ಬೆಂಗಳೂರು:ಇದೊಳ್ಳೆ ರಾಮಾಯಣ ಚಿತ್ರದ ಪ್ರಚಾರದ ವೇಳೆ ಕಾವೇರಿ ವಿವಾದದ ಕುರಿತು ಮಾಧ್ಯಮ ನಿರೂಪಕಿಯೊಬ್ಬರು ಕೇಳಿದ ಪ್ರಶ್ನೆಗೆ ನಟ, ಬಹುಭಾಷಾ ನಟ ಪ್ರಕಾಶ್ ರೈ ಅಸಮಾಧಾನಗೊಂಡಿದ್ದಾರೆ. 

ಚಿತ್ರದ ಬಗ್ಗೆ ಕುರಿತು ಪ್ರಕಾಶ್ ರೈ ಅವರನ್ನು ಸಂದರ್ಶಿಸುತ್ತಿದ್ದ ಖಾಸಗಿ ಸುದ್ದಿ ವಾಹಿನಿಯನಿರೂಪಕಿ, ತಮಿಳುನಾಡು-  ಕರ್ನಾಟಕದ ನಡುವಿನ ಕಾವೇರಿ ವಿವಾದದ ಬಗ್ಗೆ ಪ್ರಶ್ನಿಸಿದ್ದಾರೆ, ಆದರೆ ಕಾವೇರಿ ವಿವಾದದ ಬಗ್ಗೆ ಮಾತನಾಡಲು ನಿರಾಕರಿಸಿದ ಪ್ರಕಾಶ್ ರೈ, ನಾನು ಇಲ್ಲಿ ಬಂದಿರುವುದು ಇದೊಳ್ಳೆ ರಾಮಾಯಣ ಚಿತ್ರದ ಪ್ರಚಾರಕ್ಕಾಗಿ, ಕಾವೇರಿ ವಿಚಾರವನ್ನು ಮಾತನಾಡಲು ಅಲ್ಲ ಎಂದಿದ್ದಾರೆ. ಅಲ್ಲದೆ ಕಾವೇರಿ ವಿವಾದ ಸಂಕೀರ್ಣವಾದ ವಿವಾದವಾಗಿದ್ದು ಎಲ್ಲಾ ಕಾರ್ಯಕ್ರಮಗಳಲ್ಲಿಯೂ ಮಾತನಾಡಲು ಸಾಧ್ಯವಿಲ್ಲ, ಜನರು ಈಗಾಗಲೇ ಕೋಪದಲ್ಲಿದ್ದಾರೆ, ನೋವಿನಲ್ಲಿದ್ದಾರೆ ಇಂತಹ ಸಂದರ್ಭದಲ್ಲಿ ಸಿನಿಮಾ ನಟರಿಂದ ಕಾವೇರಿ ವಿವಾದದ ಬಗ್ಗೆ ಹೇಳಿಕೆ ಪಡೆಯುವುದರಿಂದ ಉಂಟಾಗುವ ಲಾಭವೇನು ಎಂದು ಪ್ರಶ್ನಿಸಿದ್ದಾರೆ. ಮುಂದುವರೆದು ಪ್ರಶ್ನೆ ಮಾಡಿದ ಮಾಧ್ಯಮದ ನಿರೂಪಕಿ ಬಗ್ಗೆ ಪ್ರಕಾಶ್ ರೈ ಅಸಮಾಧಾನಗೊಂಡಿದ್ದು, ನಿಮಗೆ ವಿವಾದಾತ್ಮಕ ಸುದ್ದಿಗಳೇ ಬೇಕಾ? ಎಂದು ಸಂದರ್ಶನದ ಮಧ್ಯಭಾಗದಲ್ಲೇ ಎದ್ದು ಹೊರನಡೆಡ್ಡಿದ್ದಾರೆ.