ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಆಟೋ ಚಾಲಕರ ಕಿರಿಕಿರಿ ಪ್ರಯಾಣಿಕರಿಗೆ ದೊಡ್ಡ ಸಮಸ್ಯೆಯಾಗಿದೆ. ಪ್ರಯಾಣಿಕರೊಬ್ಬರು ಆಟೋ-ರಿಕ್ಷಾ ಬದಲಿಗೆ 'ರಾಪಿಡೋ' (Rapido) ಬೈಕ್ ಟ್ಯಾಕ್ಸಿಯನ್ನು ಆಯ್ಕೆ ಮಾಡಿಕೊಂಡಿದ್ದಕ್ಕಾಗಿ, ಆಟೋ ಚಾಲಕನೊಬ್ಬ ಬೈಕ್ ಅನ್ನು ಬೆನ್ನಟ್ಟಿ ಪ್ರಯಾಣಿಕನನ್ನು ಹಿಡಿಯಲು ಯತ್ನಿಸಿರುವ ಘಟನೆ ನಡೆದಿದೆ.
ಈ ಘಟನೆಯ ಬಗ್ಗೆ ರೆಡ್ಡಿಟ್ (Reddit) ನಲ್ಲಿ ಬರೆದುಕೊಂಡಿರುವ ಪ್ರಯಾಣಿಕ, ಬೈಕ್ ಚಲಿಸುತ್ತಿದ್ದಾಗ ಆಟೋ ಚಾಲಕ ತಮ್ಮ ಕೈ ಹಿಡಿದು ಕೆಳಗೆ ಎಳೆಯಲು ಯತ್ನಿಸಿದರು ಎಂದು ಆರೋಪಿಸಿದ್ದಾರೆ. ಸುಮಾರು 2-3 ಕಿ.ಮೀ.ನಷ್ಟು ದೂರಕ್ಕೆ ಆಟೋ ಚಾಲಕ 120 ರೂಪಾಯಿ ಕೇಳಿದಾಗ ಈ ಘಟನೆ ನಡೆದಿದೆ.
ರೆಡ್ಡಿಟ್ ಪೋಸ್ಟ್‌ನಲ್ಲಿ ತಿಳಿಸಿರುವಂತೆ, ಬೆಂಗಳೂರಿನಲ್ಲಿ ಎಲ್ಲಿಯೂ ಹೋಗಲು ಆಟೋ ವಿಚಾರಿಸಿದ ಪ್ರಯಾಣಿಕನಿಗೆ ಅಲ್ಪ ದೂರಕ್ಕೆ 120 ರೂ. ಕೇಳಿದ್ದಾರೆ. ಇದಕ್ಕೆ ಒಪ್ಪದ ಪ್ರಯಾಣಿಕ ಬೈಕ್ ಟ್ಯಾಕ್ಸಿಯನ್ನು ಬುಕ್ ಮಾಡಿದ್ದಾರೆ. ಆದರೆ, ಆಟೋ ಚಾಲಕ ಬೈಕ್ ಅನ್ನು ಬೆನ್ನಟ್ಟಲು ಪ್ರಾರಂಭಿಸಿದ್ದರಿಂದ ಇದು ಅನಿರೀಕ್ಷಿತ ತಿರುವು ಪಡೆದುಕೊಂಡಿತು.
ಬೈಕ್ ಬೆನ್ನಟ್ಟಿದ್ದ ಆಟೋ ಚಾಲಕ ನನ್ನ ಕೈ ಹಿಡಿದು ಚಲಿಸುತ್ತಿದ್ದ ಬೈಕ್‌ನಿಂದ ನನ್ನನ್ನು ಕೆಳಗೆ ಎಳೆಯಲು ಪ್ರಯತ್ನಿಸಿದರು. ಒಂದು ವೇಳೆ ಅವರು ನನ್ನನ್ನು ಕೆಳಗೆ ಎಳೆಯುವಲ್ಲಿ ಯಶಸ್ವಿಯಾಗಿದ್ದರೆ, ನಾನು ಚಲಿಸುತ್ತಿದ್ದ ಬೈಕ್‌ನಿಂದ ಬಿದ್ದು ಗಂಭೀರವಾಗಿ ಗಾಯಗೊಳ್ಳುತ್ತಿದ್ದೆ ಎಂದು ಪೋಸ್ಟ್‌ನಲ್ಲಿ ಅವರು ಬರೆದುಕೊಂಡಿದ್ದಾರೆ.
ದೀರ್ಘಕಾಲದಿಂದ ಬೆಂಗಳೂರಿನಲ್ಲಿ ವಾಸಿಸುತ್ತಿರುವ ಈ ಪ್ರಯಾಣಿಕ, ಇಂತಹ ಘಟನೆ ನಡೆದಿರುವುದಕ್ಕೆ ಆಘಾತ ವ್ಯಕ್ತಪಡಿಸಿದ್ದು, ತಮ್ಮ ಜೀವನದಲ್ಲಿ ಇಂತಹ ಅನುಭವ ಎಂದಿಗೂ ಆಗಿರಲಿಲ್ಲ ಎಂದು ಹೇಳಿಕೊಂಡಿದ್ದಾರೆ. ಬೈಕ್ ಟ್ಯಾಕ್ಸಿಗಳ ಬಗ್ಗೆ ಆಟೋ ಚಾಲಕರಿಗೆ ಆಕ್ಷೇಪಗಳಿರಬಹುದು ಎಂಬುದನ್ನು ಒಪ್ಪಿಕೊಂಡರೂ, ಚಲಿಸುತ್ತಿರುವ ಬೈಕ್ ನಿಂದ ಬಲವಂತವಾಗಿ ಎಳೆಯಲು ಪ್ರಯತ್ನಿಸುವುದು ಸ್ವೀಕಾರಾರ್ಹವಲ್ಲ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಇಂತಹ ಸಂದರ್ಭಗಳಲ್ಲಿ ಹೇಗೆ ಪ್ರತಿಕ್ರಿಯಿಸಬೇಕು, ಅಂದರೆ ತಕ್ಷಣವೇ ಪೊಲೀಸರಿಗೆ ಕರೆ ಮಾಡಬೇಕೇ ಅಥವಾ 'ರಾಪಿಡೋ' ಸಂಸ್ಥೆಗೆ ದೂರು ನೀಡಬೇಕೇ ಎಂಬ ಬಗ್ಗೆಯೂ ಅವರು ಇತರ ಬಳಕೆದಾರರಿಂದ ಸಲಹೆ ಕೋರಿದ್ದಾರೆ.
ಈ ಪೋಸ್ಟ್‌ಗೆ ಹಲವು ಪ್ರತಿಕ್ರಿಯೆಗಳು ಬಂದಿದ್ದು, ಬಳಕೆದಾರರು ಪ್ರಯಾಣಿಕರಿಗೆ ಪೊಲೀಸ್ ದೂರು ದಾಖಲಿಸುವಂತೆ ಹಾಗೂ ಚಾಲಕನನ್ನು ಗುರುತಿಸಲು ಸಹಾಯವಾಗುವಂತೆ ಆಟೋ-ರಿಕ್ಷಾದ ನೋಂದಣಿ ಸಂಖ್ಯೆಯನ್ನು ಹಂಚಿಕೊಳ್ಳುವಂತೆ ಸಲಹೆ ನೀಡಿದ್ದಾರೆ.
ಇದು ಕೊಲೆ ಮಾಡುವ ಪ್ರಯತ್ನದಂತೆಯೇ ಇತ್ತು. ಚಲಿಸುತ್ತಿದ್ದ ಬೈಕ್‌ನಿಂದ ಅವರು ನಿಮ್ಮನ್ನು ಕೆಳಗೆ ಎಳೆದುಹಾಕಿದ್ದರೆ ಮತ್ತು ನೀವು ಬಿದ್ದು ತಲೆಗೆ ಗಂಭೀರವಾದ ಗಾಯವಾಗಿದ್ದರೆ ಏನಾಗುತ್ತಿತ್ತು ಎಂದು ಯೋಚಿಸಿ ನೋಡಿ. ಇಂದು ನೀವು ಈ ಪರಿಸ್ಥಿತಿಯಲ್ಲಿದ್ದೀರಿ, ನಾಳೆ ಬೇರೆ ಯಾರಾದರೂ ಇರಬಹುದು. ಆದ್ದರಿಂದ, ಅವರ ವಿರುದ್ಧ ದೂರು ದಾಖಲಿಸಿ ಮತ್ತು ಸುರಕ್ಷಿತವಾಗಿರಿ ಎಂದು ರೆಡ್ಡಿಟ್ ಬಳಕೆದಾರರೊಬ್ಬರು ಹೇಳಿದ್ದಾರೆ.