ಬೆಂಗಳೂರು: ಆಂಗ್ಲ ಪತ್ರಿಕೆಯ ವರದಿಗಾರ ಎಂದು ಹೇಳಿಕೊಂಡು ಮಧ್ಯ ವಯಸ್ಸಿನ ವ್ಯಕ್ತಿಯೊಬ್ಬ ನಿಮ್ಮ ಅಕ್ರಮವನ್ನು ಬಯಲಿಗೆಳೆಯುತ್ತೇನೆ ಎಂದು ಬೆದರಿಸಿ ಬಿಡಿಎ ಅಧಿಕಾರಿಗಳಿಂದ ಹಣ ಸುಲಿಗೆ ಮಾಡುತ್ತಿದ್ದವನ ಅಕ್ರಮ ಬಯಲಿಗೆಳೆಯಲಾಗಿದೆ.
ತ್ರಿವಿಕ್ರಮ ಎಂದು ಹೆಸರು ಹೇಳಿಕೊಂಡು ಬಿಡಿಎ ಕೇಂದ್ರ ಕಚೇರಿಗೆ ಬಂದು ಅಧಿಕಾರಿಗಳಿಗೆ ಪೀಡಿಸುತ್ತಿದ್ದ ಎಂದು ತನಿಖೆ ವೇಳೆ ಪೊಲೀಸರಿಗೆ ತಿಳಿದುಬಂದಿದೆ. ಬಿಡಿಎಯ ಕಾರ್ಯಪಡೆ ಈತನ ಸೋಗಲಾಡಿತನ ಬಯಲು ಮಾಡಿದೆ. ಈ ಬಗ್ಗೆ ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ಪತ್ರಿಕೆಗೆ ಮಾಹಿತಿ ನೀಡಿದ ಬಿಡಿಎ ಅಧಿಕಾರಿಯೊಬ್ಬರು, ತ್ರಿವಿಕ್ರಮ ಬಿಡಿಎಯ ಐಟಿ ವಿಭಾಗದ ಹಿರಿಯ ಅಧಿಕಾರಿ ಬಳಿ ಬಂದು ಹಣ ನೀಡುವಂತೆ ಪೀಡಿಸುತ್ತಿದ್ದನು ಎಂದು ಹೇಳಿದ್ದಾರೆ.
ನಡೆದ ಘಟನೆಯೇನು?: ಕಳೆದ ಸೋಮವಾರ ತ್ರಿವಿಕ್ರಮ ಬಿಡಿಎ ಕೇಂದ್ರ ಕಚೇರಿಗೆ ಬಂದು ನನ್ನ ಫೋನ್ ನಲ್ಲಿ ನೀವು ನಡೆಸಿರುವ ಅಕ್ರಮಗಳ ಬಗ್ಗೆ ಕೆಲವು ದಾಖಲೆಗಳಿವೆ. ನೀವು ಇಷ್ಟು ಹಣ ಕೊಟ್ಟರೆ ಕೇಸನ್ನು ಇಲ್ಲಿಗೆ ಮುಚ್ಚಿಹಾಕುತ್ತೇನೆ, ಇಲ್ಲದಿದ್ದರೆ ಪತ್ರಿಕೆಯಲ್ಲಿ ಪ್ರಕಟಿಸುತ್ತೇನೆ ಎಂದು ಬೆದರಿಸಿದ. ಆರಂಭದಲ್ಲಿ ಅಧಿಕಾರಿ ತ್ರಿವಿಕ್ರಮನ ಮಾತನ್ನು ಗಂಭೀರವಾಗಿ ತೆಗೆದುಕೊಳ್ಳಲಿಲ್ಲ. ಮರುದಿನ ಮತ್ತೆ ಅಧಿಕಾರಿ ಕಚೇರಿಗೆ ಬಂದು ತ್ರಿವಿಕ್ರಮ ಹಣಕ್ಕಾಗಿ ಪೀಡಿಸಲಾರಂಭಿಸಿದ. ಕೂಡಲೇ ಅಧಿಕಾರಿ ಪೊಲೀಸ್ ಕಾರ್ಯಪಡೆಗೆ ತಿಳಿಸಿದರು. ತ್ರಿವಿಕ್ರಮ ಎನ್ನುವ ವ್ಯಕ್ತಿ ಕ್ಯಾಂಪಸ್ ನೊಳಗೆ ತಿರುಗಾಡುತ್ತಿದ್ದರಿಂದ ಸುಲಭವಾಗಿ ಹಿಡಿಯಲು ಸಾಧ್ಯವಾಯಿತು. ಈತನ ಸುಲಿಗೆ ಕೇಸು ಬಿಡಿಎ ಕಚೇರಿಯಲ್ಲಿ ಸುದ್ದಿಯಾಗುತ್ತಿದ್ದಂತೆ ಇಂತಹ ಹಲವು ಸುಲಿಗೆ ಬೆದರಿಕೆ ಕೇಸುಗಳು ಬೆಳಕಿಗೆ ಬಂದವು ಎಂದು ಮತ್ತೊಬ್ಬ ಅಧಿಕಾರಿ ಹೇಳುತ್ತಾರೆ.
ಆತ ಕಳೆದೊಂದು ತಿಂಗಳಿನಿಂದ ಬಿಡಿಎ ಕಚೇರಿಯಲ್ಲಿ ಓಡಾಡುತ್ತಾ ಭೂ ಒತ್ತುವರಿ ಇಲಾಖೆಯ ಅಧಿಕಾರಿಗಳ ಬಳಿ ಬಂದು ಈ ರೀತಿ ನಿಮ್ಮ ಕೇಸುಗಳನ್ನು ಬಯಲಿಗೆಳೆಯುತ್ತೇನೆ ಎಂದು ಬೆದರಿಸುತ್ತಿದ್ದ ಎಂದು ಗೊತ್ತಾಗಿದೆ. ಒಬ್ಬ ಅಧಿಕಾರಿ ತನ್ನ ಅಕ್ರಮ ಬಯಲಿಗೆ ಬರಬಹುದು ಎಂಬ ಭೀತಿಯಿಂದ ಸ್ವಲ್ಪ ಹಣ ನೀಡಿದ್ದಾರೆ ಎಂದು ಗೊತ್ತಾಗಿದ್ದು ಅದರ ವಿವರ ಸಿಕ್ಕಿಲ್ಲ, ಹೊಸಕೆರೆಹಳ್ಳಿ ಮೂಲದವನು ಈ ತ್ರಿವಿಕ್ರಮ ಎಂಬುದು ತಿಳಿದುಬಂದಿದೆ.
ಆರಂಭಿಕ ವಿಚಾರಣೆ ವೇಳೆ ಈತ ಆರ್ ಟಿಐ ಕಾರ್ಯಕರ್ತ ಎಂದು ಗೊತ್ತಾಗಿದ್ದು ಕಂಪ್ಯೂಟರ್ ವಿಭಾಗದ ಕೆಲ ಅಧಿಕಾರಿಗಳಿಂದ ಮಾಹಿತಿ ಪಡೆದುಕೊಳ್ಳುತ್ತಿದ್ದ ಎಂದು ತಿಳಿದುಬಂದಿದೆ. ಪೊಲೀಸರು ಹೆಚ್ಚಿನ ವಿಚಾರಣೆ ನಡೆಸುತ್ತಿದ್ದಾರೆ.