ಬೆಂಗಳೂರು: ಉಸಿರಾಟ ಸಮಸ್ಯೆಯಿಂದಾಗಿ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದ ಪರಿಸರ ಪ್ರೇಮಿ ಸಾಲು ಮರದ ತಿಮ್ಮಕ್ಕ ಅವರು ಗುರುವಾರ ಆಸ್ಪತ್ರೆಯಿಂದ ಬಿಡುಗಡೆಗೊಂಡಿದ್ದು, ಚಿಕಿತ್ಸಾ ವೆಚ್ಚ ಕುರಿತಂತೆ ಸುಳ್ಳು ಹೇಳಿಕೆ ನೀಡಿದ್ದ ಸಚಿವರು ಕ್ಷಮೆಯಾಚಿಸುವಂತೆ ಆಗ್ರಹಿಸಿದ್ದಾರೆ. 

ಕೆಲ ದಿನಗಳ ಹಿಂದಷ್ಟೇ ಅನಾರೋಗ್ಯದಿಂದಾಗಿ ಸಾಲ ಮರದ ತಿಮ್ಮಕ್ಕ ಅವರು ಜಯನಗರದಲ್ಲಿರುವ ಅಪೊಲೋ ಸ್ಪೆಷಾಲಿಟಿ ಆಸ್ಪತ್ರೆಗೆ ದಾಖಲಾಗಿದ್ದರು. ಇದೀಗ ತಿಮ್ಮಕ್ಕ ಅವರ ಆರೋಗ್ಯದಲ್ಲಿ ಚೇತರಿಕೆ ಕಂಡು ಬಂದಿದ್ದು, ನಿನ್ನೆ ಆಸ್ಪತ್ರೆಯಿಂದ ಬಿಡುಗಡೆಗೊಂಡಿದ್ದಾರೆ. ಆಸ್ಪತ್ರೆಯ ವೆಚ್ಚ ರೂ.66.000 ಆಗಿದ್ದು ರಾಜ್ಯಸಭಾ ಸಂಸದರು ವೆಚ್ಚವನ್ನು ಭರಿಸಿದ್ದಾರೆಂದು ತಿಳಿದುಬಂದಿದೆ. 

ತಿಮ್ಮಕ್ಕ ಅವರ ಪುತ್ರ ಉಮೇಶ್ ಅವರು ಮಾತನಾಡಿ, ಅಭಿಮಾನಿಗಳು, ಪರಿಸರ ಪ್ರೇಮಿಗಳು ಹಾಗೂ ಇತರೆ ನಾಗರೀಕರು ತಿಮ್ಮಕ್ಕ ಅವರ ಗೌರವಯುತವಾಗಿ ಜೀವನ ನಡೆಸಬೇಕೆಂಬುದನ್ನು ಬಯಸುತ್ತಾರೆ. ಸರ್ಕಾರ ನೀಡುವ ಹಣದಿಂದಲ್ಲ. ಆಸ್ಪತ್ರೆಯ ಆಡಳಿತಮಂಡಳಿಯವರೇ ಚಿಕಿತ್ಸಾ ವೆಚ್ಚದಲ್ಲಿ ರಿಯಾಯಿತಿ ಆಕೆ ಗುಣಮುಖರಾಗಲಿ ಎಂದು ಕೋರಿದ್ದರು. 

ರಾಜ್ಯ ಸರ್ಕಾರ ನೀಡಿರುವ ಹೇಳಿಕೆಯಿಂದ ತಿಮ್ಮಕ್ಕ ಅವರ ಮನಸ್ಸಿಗೆ ಬಹಳ ನೋವಾಗಿದೆ. ತಪ್ಪು ಹೇಳಿಕೆ ಕುರಿತಂತೆ ಸಚಿವರು ಕ್ಷಮೆಯಾಚಿಸುವವರೆಗೂ ತಿಮ್ಮಕ್ಕ ಅವರು ಸರ್ಕಾರ ನೀಡುವ ಯಾವುದೇ ಹಣದ ಸಹಾಯವನ್ನು ಪಡೆಯುವುದಿಲ್ಲ. ಸರ್ಕಾರ ಒಂದು ವೇಳೆ ಆಕೆಗೆ ಹಣವನ್ನು ನೀಡುವುದಾದರೆ, ಚಿಕಿತ್ಸಾ ವೆಚ್ಚವನ್ನು ಭರಿಸಲು ಇಚ್ಛಿಸಿದ್ದೇ ಆದರೆ, ನೇರವಾಗಿ ಹಾಗೂ ಪಾರದರ್ಶಕವಾಗಿ ಮಾಡಲಿ. ತಪ್ಪು ಹೇಳಿಕೆ ನೀಡುವುದು ಬೇಡ ಎಂದಿದ್ದಾರೆ. 

ನಗರ ಸಂರಕ್ಷಕ ವಿಜಯ್ ನಿಶಾಂತ್ ಮಾತನಾಡಿ, ತಿಮ್ಮಕ್ಕಳ ಅವರು ಶೀಘ್ರಗತಿಯಲ್ಲಿ ಗುಣಮುಖರಾಗಲಿ ಎಂದು ಬಯಸುತ್ತಿರುವವರು, ಅಭಿಮಾನಿಗಳು ಹಾಗೂ ನಾಗರೀಕರು ಈಗಾಗಲೇ ಧನ ಸಹಾಯವನ್ನು ಮಾಡುತ್ತಿದ್ದಾರೆ. ತಿಮ್ಮಕ್ಕ ಅವರಿಗೆ ಸಹಾಯ ಮಾಡಲು ಬಯಸುವವರು 99724 87991 ಈ ಸಂಖ್ಯೆಯನ್ನು ಸಂಪರ್ಕಿಸಬಹುದು ಎಂದು ತಿಳಿಸಿದ್ದಾರೆ.