ಬೆಂಗಳೂರು: ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ)ನಲ್ಲಿ ನಿವೇಶನದ ಕನಸು ಕಾಣುತ್ತಿರುವ ಕರ್ನಾಟಕತೇರರಿಗೆ ಸಿಹಿಸುದ್ದಿಯೊಂದಿದ್ದು, ಬಿಡಿಎ ತನ್ನ ನಿಯಮಾವಳಿಗಳನ್ನು ಇದೀಗ  ಸಡಿಲಗೊಳಿಸಿದೆ.

ಬಿಡಿಎ ನಿರ್ಮಿತ ನಿವೇಶನಗಳನ್ನು ಮಾರುವ ನಿಟ್ಟಿನಲ್ಲಿ ಮತ್ತು ಗ್ರಾಹಕರನ್ನು ಆಕರ್ಷಿಸುವ ನಿಟ್ಟಿನಲ್ಲಿ ಬಿಡಿಎ ತನ್ನ ನಿಯಮಾವಳಿಯಲ್ಲಿ ಮಹತ್ತರ ಬದಲಾವಣೆ ಮಾಡಿಕೊಂಡಿದ್ದು, ಈ ಹಿಂದೆ ಇದ್ದ  ಕರ್ನಾಟಕೇತರ ಅರ್ಜಿದಾರರು ಕಡ್ಡಾಯವಾಗಿ 15 ವರ್ಷ ಕರ್ನಾಟಕದ ನಿವಾಸಿಗಳಾಗಿರಬೇಕು ಎಂಬ ನಿಯಮವನ್ನು ಸಡಿಲಗೊಳಿಸಿದ್ದಾರೆ. 15 ವರ್ಷಗಳ ಬದಲಿಗೆ ಇದೀಗ 5 ವರ್ಷ  ಅರ್ಜಿದಾರರು ಕರ್ನಾಟಕದಲ್ಲಿದ್ದರೆ ಸಾಕು ಅವರು ನಿವೇಶನ ಪಡೆಯಲು ಅರ್ಹರು ಎಂದು ಬಿಡಿಎ ತಿಳಿಸಿದೆ. ಕರ್ನಾಟಕದಲ್ಲಿ ಐದು ವರ್ಷದಿಂದ ವಾಸಿಸುತ್ತಿರುವ ಕುರಿತು ದಾಖಲೆ ಸಮೇತ ಅರ್ಜಿ  ಸಲ್ಲಿಸಬೇಕು ಎಂದು ಬಿಡಿಎ ಹೇಳಿದೆ.

ಈ ಬಗ್ಗೆ ಮಾತನಾಡಿರುವ ಬಿಡಿಎ ಹಿರಯ ಅಧಿಕಾರಿಯೊಬ್ಬರು, ಕರ್ನಾಟಕೇತರರು ನಿವೇಶನ ಕೊಳ್ಳಲು ಇರುವ ನಿಯಮಾವಳಿಯನ್ನು ಸಡಿಲಗೊಳಿಸಲು ನಿರ್ಧರಿಸಲಾಗಿದ್ದು, 15 ರ ಬದಲಾಗಿ 5  ವರ್ಷಕ್ಕೆ ಅವಧಿಯನ್ನು ಇಳಿಕೆ ಮಾಡಲಾಗುತ್ತದೆ ಎಂದು ತಿಳಿಸಿದರು.

ಮತ್ತೋರ್ವ ಬಿಡಿಎ ಹಿರಿಯ ಅಧಿಕಾರಿಯ ಪ್ರಕಾರ ನಿವೇಶನಕ್ಕಾಗಿ ಈ ಬಾರಿ 777 ಕರ್ನಾಟಕೇತರ ಅರ್ಜಿಗಳು ಬಂದಿವೆ ಎಂದು ಹೇಳಿದ್ದಾರೆ. ದೊಡ್ಡಬನಹಳ್ಳಿ, ಆಲೂರು, ಕಣ್ಮಿಣಿಕೆ,  ವಲಗೇರಹಳ್ಳಿ, ಮಲಗಾಲ ಮತ್ತು ಕೊಮ್ಮಘಟದಲ್ಲಿ ಬಿಡಿಎ ನಿರ್ಮಿಸಿರುವ 3280 ಫ್ಲಾಟ್ ಗಳಿಗಾಗಿ ಒಟ್ಟು 777 ಅರ್ಜಿಗಳು ಮಾತ್ರ ಬಂದಿವೆ ಎಂದು ಹೇಳಿದ್ದಾರೆ. ಈ ಫ್ಲ್ಯಾಟ್ ಗಳ ಮಾರಾಟಕ್ಕೆ ಈ  ಹಿಂದೆಯೂ ಅರ್ಜಿ ಆಹ್ವಾನಿಸಲಾಗಿತ್ತು. ಆದರೆ ಅರ್ಜಿದಾರರಿಂದ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು.