ಶಿವಮೊಗ್ಗ: ಮದುವೆಗೆ ತೆರಳುತ್ತಿದ್ದ 7 ಯುವಕರು ಅಪಘಾತದಿಂದಾಗಿ ಸ್ಥಳದಲ್ಲೇ ಸಾವನ್ನಪ್ಪಿರುವ ಘಟನೆ ಸಿಂಹಧಾಮ ಹತ್ತಿರದ ಮುದ್ದಿನಕೊಪ್ಪ ಬಳಿ ಬುಧವಾರ ತಡರಾತ್ರಿ ನಡೆದಿದೆ.

ಬೆಂಗಳೂರಿನಿಂದ ಸಾಗರಕ್ಕೆ ತೆರಳಿದ್ದ ಇನ್ನೋವಾ ಕಾರು, ಮರದ ದಿಮ್ಮಿಗಳನ್ನು ತುಂಬಿದ ಲಾರಿಗೆ ಹಿಂಬದಿಯಿಂದ ಢಿಕ್ಕಿ ಹೊಡೆದಿದೆ. ಈ ವೇಳೆ ಲಾರಿಯಲ್ಲಿದ್ದ ದೊಡ್ಡ ದೊಡ್ಡ ಮರದ ದಿಮ್ಮಿಗಳು ಕಾರಿನ ಮೇಲೆ ಬಿದ್ದು ಇನ್ನೋವಾ ಕಾರು  ಸಂಪೂರ್ಣ ನಜ್ಜುಗುಜ್ಜಾಗಿ ಹೋಗಿದೆ. ಕಾರಿನಲ್ಲಿದ್ದ ಚಾಲಕ ಸೇರಿದಂತೆ ಎಲ್ಲರೂ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.

ಮಾಗಡಿ ಮೂಲದ ಮಧು, ಪ್ರವೀಣ್‌ ಎಂಬ ಸಹೋದರರು, ಶಿಕಾರಿಪುರದ ರಾಘವೇಂದ್ರ, ಚೋರಡಿ ಮಂಜುನಾಥ್‌ ,‌ ಬೆಂಗಳೂರಿನ ಶ್ರೀಧರ್‌ ಮತ್ತು ಸೊರಬ ಮೂಲದ ರಾಜಶೇಖರ್‌ ಮೃತ ದುರ್ದೈವಿಗಳು. ಸಾಗರದಲ್ಲಿ ಸ್ನೇಹಿತನ ಮದುವೆಗಾಗಿ ತೆರಳಿದ್ದರು ಎಂದು ತಿಳಿದು ಬಂದಿದೆ. ಸ್ಥಳದಲ್ಲಿ 3 ಗಂಟೆಗಳ ಕಾಲ ಕಾರ್ಯಾಚರಣೆ ನಡೆಸಿ ಮೃತ ದೇಹಗಳನ್ನು ಹೊರಗೆ ತೆಗೆಯಲಾಗಿದೆ.