ಕಲಬುರಗಿ:  ಮಳಖೇಡದಲ್ಲಿರುವ ಉತ್ತರಾಧಿ ಮಠಕ್ಕೆ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ಭೇಟಿ ನೀಡಿದ್ದರು. ಈ ವೇಳೆ ಮಠದ ಹೊರಗೆ ರಿವಾಲ್ವರ್ ಹಿಡಿದು ಸುತ್ತಾಡುತ್ತಿದ್ದ ನಿವೃತ್ತ ಪೊಲೀಸ್ ಅಧಿಕಾರಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಅಮಿತ್ ಶಾ ತಮ್ಮ ಪತ್ನಿ ಸೋನಲ್ ಶಾ ಅವರೊಂದಿಗೆ ಬೃಂದಾವನದ ಜಯತೀರ್ಥ ಸ್ವಾಮೀಜಿ ದರ್ಶನ ಪಡೆಯಲು ತೆರಳಿದ್ದರು. ರಾಜ್ಯ ಬಿಜೆಪಿ ಅಧ್ಯಕ್ಷ ಯಡಿಯೂರಪ್ಪ ಮತ್ತಿತರರ ಬಿಜೆಪಿ ಮುಖಂಡರು ಅವರ ಜೊತೆ ತೆರಳಿದ್ದರು. ಈ ವೇಳೆ ನಿವೃತ್ತ ಪೊಲೀಸ್ ಅಧಿಕಾರಿಯೊಬ್ಬರು ರಿವಾಲ್ವರ್ ಹಿಡಿದು ಮಠದ ಹೊರಗೆ ಸುತ್ತಾಡುತ್ತಿದ್ದರು. ಇದನ್ನು ಗಮನಿಸಿದ ಪೊಲೀಸರು ಆತನನ್ನು ಬಂಧಿಸಿದ್ದಾರೆ,

ತೆಲಂಗಾಣದ ತುರಾಬುಲ್ ಹಕ್ ಎಂಬಾತನನ್ನು ವಶಕ್ಕೆ ತೆಗೆದುಕೊಂಡಿರುವುದಾಗಿ ಕಲಬುರಗಿ ಎಸ್ ಪಿ ಶಶಿಕುಮಾರ್ ತಿಳಿಸಿದ್ದಾರೆ. ನಿವೃತ್ತನಾದ ನಂತರ ತನ್ನ ಸ್ವಗ್ರಾಮ ಮಳಖೇಡದಲ್ಲಿ ನೆಲೆಸಿರುವುದಾಗಿ ತಿಳಿಸಿದ ಆತ ವಿಚಾರಣೆ ವೇಳೆ ತನ್ನ ಬಳಿ ಇರುವ ಗನ್  ಪರವಾನಗಿ ತೋರಿಸಿದ್ದಾರೆ, ಜೊತೆಗೆ ತಾನು ಎಲ್ಲಿಯೇ ಹೋದರು ರಿವಾಲ್ವರ್ ಅನ್ನು ಜೊತೆಗೆ ಕೊಂಡೊಯ್ಯುವುದಾಗಿ ತಿಳಿಸಿದ್ದಾರೆ.