ಬೆಂಗಳೂರು: ಅಮೆರಿಕ ಮೂಲದ ಸ್ನ್ಯಾಪ್ ಫಿಟ್ನೆಸ್ ಸಂಸ್ಥೆ ತನ್ನ ಕಾರ್ಯಾಚರಣೆಗಳನ್ನು ವಿಸ್ತರಿಸುತ್ತಿರುವ ಬೆನ್ನಲ್ಲೇ ಬೆಂಗಳೂರು ಮೂಲದ ಚಿಸೆಲ್ ಫಿಟ್ನೆಸ್ ಸಹ ದೇಶಾದ್ಯಂತ ತನ್ನ ಶಾಖೆಗಳನ್ನು ವಿಸ್ತರಿಸಲಿದೆ.
ಚಿಸೆಲ್ ಫಿಟ್ನೆಸ್ ಜಿಮ್ ನಲ್ಲಿ ಕ್ರಿಕೆಟ್ ಆಟಗಾರ ವಿರಾಟ್ ಕೊಹ್ಲಿ ಶೇ.30 ಬಂಡವಾಳ ಹೂಡಿಕೆ ಮಾಡಿದ್ದು 2018 ರ ವೇಳೆಗೆ ದೇಶಾದ್ಯಂತ 100 ಶಾಖೆಗಳನ್ನು ಪ್ರಾರಂಭಿಸುವ ಗುರಿ ಹೊಂದಿದೆ. ಪ್ರತಿಯೊಂದು ಶಾಖೆಯ ಪ್ರಾರಂಭಕ್ಕೂ ಸುಮಾರು 2 ಕೋಟಿ ರೂಪಾಯಿ ಖರ್ಚು ಮಾಡಲು ಚಿಸೆಲ್ ಫಿಟ್ನೆಸ್ ಜಿಮ್ ನಿರ್ಧರಿಸಿದೆ.
ಬೆಂಗಳೂರು, ಆಂಧ್ರಪ್ರದೇಶಗಳಲ್ಲಿ ಈಗಾಗಲೆ ನಮ್ಮ ಫಿಟ್ನೆಸ್ ಕೇಂದ್ರಗಳಿದ್ದು, ಶೀಘ್ರವೇ ದೆಹಲಿ, ಮುಂಬೈ, ಗುವಾಹಟಿ, ಇಂದೋರ್, ಚೆನ್ನೈ ನಲ್ಲಿ ಫಿಟ್ನೆಸ್ ಕೇಂದ್ರಗಳನ್ನು ಪ್ರಾರಂಭ ಮಾಡಲಿದ್ದೇವೆ, ದೇಶದಲ್ಲಿ ಮಾತ್ರವಲ್ಲದೇ ಶ್ರೀಲಂಕಾ, ಯುಎಇ ಗಳಲ್ಲೂ ಫಿಟ್ನೆಸ್ ಕೇಂದ್ರಗಳನ್ನು ಪ್ರಾರಂಭಿಸಲು ಚಿಂತನೆ ನಡೆಸಿದ್ದೇವೆ ಎಂದು ಚಿಸೆಲ್ ಫಿಟ್ನೆಸ್ ನ ಸಹ ಸಂಸ್ಥಾಪಕ ಸತ್ಯ ಸಿನ್ಹ ತಿಳಿಸಿದ್ದಾರೆ.  
ಕ್ಯಾಲಿಫೋರ್ನಿಯಾ ಮೂಲದ ಸಂಸ್ಥೆಯೊಂದಿಗೆ ಚಿಸೆಲ್ ಫಿಟ್ನೆಸ್ ಸಂಸ್ಥೆ ಸಹಯೋಗ ಹೊಂದಿದೆ. ಬ್ಯುಸಿನೆಸ್ ಟು ಬ್ಯುಸಿನೆಸ್ ಮಾದರಿಯಲ್ಲಿ ಪ್ರಾರಂಭವಾದ ಚಿಸೆಲ್ ಫಿಟ್ನೆಸ್ ಕಂಪನಿಗಳಲ್ಲಿ ಜಿಮ್ ಪ್ರಾರಂಭಿಸಿತ್ತು. ಈಗ ದೇಶಾದ್ಯಂತ ಸುಮಾರು 195 ಜಿಮ್ ಗಳನ್ನು ಚಿಸೆಲ್ ಫಿಟ್ನೆಸ್ ನಡೆಸುತ್ತಿದೆ.