ಬೆಂಗಳೂರು: ಬೆಂಗಳೂರು ರೈಲ್ವೆ ವಿಭಾಗದ ಅಡಿಯಲ್ಲಿ ಬರುವ ಪ್ರಮುಖ ರೈಲ್ವೆ ನಿಲ್ದಾಣಗಳಲ್ಲಿ ಮಕ್ಕಳ ಆಹಾರ ಶನಿವಾರದಿಂದ ದೊರಕಲಿದೆ.

ಮಕ್ಕಳನ್ನು ಮತ್ತು ಶಿಶುಗಳನ್ನು ಕರೆದುಕೊಂಡು ರೈಲುಗಳಲ್ಲಿ ಪ್ರಯಾಣಿಸುವ ಪೋಷಕರಿಗೆ ಅನುಕೂಲವಾಗುವ ದೃಷ್ಟಿಯಿಂದ ರೈಲ್ವೆ ಇಲಾಖೆ ಈ ಅನುಕೂಲ ಒದಗಿಸಿಕೊಟ್ಟಿದ್ದು, ಬಿಸಿ ಹಾಲು, ನೀರು, ಮಕ್ಕಳಿಗೆ ಬೇಕಾಗುವ ಇತರ ಆಹಾರ ಪದಾರ್ಥಗಳು ದೊರಕಲಿವೆ.

ಬೆಂಗಳೂರು ನಗರದ ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ(ಸಿಟಿ ರೈಲ್ವೆ ಸ್ಟೇಷನ್), ಯಶವಂತಪುರ, ಕಂಟೋನ್ಮೆಂಟ್, ಕೆ.ಆರ್.ಪುರಂ, ವೈಟಿಫೀಲ್ಡ್, ಬೈಯಪ್ಪನಹಳ್ಳಿ, ಮಂಡ್ಯ, ಹೊಸೂರು, ಬಂಗಾರಪೇಟೆ ಮತ್ತು ರಾಮನಗರ ನಿಲ್ದಾಣಗಳಲ್ಲಿ ಪ್ರಯಾಣಿಕರಿಗೆ ಈ ಸೌಲಭ್ಯ ದೊರಕಲಿದೆ ಎಂದು ಹಿರಿಯ ವಲಯ ವಾಣಿಜ್ಯ ವ್ಯವಸ್ಥಾಪಕ ಎನ್.ಆರ್.ಶ್ರೀಧರಮೂರ್ತಿ ತಿಳಿಸಿದ್ದಾರೆ.

ಪಾಂಟ್ರಿ ಕಾರಿನಲ್ಲಿ ಬಿಸಿ ನೀರು ಒದಗಿಸುವಂತೆ ಕೂಡ ನಾವು ಸೂಚನೆ ನೀಡಿದ್ದೇವೆ. ಇದರಿಂದ ಸುಲಭವಾಗಿ ಶಿಶು ಆಹಾರ ತಯಾರಿಸಹಬಹುದು. ಸೆರ್ಲೆಕ್, ನೆಸ್ಲೆ, ಕಾಂಪ್ಲೇನ್ ಮೊದಲಾದ ಆಹಾರ ಪದಾರ್ಥಗಳು ಸಿಗಲಿವೆ.