ಬೆಂಗಳೂರು:  ಮನೆ ಮುಂದೆ ನಿಲ್ಲಿಸಿದ್ದ ವಾಹನ ಕಳವು ಮಾಡುತ್ತಿದ್ದ ಮೂವರು ಆರೋಪಿಗಳನ್ನು ಬಂಧಿಸಿರುವ ವಿಜಯನಗರ ಪೊಲೀಸರು, 2.69 ಲಕ್ಷ ರೂ.ಮೌಲ್ಯದ 4 ದ್ವಿಚಕ್ರ ವಾಹನಗಳನ್ನು ವಶಪಡಿಸಿಕೊಂಡಿದ್ದಾರೆ.

ಮಂಗಮ್ಮನಪಾಳ್ಯ ನಿವಾಸಿ ಜಬೀವುಲ್ಲಾ (19), ಬೊಮ್ಮನಹಳ್ಳಿ ನಿವಾಸಿ ಅಬ್ದುಲ್ ಹಫೀಝ್ (20) ಬಂಧಿತ ಆರೋಪಿಗಳು.

ಆರ್.ಪಿ.ಸಿ ಲೇಔಟ್ ನಲ್ಲಿರುವ ನಿವಾಸಿಯೊಬ್ಬರು ಮಾರ್ಚ್ 30ರಂದು ಅವರ ಮನೆಯ ಮುಂದೆ ನಿಲ್ಲಿಸಿದ್ದ 42000 ರೂ.ಮೌಲ್ಯದ ಟಿವಿಎಸ್ ಸ್ಕೂಟರ್ ಅನ್ನು ಕಳ್ಳರು ಕಳವು ಮಾಡಿದ್ದರು. ಈ ಬಗ್ಗೆ ಅವರು ವಿಜಯನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು. 

ದೂರು ದಾಖಲಿಸಿಕೊಂಡ ಪೋಲೀಸರು ಬೈಕ್​ ಕಳ್ಳರಿಗಾಗಿ ಶೋಧ ಮಾಡಿದಾಗ ಆರೋಪಿಗಳ ಸುಳಿವು ಸಿಕ್ಕಿದೆ. ಬಂಧಿತರು ಶೋಕಿ ಜೀವನಕ್ಕಾಗಿ ಹಣ ಮಾಡುವ ಉದ್ದೇಶದಿಂದ ಬೈಕುಗಳ ಕಳ್ಳತನ ನಡೆಸಿದ್ದರೆಂದು ಹೇಳಲಾಗಿದೆ. ಇವರು ಇದಾಗಲೇ ಕೆಲ ಬೈಕ್ ಗಳ ನಂಬರ್ ಪ್ಲೇಟ್ ಬದಲಿಸಿ ಬೇರೆಡೆ ವ್ಯಾಪಾರ ಮಾಡಿರುವುದೂ ಸಹ ಗೊತ್ತಾಗಿದ್ದು  ಇವರ ವಿರುದ್ಧ ಈ ಹಿಂದೆ ಸಹ ಹಲವಾರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.