ಬೆಂಗಳೂರು: ಸಿಬ್ಬಂದಿ ಮತ್ತು ಆಡಳಿತಾ ಸುಧಾರಣಾ ಇಲಾಖೆ ನೇಮಕಗೊಳಿಸಿರುವ ನಾಲ್ವರು ಮಾಹಿತಿ ಆಯುಕ್ತರ ಅನರ್ಹತೆ  ಸಂಬಂಧ ಪ್ರತಿಕ್ರಿಯಿಸುವಂತೆ ಹೈಕೋರ್ಟ್  ರಾಜ್ಯಸರ್ಕಾರಕ್ಕೆ ಸೂಚನೆ ನೀಡಿದೆ.

 ಹಾವೇರಿ ಜಿಲ್ಲಾಆಸ್ಪತ್ರೆಯ ಕ್ಷೇತ್ರ ಆರೋಗ್ಯ ಶಿಕ್ಷಣಾಧಿಕಾರಿ ಜೆ. ಎಂ. ರಾಜಶೇಖರ್ ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ  ನ್ಯಾಯಮೂರ್ತಿಗಳಾದ ಎ. ಎಸ್ , ಬೋಪಣ್ಣ ಅವರಿದ್ದ ಪೀಠ, ಮಾಹಿತಿ ಆಯುಕ್ತರಾಗಿ ಆಯ್ಕೆಯಾಗಿರುವ  ಡಾ. ಕೆ. ಲಿಂಗರಾಜ್. ಡಾ. ಕೆ. ಇ. ಕುಮಾರಸ್ವಾಮಿ, ಎಸ್. ಎಲ್. ಪಾಟೀಲ್ ಮತ್ತು ಹೆಚ್. ಪಿ. ಸುಧಾಮ್ ದಾಸ್ ಅವರಿಗೆ ನೋಟಿಸ್ ನೀಡಿದೆ.

ರಾಜ್ಯ ಮಾಹಿತಿ ಆಯುಕ್ತ ಹುದ್ದೆಗಾಗಿ 170 ಮಂದಿ ಅರ್ಜಿ ಸಲ್ಲಿಸಿದ್ದು, ಆಯ್ಕೆ ಸಮಿತಿ 21 ಜನರ ಕಿರುಪಟ್ಟಿಯನ್ನು  ತಯಾರಿಸಿದೆ. ಈ ಪೈಕಿ ಅರ್ಜಿದಾರ ರಾಜಶೇಖರ್ ಸೇರಿದಂತೆ ನಾಲ್ವರನ್ನು ಮಾತ್ರ ಅಂತಿಮ ಪಟ್ಟಿಯಲ್ಲಿ ಆಯ್ಕೆ ಮಾಡಲಾಗಿದೆ.  ಸಿಬ್ಬಂದಿ ಮತ್ತು ಆಡಳಿತಾ ಸುಧಾರಣಾ ಇಲಾಖೆ ಜನವರಿ 11. 2018ರಂದು ಹೊರಡಿಸಿದ ಆದೇಶದಲ್ಲಿ ನಾಲ್ವರನ್ನು ಮಾತ್ರ ರಾಜ್ಯ ಮಾಹಿತಿ ಆಯುಕ್ತರನ್ನಾಗಿ ನೇಮಕಗೊಳಿಸಿದೆ.

 ರಾಜ್ಯ ಮಾಹಿತಿ ಆಯುಕ್ತರಾಗಿ ನೇಮಕಗೊಳ್ಳುವವರು ಕಾನೂನು, ವಿಜ್ಞಾನ ಮತ್ತು ತಂತ್ರಜ್ಞಾನ , ಸಮಾಜ ಸೇವೆ ಸೇರಿದಂತೆ ಆಡಳಿತದ ಬಗ್ಗೆ ಸಮಗ್ರ ಅರಿವು ಹೊಂದಿರಬೇಕಾಗುತ್ತದೆ. ಆದರೆ. ಈಗ ಆಯ್ಕೆಯಾಗಿರುವವರಲ್ಲಿ ಇಬ್ಬರು ರಾಜಕೀಯ ಹಿನ್ನೆಲೆಯವರಾಗಿದ್ದರೆ. ಮತ್ತೊಬ್ಬರು ಡಾಕ್ಟರ್, ಇವುಗಳನ್ನು ಪರಿಗಣಿಸದೆ ಆಯ್ಕೆ ಸಮಿತಿ ನೇಮಕ ಮಾಡಿರುವುದು ಕಾನೂನು ಬಾಹಿರ ಎಂದು ಆರೋಪಿಸಿ ರಾಜಶೇಖರ್ ಹೈಕೋರ್ಟಿಗೆ ಅರ್ಜಿ ಸಲ್ಲಿಸಿದ್ದಾರೆ.