‌ ಮಂಗಳವಾರ ಹೇಳಿದೆ.

ಟಿಆರ್ ಎಸ್ ಮುಖ್ಯಸ್ಥ ಹಾಗೂ ತೆಲಂಗಾಣ ಮುಖ್ಯಮಂತ್ರಿ ಕೆ ಚಂದ್ರಶೇಖರ ರಾವ್‌ ಅವರು ಕಾಂಗ್ರೆಸ್ ಹಾಗೂ ಬಿಜೆಪಿಯೇತರ ಪ್ರಾದೇಶಿಕ ಪಕ್ಷಗಳ ಫೆಡರಲ್ ಫ್ರಂಟ್ ರಚನೆಗಾಗಿ ಕಳೆದ ಒಂದು ವರ್ಷದಿಂದ ಯತ್ನಿಸುತ್ತಿದ್ದಾರೆ. ಈಗಲೂ ತಮ್ಮ ಪ್ರಯತ್ನ ಮುಂದುವರೆಸಿರುವ ಕೆಎಸ್ ಆರ್ ಅವರು ಹಲವು ಪ್ರಾದೇಶಿಕ ಪಕ್ಷಗಳ ಮುಖ್ಯಸ್ಥರನ್ನು ಭೇಟಿ ಮಾಡಿ ಚರ್ಚಿಸುತ್ತಿದ್ದಾರೆ.

ಈ ಮಧ್ಯೆ, ಕೇಂದ್ರದಲ್ಲಿ ಫೆಡರಲ್‌ ಫ್ರಂಟ್‌ ಸರ್ಕಾರ ರಚಿಸುವ ಅವಕಾಶ ಒದಗಿದಲ್ಲಿ, ನಮ್ಮ ಪಕ್ಷ ರಾಹುಲ್‌ ಗಾಂಧಿ ಅವರ ಬೆಂಬಲ ಪಡೆಯಲು ಮುಕ್ತವಾಗಿದೆ ಎಂದು ಟಿಆರ್‌ಎಸ್‌ ವಕ್ತಾರ ಅಬೀದ್‌ ರಸೂಲ್‌ ಖಾನ್‌ ಅವರು ಹೇಳಿದ್ದಾರೆ.

ಕೇಂದ್ರದಲ್ಲಿ ಯಾವುದೇ ಪಕ್ಷಕ್ಕೂ ಸ್ಪಷ್ಟ ಬಹುಮತ ಬರದಿದ್ದರೆ ಕಾಂಗ್ರೆಸ್ ಬೆಂಬಲದೊಂದಿಗೆ ಫೆಡರಲ್ ಫ್ರಂಟ್ ಸರ್ಕಾರ ರಚಿಸಲು ಸಿದ್ಧವಿದೆ. ಆದರೆ ಫೆಡರಲ್‌ ಫ್ರಂಟ್‌ ಡ್ರೈವರ್‌ ಸೀಟಿನಲ್ಲಿದ್ದುಕೊಂಡು ಸರ್ಕಾರ ನಡೆಸಬೇಕು ಎಂಬ ದೃಢ ಅಭಿಪ್ರಾಯದ ಕೆಸಿಆರ್‌ ಅವರದ್ದಾಗಿದೆ ಎಂದು ಖಾನ್‌ ತಿಳಿಸಿದ್ದಾರೆ.

ಇದೇ ವೇಳೆ, ಫೆಡರಲ್ ಫ್ರಂಟ್ ಯಾವುದೇ ಕಾರಣಕ್ಕೂ ಬಿಜೆಪಿಯೊಂದಿಗೆ ಕೈಜೋಡಿಸುವುದಿಲ್ಲ ಎಂದು ಖಾನ್ ಸ್ಪಷ್ಟಪಡಿಸಿದ್ದಾರೆ.