ಮೈಸೂರು: ದಸರಾ ಮಹೋತ್ಸವದ ಅಂಗವಾಗಿ ನಡೆದ ರಾಜ್ಯ ಹಾಗೂ ಅಖಿಲ ಭಾರತ ಕುಸ್ತಿ ಚಾಂಪಿಯನ್ ಷಿಪ್ ನ 75 ಕೆಜಿ ಮೇಲಿನವರ ವಿಭಾಗದಲ್ಲಿ ಬೆಂಗಳೂರಿನ ಎಂಇಜಿಯ ಪಾಂಡುರಂಗ ಶಿಂಧೆ ದಸರಾ ಕಂಠೀರವ ಗೌರವ ಪಡೆದಿದ್ದಾರೆ.

ದೇವರಾಜ ಅರಸು ವಿವಿಧೋದ್ದೇಶ ಕ್ರೀಡಾಂಗಣದ ಅಖಾಡದಲ್ಲಿ ಬೆಳಗಾವಿಯ ಮರಾಠಾ ಲೈಟ್ ಇನ್ಫೆಂಟ್ರಿಯ ಆನಂದ್ ಹೊಳೆ ಹಡಗಲಿ ಹಾಗೂ ಪಾಂಡುರಂಗ ಶಿಂಧೆ ನಡುವಿನ ಜಿದ್ದಾಜಿದ್ದಿನ ಪೈಪೋಟಿಯು ಕುಸ್ತಿ ಪ್ರಿಯರಿಗೆ ರಸದೌತಣ ನೀಡಿತು.

ಪಾಂಡುರಂಗ ಅವರ ಹಾಕಿದ ಪಟ್ಟನ್ನು ಬಿಡಿಸಿಕೊಳ್ಳಲು ಆನಂದ್ ಅವರಿಗೆ ಸಾಧ್ಯವಾಗದೆ ಪಾಂಡುರಂಗರಿಗೆ ಶರಣಾದರು. ಇನ್ನು ಧಾರವಾಡದ ರಿಯಾಜ್ ಮುಲ್ಲಾ ಹಾಗೂ ದಾವಣಗೆರೆಯ ಕಿರಣ್ ಮೂರನೇ ಸ್ಥಾನ ಗಳಿಸಿದ್ದಾರೆ.

ಇನ್ನು ಅಖಿಲ ಭಾರತ ಕುಸ್ತಿ ಚಾಂಪಿಯನ್ ಷಿಪ್ ನಲ್ಲಿ ಗಮನಾರ್ಹ ಸಾಧನೆ ಮಾಡಿದ ಎಂಇಜಿಯ ಗೋಪಾಲ ಕೋಳಿ ಅತ್ಯುತ್ತಮ ಕುಸ್ತಿಪಟು ಶ್ರೇಯಕ್ಕೆ ಪಾತ್ರರಾದರು.