ಬೆಂಗಳೂರು: ಕಳೆದ ಮೂರು-ನಾಲ್ಕು ದಿನದಿಂಡ ಎಡಬಿಡದೆ ಸುರಿಯುತ್ತಿರುವ ಧಾರಾಕಾರ ಮಳೆಗೆ ಕೊಡಗು ಜಿಲ್ಲೆ ತತ್ತರಿಸಿದ್ದು ಮಡಿಕೇರಿಯ ಮಾಕೊಡ್ಲುವಿನಲ್ಲಿ ನೆಲೆಸಿರುವ ನಟಿ ದಿಶಾ ಪೂವಯ್ಯ ಕುಟುಂಬ ರಕ್ಷಣೆಗಾಗಿ ಕಾಯುತ್ತಿದೆ.

ಶನಿವಾರ ಮುಖ್ಯಮಂತ್ರಿಗಳ ಗೃಹ ಕಛೇರಿ ಕೃಷ್ಣಾದಲ್ಲಿ ಕುಮಾರಸ್ವಾಮಿಯವರನ್ನು ಭೇಟಿಯಾದ ನಟಿ ದಿಶಾ ತಮ್ಮ ಕುಟುಂಬ ಸದಸ್ಯರ ರಕ್ಷಣೆಗಾಗಿ ಅವರಲ್ಲಿ ಮನವಿ ಮಾಡಿದ್ದಾರೆ.

ಮಳೆಯಿಂದಾಗಿ  ನನ್ನ ಕುಟುಂಬ ಏಳೆಂಟು ಸದಸ್ಯರು ಮನೆಯಲ್ಲೇ ಸಿಲುಕಿದ್ದಾರೆ. ಸಂಪರ್ಕ ಸಾಧ್ಯವಾಗುತ್ತಿಲ್ಲ ಓರ್ವ ಗರ್ಭಿಣಿ ಮಹಿಳೆ ಸಹ ಅಲ್ಲಿದ್ದು ಅವರು ಏನಾಗಿದ್ದಾರೆ ತಿಳಿದಿಲ್ಲ, ಅವರ ಹೆರಿಗೆ ದಿನ ಕೂಡ ನಿಗದಿಯಾಗಿದ್ದು ಅವರನ್ನು ತುರ್ತಾಗಿ ಕುಶಾಲನಗರ, ಪಿರಿಯಾಪಟ್ಟಣಕ್ಕೆ ಕರೆದೊಯ್ಯಬೇಕು.  ಕನಿಷ್ಠ ಅವರನ್ನಾದರೂ ಕಾಪಾಡಿ, ಜೀವರಕ್ಷಿಸಿ ಎಂದು ಮನವಿ ಮಾಡಿದರು. 

ತಮ್ಮ ಕುಟುಂಬ ಸೇರಿ ಆ ಪ್ರದೇಶದಲ್ಲಿ ಸುಮಾರು ನಲವತ್ತು ಜನ ಸಂಕಷ್ಟದಲ್ಲಿದ್ದಾರೆ ಎಂದು ನಟಿ ಮಾದ್ಯಮಗಳಿಗೆ ವಿವರಿಸಿದರು.

ನಟಿ ದಿಶಾ ಅವರ ಮನವಿ ಆಲಿಸಿದ ಕುಮಾರಸ್ವಾಮಿ ತಕ್ಷಣಾವರ ಕುಟುಂಬದ ನೆರವಿಗೆ ಧಾವಿಸಬೇಕೆಂದು ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.