ಬೆಂಗಳೂರು: ಕರ್ನಾಟಕದ ಇತಿಹಾಸ, ಪರಂಪರೆ ಪ್ರವಾಸಿಗರಿಗೆ ಸುಲಭವಾಗಿ ತಲುಪಿಸಲು, ಹಲವು ಅಪರೂಪದ ಸ್ಥಳಗಳನ್ನು ಪ್ರವಾಸಿಗರಿಗೆ ಪರಿಚಯಿಸುವುದಕ್ಕಾಗಿ ಯುವಾ ಬ್ರಿಗೇಡ್ ರೆಲ್ಲೋ ಪ್ಲೇಕ್ಸ್ ಅಭಿಯಾನವನ್ನು ಕೈಗೆತ್ತಿಕೊಂಡಿದೆ. 

ಕಲ್ಯಾಣಿ ಸ್ವಚ್ಛತೆ, ಸ್ಟಾರ್ಟ್-ಅಪ್, ಉದ್ಯಮಿಗಳಾಗುವ ಯುವಕರಿಗೆ ಮಾರ್ಗದರ್ಶನ ನೀಡುವ ಕಾರ್ಯಕ್ರಮಗಳಂತಹ ಸಮಾಜಮುಖಿ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿರುವ ಯುವಾ ಬ್ರಿಗೇಡ್ ತಂಡ ರೆಲ್ಲೋ ಪ್ಲೇಕ್ ಅಭಿಯಾನಕ್ಕಾಗಿ ಲಾಕ್ ಡೌನ್ ಅವಧಿಯನ್ನು ಸಮರ್ಥವಾಗಿ ಬಳಸಿಕೊಂಡಿದೆ. 

ರೆಲ್ಲೋ ಪ್ಲೇಕ್ ಬಗ್ಗೆ ಯುವಾಬ್ರಿಗೇಡ್ ನ ಮಾರ್ಗದರ್ಶಕರಾಗಿರುವ, ಅಂಕಣಕಾರ, ಲೇಖಕ ಚಕ್ರವರ್ತಿ ಸೂಲಿಬೆಲೆ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. 

"ಪ್ರಾಚೀನ ಪರಂಪರೆಯನ್ನು ಉಳಿಸಿ, ಹಳೆಯದನ್ನು ನೆನಪಿಸಿಕೊಳ್ಳುವುದಕ್ಕೆ, ವಿಶೇಷವಾದ ವ್ಯಕ್ತಿಗಳ ಭೇಟಿ, ಅವರು ಭೇಟಿ ನೀಡಿದ್ದ ಸ್ಥಳಗಳನ್ನು ಗುರುತಿಸಲು ಇಂಗ್ಲೆಂಡ್ ನಲ್ಲಿ ಬಳಕೆ ಮಾಡಲಾಗುವ ಬ್ಲೂ ಪ್ಲೇಕ್ (ನೀಲಿ ಫಲಕ) ರೆಲ್ಲೋ ಪ್ಲೇಕ್ಸ್ ಗೆ ಸ್ಪೂರ್ತಿ. ಕರ್ನಾಟಕದ ಬಾವುಟದ ಬಣ್ಣ ಅರಿಶಿನ ಹಾಗೂ ಕುಂಕುಮವನ್ನು ಪ್ರತಿನಿಧಿಸುವ ಕೆಂಪು ಹಾಗೂ ಹಳದಿಯ ಬಣ್ಣದ್ದಾಗಿದೆ. ಅದು ಕಾರಣ ರೆಡ್-ಯೆಲ್ಲೋ ಪ್ಲೇಕ್ಸ್ ನ್ನು ಚುಟುಕಾಗಿ ರೆಲ್ಲೋ ಪ್ಲೇಕ್ಸ್ ಎಂದು ಹೇಳಲಾಗಿದೆ. 

ಕೋವಿಡ್-19 ಲಾಕ್ ಡೌನ್ ನಂತರ ಅತಿ ಹೆಚ್ಚು ಹೊಡೆತ ಬೀಳುವ ಕ್ಷೇತ್ರಗಳೆಂದರೆ ಅದು ಪ್ರವಾಸೋದ್ಯಮ, ಅವುಗಳ ಜೊತೆಯಲ್ಲೇ ಹೊಟೇಲ್ ಉದ್ಯಮಗಳೂ ಸಹ ಹೊಡೆತ ಎದುರಿಸಲಿವೆ. ಇಂತಹ ಸಂದರ್ಭದಲ್ಲೇ ಯುವಾ ಬ್ರಿಗೇಡ್ ರೆಲ್ಲೋ ಪ್ಲೇಕ್ಸ್ ಮೂಲಕ ಹೊಸ ಪ್ರಯೋಗಕ್ಕೆ ನಿರ್ಧರಿಸಿದೆ. 

ಈ ಲಾಕ್ ಡೌನ್ ಅವಧಿಯಲ್ಲಿ ಯುವಾ ಬ್ರಿಗೇಡ್ ನ ಕಾರ್ಯಕರ್ತರು ರೆಲ್ಲೋ ಪ್ಲೇಕ್ಸ್ ಹಾಕಬಹುದಾದ 600 ಅಪರೂಪದ ಸ್ಥಳಗಳನ್ನು ಗುರುತಿಸಿ, ಗೂಗಲ್ ಮ್ಯಾಪ್ ಡೇಟಾದಿಂದ ಹಿಡಿದು ಇದಕ್ಕೆ ಬೇಕಾದ ಅಷ್ಟೂ ತಯಾರಿಗಳನ್ನು ನಡೆಸಿದ್ದಾರೆ. 

ಜೂ.08 ರಂದು ಯುವಾ ಬ್ರಿಗೇಡ್ ನ 6 ನೇ ವಾರ್ಷಿಕೋತ್ಸದ ಹಿನ್ನೆಲೆಯಲ್ಲಿ ರಾಜ್ಯದ 60 ಭಾಗಗಳಲ್ಲಿ ರೆಲ್ಲೋ ಪ್ಲೇಕ್ಸ್ ನ್ನು ಹಾಕಲು ಯುವಾ ಬ್ರಿಗೇಡ್ ನಿರ್ಧರಿಸಿದ್ದು, ಅದೇ ದಿನದಂದು ರೆಲ್ಲೋ ಪ್ಲೇಕ್ ವೆಬ್ ಸೈಟ್ ಗೂ ಚಾಲನೆ ನೀಡಲಾಗುತ್ತದೆ. ಪ್ಲೇಕ್ ಗಳನ್ನು ಹಾಕಲಾಗಿರುವ ಸ್ಥಳಗಳು ರೆಲ್ಲೋ ಪ್ಲೇಕ್ ವೆಬ್ ಸೈಟ್ ನಲ್ಲಿ ಪ್ರತಿಬಿಂಬಿಸುವಂತೆ ಮಾಡಲಾಗುತ್ತದೆ. 

ಕನ್ನಡ-ಇಂಗ್ಲೀಷ್ ಗಳಲ್ಲಿ ರೆಲ್ಲೋ ಪ್ಲೇಕ್ ವೆಬ್ ಸೈಟ್ ಲಭ್ಯವಿರಲಿದ್ದು, ಸಾರ್ವಜನಿಕರೂ ಸಹ ರೆಲ್ಲೋಪ್-ಪೇಕ್ ಹಾಕಬಹುದಾದ ಸ್ಥಳಗಳ ಬಗ್ಗೆ ಮಾಹಿತಿ ನೀಡಬಹುದಾಗಿದೆ.