ಬೆಂಗಳೂರು: ಗ್ರೇಟರ್ ಬೆಂಗಳೂರು ಪ್ರಾಧಿಕಾರ(GBA) ಇ-ಖಾತಾ ಪಡೆಯಲು ನಾಗರಿಕರಿಗೆ ಆಗುತ್ತಿದ್ದ ಕಿರುಕುಳ ಮತ್ತು ಭ್ರಷ್ಟಾಚಾರವನ್ನು ತಪ್ಪಿಸಲು ಸುಧಾರಿತ ಪ್ರಕ್ರಿಯೆಯನ್ನು ಪ್ರಾರಂಭಿಸಿದ್ದು, ಇನ್ನುಮುಂದೆ ಪಾಲಿಕೆಗಳ ಅಧಿಕಾರಿಗಳನ್ನು ಭೇಟಿ ಮಾಡದೆ ಫೇಸ್ ಲೆಸ್, ಸಂಪರ್ಕರಹಿತವಾಗಿ ಆನ್‌ಲೈನ್‌ ಇ-ಖಾತಾ ಪಡೆಯಬಹುದು.

GBA ಕಂದಾಯ ಇಲಾಖೆಯು, ಬೆಂಗಳೂರು ಸೆಂಟ್ರಲ್ ಸಿಟಿ ಕಾರ್ಪೊರೇಷನ್, ಬೆಂಗಳೂರು ನಾರ್ತ್ ಸಿಟಿ ಕಾರ್ಪೊರೇಷನ್, ಬೆಂಗಳೂರು ಈಸ್ಟ್ ಸಿಟಿ ಕಾರ್ಪೊರೇಷನ್, ಬೆಂಗಳೂರು ವೆಸ್ಟ್ ಸಿಟಿ ಕಾರ್ಪೊರೇಷನ್ ಮತ್ತು ಬೆಂಗಳೂರು ಸೌತ್ ಸಿಟಿ ಕಾರ್ಪೊರೇಷನ್ ಎಂಬ ಐದು ನಗರ ಪಾಲಿಕೆಗಳಾದ್ಯಂತ ಆಸ್ತಿ ಮಾಲೀಕರು ಬಿಬಿಎಂಪಿ ಸಹಾಯಕ ಕಂದಾಯ ಅಧಿಕಾರಿಗಳು (ARO ಗಳು) ಅಥವಾ ಮಧ್ಯವರ್ತಿಗಳನ್ನು ಸಂಪರ್ಕಿಸದೆಯೇ ಇ-ಖಾತಾಗಳನ್ನು ಪಡೆಯಬಹುದು ಮತ್ತು ಅದರ FIFD (ಮೊದಲು ಸ್ವೀಕರಿಸಿದವರು ಮೊದಲು ವಿಲೇವಾರಿ ಮಾಡಿದವರು) ಮತ್ತು ಸ್ವಯಂಚಾಲಿತ ಅನುಮೋದನೆ ವ್ಯವಸ್ಥೆಯಡಿಯಲ್ಲಿ ಮೂರು ದಿನಗಳಲ್ಲಿ ಅವರ ದಾಖಲೆಗಳನ್ನು ಪಡೆಯಬಹುದು ಎಂದು ಹೇಳಿದೆ.

GBA ಕಂದಾಯ ಅಧಿಕಾರಿಯೊಬ್ಬರ ಪ್ರಕಾರ, ಬಿಬಿಎಂಪಿಯ ಹಳೆಯ ಭೌತಿಕ ಖಾತಾ ವ್ಯವಸ್ಥೆಯಲ್ಲಿ, ಪ್ರತಿಯೊಬ್ಬ ನಾಗರಿಕನು ಖಾತಾ ಪಡೆಯಲು ಮತ್ತು ಪರಿವರ್ತನೆಗಾಗಿ ARO ಭೇಟಿ ನೀಡಬೇಕಾಗಿತ್ತು. ಏಕೆಂದರೆ ದಾಖಲೆಗಳನ್ನು ಅವರು ಮಾತ್ರ ಪರಿಶೀಲಿಸುತ್ತಿದ್ದರು. ಹಿರಿಯ ಅಧಿಕಾರಿಗಳ ಅಥವಾ ವ್ಯವಸ್ಥೆಯ ಮೇಲ್ವಿಚಾರಣೆ ಇರಲಿಲ್ಲ.

"ಈ ಮುಂಚೆ ಮಧ್ಯವರ್ತಿಗಳು ಅಧಿಕಾರಿಗಳ ಮೇಲೆ ಪ್ರಭಾವ ಬೀರಲು ನಾಗರಿಕರಿಂದ ಹಣ ಸಂಗ್ರಹಿಸುತ್ತಿದ್ದರು ಮತ್ತು ಭ್ರಷ್ಟಾಚಾರವು ವ್ಯಾಪಕವಾಗಿತ್ತು. ನಾಗರಿಕರು ಸಂಪೂರ್ಣವಾಗಿ ಮಧ್ಯವರ್ತಿಗಳು ಮತ್ತು ಅಧಿಕಾರಿಗಳ ಮೇಲೆ ಅವಲಂಬಿತರಾಗಿದ್ದರು.

ಈಗ ಹೊಸ 'ಫೇಸ್ ಲೆಸ್, ಸಂಪರ್ಕರಹಿತ ಮತ್ತು ಆನ್‌ಲೈನ್ ಲೆಕ್ಕಪತ್ರ ವ್ಯವಸ್ಥೆ'ಯ ಅಡಿಯಲ್ಲಿ, ನಾಗರಿಕರು ವಿಳಂಬ ಮತ್ತು ತೊಂದರೆಯಿಲ್ಲದೆ ಇ-ಖಾತಾಗೆ ಅರ್ಜಿ ಸಲ್ಲಿಸಬಹುದು, ವೀಕ್ಷಿಸಬಹುದು ಮತ್ತು ಪಡೆಯಬಹುದು" ಎಂದು ಅಧಿಕಾರಿ ಹೇಳಿದ್ದಾರೆ.

ಜಿಬಿಎ ಕಂದಾಯ ಇಲಾಖೆಯ ಪ್ರಕಾರ, 25 ಲಕ್ಷಕ್ಕೂ ಹೆಚ್ಚು ಬೆಂಗಳೂರು ನಗರದ ಇ-ಖಾತಾಗಳನ್ನು https://BBMPeAasthi.karnataka.gov.in ನಲ್ಲಿ ಯಾವುದೇ ಸಮಯದಲ್ಲಿ ಮತ್ತು ಎಲ್ಲಿ ಬೇಕಾದರೂ ವೀಕ್ಷಿಸಬಹುದು.

"ನಾಗರಿಕರು ತಮ್ಮ ಅಂತಿಮ ಇ-ಖಾತಾಗೆ ಆನ್‌ಲೈನ್‌ನಲ್ಲಿ, ವೈಯಕ್ತಿಕವಾಗಿ ಅಥವಾ ಬೆಂಗಳೂರು ಒನ್ ಕೇಂದ್ರಗಳ ಮೂಲಕ ಅರ್ಜಿ ಸಲ್ಲಿಸಬಹುದು. ಯಾವುದೇ ನಾಗರಿಕರು ARO ಅಥವಾ ಯಾವುದೇ ಸ್ಥಳೀಯ ಕಚೇರಿಗಳಿಗೆ ಭೇಟಿ ನೀಡಬಾರದು. ಅಧಿಕಾರಿಗಳು ಮತ್ತು ಮಧ್ಯವರ್ತಿಗಳನ್ನು ಭೇಟಿ ಮಾಡುವುದು ಮತ್ತು ಸಂಪರ್ಕಿಸುವುದು ಭ್ರಷ್ಟಾಚಾರಕ್ಕೆ ಕಾರಣವಾಗಬಹುದು ಮತ್ತು ಕಿರುಕುಳಕ್ಕೆ ಕಾರಣವಾಗಬಹುದು. ನಾಗರಿಕರು https://bbmpeaasthi.karnataka.gov.in/citizen ನಲ್ಲಿ ಖಾತಾ ಅರ್ಜಿ ಸ್ಥಿತಿಯನ್ನು ಆನ್‌ಲೈನ್‌ನಲ್ಲಿ ಪರಿಶೀಲಿಸಬಹುದು" ಎಂದು ಅವರು ಹೇಳಿದ್ದಾರೆ.

ಯಾವುದೇ ದೂರುಗಳಿಗಾಗಿ ನಾಗರಿಕರು ಇ-ಖಾತಾ ಸಹಾಯವಾಣಿ 9480683695 ಅನ್ನು ಸಂಪರ್ಕಿಸಬಹುದು.