ಧಾರವಾಡ: 'ತ್ಯಾಜ್ಯವನ್ನು ವ್ಯರ್ಥ ಮಾಡಬೇಡಿ'- ಇದು ಹುಬ್ಬಳ್ಳಿ ಮತ್ತು ಧಾರವಾಡದ ವೀರಪ್ಪ ಎಚ್ ಅರಕೇರಿ ಅವರ ದೈನಂದಿನ ಧ್ಯೇಯವಾಕ್ಯ. ವೀರಪ್ಪ ಮನೆಗಳಿಂದ ಪ್ಲಾಸ್ಟಿಕ್ ಮತ್ತು ಇ-ತ್ಯಾಜ್ಯವನ್ನು ಸಂಗ್ರಹಿಸಿ ಮರುಬಳಕೆದಾರರಿಗೆ ಮಾರಾಟ ಮಾಡುತ್ತಾರೆ ಮತ್ತು ಹೀಗೆ ಸಂಗ್ರಹಿಸಿದ ಹಣವನ್ನು ದಾನ ಕಾರ್ಯಗಳಿಗೆ ಖರ್ಚು ಮಾಡುತ್ತಾರೆ.

ವೀರಪ್ಪ ಸಾಮಾನ್ಯ ಕಸ ಸಂಗ್ರಹಣೆ ಮಾಡುವವರಲ್ಲ. ಅವರು ಎಂಜಿನಿಯರಿಂಗ್ ಪದವೀಧರರು. ಅವರು ಉತ್ತಮ ಸಂಬಳದ ಕೆಲಸವನ್ನು ಸಹ ಹೊಂದಿದ್ದರು. ಆದರೆ, ನಂತರ ಅವರು ಸಮಾಜಕ್ಕೆ ಸೇವೆ ಸಲ್ಲಿಸಲು ಅದನ್ನು ತೊರೆದರು.

2014 ರಿಂದ, ವೀರಪ್ಪ ಅವಳಿ ನಗರಗಳನ್ನು ಪ್ಲಾಸ್ಟಿಕ್ ಮುಕ್ತಗೊಳಿಸಲು ತಮ್ಮ ಬೈಕ್‌ನಲ್ಲಿ ಸುತ್ತುತ್ತಿದ್ದಾರೆ. ತಾವು ಮಾಡುವ ಆರ್ಥಿಕ ಸಹಾಯಕ್ಕಿಂತ ಹೆಚ್ಚಾಗಿ, ನಿವಾಸಿಗಳಲ್ಲಿ ಮರುಬಳಕೆ ಕುರಿತು ಜಾಗೃತಿ ಮೂಡಿಸುವಲ್ಲಿ ವೀರಪ್ಪ ಉತ್ಸುಕರಾಗಿದ್ದಾರೆ.

ವೀರಪ್ಪ ಅವರು ವರ್ಷಕ್ಕೆ 4 ಲಕ್ಷ ರೂ. ಗಳಿಸುತ್ತಿದ್ದರು. ಆದರೆ, ನಂತರ ವಿಭಿನ್ನ ಮತ್ತು ಅರ್ಥಪೂರ್ಣವಾದದ್ದನ್ನು ಮಾಡಲು ಬಯಸಿದ್ದರು. ಅವಿಭಕ್ತ ಕುಟುಂಬದ ಭಾಗವಾಗಿದ್ದ ಅವರು, ತಮ್ಮ ದೈನಂದಿನ ಖರ್ಚುಗಳನ್ನು ನಿರ್ವಹಿಸಲು ಎಂದಿಗೂ ಆರ್ಥಿಕ ಸಂಕಷ್ಟವನ್ನು ಎದುರಿಸಿಲ್ಲ.

ಹೀಗಾಗಿ, ತ್ಯಾಜ್ಯ ಮಾರಾಟ ಮಾಡುವುದರಿಂದ ಬರುವ ಹಣವನ್ನು ಅವರು ಅನಾಥಾಶ್ರಮಗಳಿಗೆ, ಪ್ರಧಾನಿ ಮತ್ತು ಮುಖ್ಯಮಂತ್ರಿಗಳ ಪರಿಹಾರ ನಿಧಿಗಳಿಗೆ, ಗೋಶಾಲೆಗಳಿಗೆ, ದೀನದಲಿತರಿಗೆ ಮತ್ತು ಇತರರಿಗೆ ದಾನ ಮಾಡುತ್ತಾರೆ.

'ಪ್ಲಾಸ್ಟಿಕ್ ತ್ಯಾಜ್ಯವನ್ನು ಮಾರಾಟ ಮಾಡುವುದರಿಂದ ನನಗೆ ದೊಡ್ಡ ಮೊತ್ತ ಸಿಗುವುದಿಲ್ಲ. ಆದರೆ, ನನಗೆ ಸಿಗುವ ಎಲ್ಲವನ್ನೂ ದಾನ ಮಾಡುತ್ತೇನೆ. ನಾನು ಬೈಕನ್ನು ತೆಗೆದುಕೊಂಡು ಸುತ್ತಾಡುತ್ತೇನೆ. ಸಾಮಾನ್ಯವಾಗಿ ನಾನು ತ್ಯಾಜ್ಯವನ್ನು ನೀಡಲು ಇಚ್ಛಿಸುವ ಜನರಿಗೆ ಒಂದು ಚೀಲವನ್ನು ನೀಡುತ್ತೇನೆ ಮತ್ತು ಚೀಲ ತುಂಬಿದ ನಂತರ ನಾನು ಅದನ್ನು ಸಂಗ್ರಹಿಸಿ ಅವರಿಗೆ ಇನ್ನೊಂದು ಚೀಲವನ್ನು ನೀಡುತ್ತೇನೆ. ನನಗೆ ಈ ಕೆಲಸದಲ್ಲಿ ಬೆಂಬಲ ನೀಡುವ ಮಗ ಮತ್ತು ಹೆಂಡತಿ ಇದ್ದಾರೆ. ಕಳೆದ 10 ವರ್ಷಗಳಲ್ಲಿ ನಾನು ಸುಮಾರು 2 ಲಕ್ಷ ರೂ.ಗಳನ್ನು ದಾನ ಮಾಡಿರಬಹುದು. ಜಾಗೃತಿ ಮೂಡಿಸಲು ಮತ್ತು ಹೆಚ್ಚಿನ ಜನರನ್ನು ದಾನ ಕಾರ್ಯಗಳಿಗೆ ಕರೆತರಲು ನಾನು ಬಯಸುತ್ತೇನೆ. ನಾನು ಎಲ್ಲ ದಾನ ಕಾರ್ಯಗಳನ್ನು ಅಕ್ಕಾ ಫೌಂಡೇಶನ್ ಬ್ಯಾನರ್ ಅಡಿಯಲ್ಲಿ ಮಾಡುತ್ತೇನೆ' ಎಂದು ಅವರು ಹೇಳುತ್ತಾರೆ.

ಅವರ ಸ್ನೇಹಿತರೊಬ್ಬರು ಹೇಳುವಂತೆ, ಪೆಟ್ರೋಲ್ ವೆಚ್ಚವನ್ನು ಪೂರೈಸುವುದನ್ನು ಹೊರತುಪಡಿಸಿ, ವೀರಪ್ಪ ತ್ಯಾಜ್ಯವನ್ನು ಮಾರಾಟ ಮಾಡುವ ಮೂಲಕ ಸಂಗ್ರಹಿಸುವ ಉಳಿದ ಹಣವನ್ನು ದಾನ ಮಾಡುತ್ತಾರೆ. ಅಕ್ಕಾ ಫೌಂಡೇಶನ್ ಮಕ್ಕಳಿಗೆ ಪುಸ್ತಕಗಳು, ಪೆನ್ಸಿಲ್‌ಗಳು ಮತ್ತು ಬಟ್ಟೆಗಳನ್ನು ಸಹ ದಾನ ಮಾಡುತ್ತದೆ ಎಂದರು.

ವೀರಪ್ಪ ಯೋಚಿಸದೆ ಯಾರಿಗೂ ಸಹಾಯ ಮಾಡುವುದಿಲ್ಲ. ಅವರು ಜನರನ್ನು ಅಥವಾ ಸಂಸ್ಥೆಗಳನ್ನು ಬೆಂಬಲಿಸಲು ನಿರ್ಧರಿಸುವ ಮೊದಲು ಎಚ್ಚರಿಕೆಯಿಂದ ಸಂಶೋಧಿಸಿ ಮೌಲ್ಯಮಾಪನ ಮಾಡುತ್ತಾರೆ. ಅವರ ಕಾರ್ಯಗಳು ಯಾದೃಚ್ಛಿಕ ಅಥವಾ ಅಸಡ್ಡೆಯಿಂದಲ್ಲ, ಚಿಂತನಶೀಲ ಮತ್ತು ಉದ್ದೇಶಪೂರ್ವಕವಾಗಿರುತ್ತವೆ ಎಂದು ಹೇಳಿದರು.

'ಕೊಳಗೇರಿಗಳಲ್ಲಿ ಅವರು ಬಳಸಿದ ಬಟ್ಟೆಗಳು, ಪಠ್ಯ ಪುಸ್ತಕಗಳು, ಶೂಗಳು ಮತ್ತು ಮರುಬಳಕೆಗೆ ಯೋಗ್ಯವಾದ ಇತರ ವಸ್ತುಗಳನ್ನು ವಿತರಿಸುತ್ತಾರೆ. ಕೊಳಗೇರಿಗಳಲ್ಲಿನ ಮಕ್ಕಳು ಅವರನ್ನು ನೋಡಲು ಸಂತೋಷಪಡುತ್ತಾರೆ ಏಕೆಂದರೆ, ಅವರು ಆಗಾಗ್ಗೆ ಅವರಿಗೆ ಉಡುಗೊರೆಗಳನ್ನು ಒಯ್ಯುತ್ತಾರೆ' ಎಂದು ಹೇಳಿದರು.

ತಮ್ಮ ಗಂಡನ ಉದಾರ ಮನೋಭಾವದ ಬಗ್ಗೆ ಆರಂಭದಲ್ಲಿ ಅನುಮಾನ ವ್ಯಕ್ತಪಡಿಸಿದ್ದಾಗಿ ವೀರಪ್ಪ ಅವರ ಪತ್ನಿ ಚಿತ್ರಾ ಹೇಳುತ್ತಾರೆ. ಆದರೆ, ಅವರು ಯಾರಿಗೆ ಸಹಾಯ ಮಾಡುತ್ತಾರೆಂದು ನೋಡಲು ಪ್ರಾರಂಭಿಸಿದಾಗ ಅವರ ಅಭಿಪ್ರಾಯ ಬದಲಾಯಿತು. ವೀರಪ್ಪ ಅನೇಕ ಸಸಿಗಳನ್ನು ನೆಟ್ಟಿದ್ದಾರೆ ಮತ್ತು ನಗರವನ್ನು ಸ್ವಚ್ಛಗೊಳಿಸುವುದು ಮತ್ತು ಇತರ ಸಾಮಾಜಿಕ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ ಎಂದು ಹೆಮ್ಮೆಯಿಂದ ಹೇಳುತ್ತಾರೆ.

'ಅವರು ಬ್ಯುಸಿನೆಸ್ ಮಾಡುತ್ತಿದ್ದಾಗ ಉತ್ತಮ ಹಣ ಗಳಿಸುತ್ತಿದ್ದರು. ಅವರು ಸರ್ಕಾರಿ ಯೋಜನೆಗಳನ್ನು ಕೈಗೆತ್ತಿಕೊಳ್ಳುತ್ತಿದ್ದರು ಆದರೆ ಕ್ರಮೇಣ ಅದರಲ್ಲಿ ಆಸಕ್ತಿ ಕಳೆದುಕೊಂಡು ಮರುಬಳಕೆ ಮಾಡಬಹುದಾದ ಕಸವನ್ನು ಸಂಗ್ರಹಿಸುವುದನ್ನು ಮುಂದುವರೆಸಿದರು. ಕೆಲವೊಮ್ಮೆ ಅವರ ಸಹೋದರ ಸೇರಿದಂತೆ ನಾವು ಕುಟುಂಬವಾಗಿ ಆರ್ಥಿಕ ಬಿಕ್ಕಟ್ಟನ್ನು ನಿವಾರಿಸಲು ಅವರಿಗೆ ಸಹಾಯ ಮಾಡುತ್ತೇವೆ. ಮರುಬಳಕೆ ಮಾಡಬಹುದಾದ ವಸ್ತುಗಳು ಮತ್ತು ಅದರ ಮಹತ್ವದ ಬಗ್ಗೆ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವುದು ವಾಡಿಕೆಯಾಗಿದೆ' ಎಂದು ಚಿತ್ರಾ ಹೇಳುತ್ತಾರೆ.

ವೀರಪ್ಪ ಅವರಿಗೆ ಪ್ಲಾಸ್ಟಿಕ್ ತ್ಯಾಜ್ಯವನ್ನು ಹಸ್ತಾಂತರಿಸುವ ನಿವಾಸಿಯೊಬ್ಬರು, ವೀರಪ್ಪ ಅವರು ದಯಾಳು ಆದರೆ ವಿವೇಚನಾಶೀಲ ವ್ಯಕ್ತಿ. ಜನರು ವೀರಪ್ಪ ಅವರಿಗೆ ನೀಡುವ ತ್ಯಾಜ್ಯಕ್ಕಾಗಿ ಹಣ ತೆಗೆದುಕೊಳ್ಳುವುದಿಲ್ಲ. ಒಳ್ಳೆಯ ಉದ್ದೇಶಕ್ಕಾಗಿ ನಾವು ಸಣ್ಣ ಪಾತ್ರವನ್ನು ವಹಿಸುತ್ತಿದ್ದೇವೆ ಎಂದು ನಮಗೆ ಹೆಮ್ಮೆಯಾಗುತ್ತದೆ ಎನ್ನುವುದಾಗಿ ಅವರು ಹೇಳುತ್ತಾರೆ.

ವೀರಪ್ಪ ಸಂಗ್ರಹಿಸುವ ವಸ್ತುಗಳಿಂದ ಹಣ ಸಂಪಾದಿಸುತ್ತಿದ್ದಾರೆ ಎಂದು ಮೊದಲಿಗೆ ಅಂದುಕೊಂಡಿದ್ದೆವು. ಆದರೆ, ಅವರ ದಾನ ಕಾರ್ಯದ ಬಗ್ಗೆ ತಿಳಿದಾಗ ನೆರೆಹೊರೆಯವರೊಂದಿಗೆ ಸೇರಿ ನಾವು ಬೆಂಬಲಿಸಿದೆವು. 'ಅವರು ಎಂದಿಗೂ ಹಣವನ್ನು ಸ್ವೀಕರಿಸುವುದಿಲ್ಲ - ಅವರು ಬಳಸಿದ ವಸ್ತುಗಳು ಮತ್ತು ಮರುಬಳಕೆ ಮಾಡಬಹುದಾದ ವಸ್ತುಗಳನ್ನು ಮಾತ್ರ ಸಂಗ್ರಹಿಸುತ್ತಾರೆ ಎಂದು ಮತ್ತೊಬ್ಬ ಮಹಿಳೆ ಹೇಳುತ್ತಾರೆ.