ಬೆಂಗಳೂರು: ಬಿಡದಿ ಟೌನ್ಶಿಪ್ ಯೋಜನೆಗಾಗಿ ಕೃಷಿ ಭೂಮಿಯನ್ನು ಸ್ವಾಧೀನಪಡಿಸಿಕೊಳ್ಳುವ ಪ್ರಸ್ತಾವನೆ ವಿರೋಧಿಸಿ ರೈತರು ನಡೆಸುತ್ತಿರುವ ಅನಿರ್ದಿಷ್ಟಾವಧಿ ಉಪವಾಸ ಸತ್ಯಾಗ್ರಹವು 6ನೇ ದಿನಕ್ಕೆ ಕಾಲಿಟ್ಟಿದೆ.
ಬೈರಮಂಗಲ ಗ್ರಾಮದಲ್ಲಿ ಶ್ರುಕವಾರ ನಡೆಯುತ್ತಿದ್ದ ಪ್ರತಿಭಟನೆ ವೇಳೆ ಪೊಲೀಸರು ಪ್ರತಿಭಟನಾಕಾರರನ್ನು ಚದುರಿಸಲು ಮುಂದಾದಾಗ ನೂಕಾಟ, ತಳ್ಳಾಟ ನಡೆದಿದ್ದು, ಮಹಿಳೆಯೊಬ್ಬರು ಪ್ರಜ್ಞೆ ಕಳೆದುಕೊಂಡು ನೆಲಕ್ಕುರುಳಿ ಬಿದಿದ್ದಾರೆ. ಇದರಿಂದ ಸ್ಥಳದಲ್ಲಿ ಕೆಲಕಾಲ ಆತಂಕದ ವಾತಾವರಣ ನಿರ್ಮಾಣವಾಗಿತ್ತು.
ಈ ವಿಡಿಯೋವನ್ನು ಸಾಮಾಜಿಕ ಜಾಲತಾಣ ಎಕ್ಸ್ ನಲ್ಲಿ ಹಂಚಿಕೊಂಡಿರುವ ಜೆಡಿಎಸ್, ಶಾಂತಿಯುತವಾಗಿ ಪ್ರತಿಭಟನೆ ನಡೆಸುತ್ತಿದ್ದ ಅನ್ನದಾತರು ಮತ್ತು ತಾಯಂದಿರ ಧ್ವನಿಯನ್ನು ಪೊಲೀಸರ ಮೂಲಕ ಅಡಗಿಸಲು ಮುಂದಾದದ್ದು ಖಂಡನೀಯ ಎಂದಿದೆ. ಡಿಕೆ ಶಿವಕುಮಾರ್ ಅವರೇ ನಿಮ್ಮ ಹಿಟ್ಲರ್ ಆಡಳಿತಕ್ಕೆ ಧಿಕ್ಕಾರವಿರಲಿ!
ಸಚಿವ ಹೆಚ್.ಸಿ. ಬಾಲಕೃಷ್ಣ ಅವರೇ, ಅಧಿಕಾರದ ಅಹಂನಲ್ಲಿ ಪೊಲೀಸರನ್ನು ಛೂಬಿಟ್ಟು ಪ್ರತಿಭಟನಾಕಾರರನ್ನು ಹಿಂಸಿಸುತ್ತಿರುವುದು ನಿಮ್ಮ ಸಾಧನೆಯೇ? ಪೊಲೀಸರ ದಬ್ಬಾಳಿಕೆಯಿಂದ ಮಹಿಳೆಯರು ನೆಲಕ್ಕುರುಳಿ ಪ್ರಜ್ಞಾಹೀನರಾಗಿದ್ದಾರೆ. ಈ ಅನಾಹುತಕ್ಕೆ ಯಾರು ಹೊಣೆ ? ಎಂದು ಪ್ರಶ್ನಿಸಿದೆ.
ರಿಯಲ್ ಎಸ್ಟೇಟ್ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಅವರೇ, ಅನ್ನದಾತರ ಭೂಮಿ ಕಸಿದುಕೊಳ್ಳುವ ಬಿಡದಿ ಟೌನ್ಶಿಪ್ ಹಠವೇಕೆ? ರೈತರ ನೋವಿಗೆ ಸ್ಪಂದಿಸಬೇಕಾದ ಸರ್ಕಾರ, ಪೊಲೀಸ್ ಬಲಪ್ರಯೋಗ ಮಾಡಿ ರೈತರು, ಮಹಿಳೆಯರನ್ನು ರಸ್ತೆಯಲ್ಲಿ ಎಳೆದಾಡಿ ವಶಕ್ಕೆ ಪಡೆದಿರುವುದು ಹೇಡಿತನದ ಪರಮಾವಧಿ ಎಂದು ಟೀಕಾ ಪ್ರಹಾರ ನಡೆಸಿದೆ.
ಅನ್ನ ನೀಡುವ ಕೈಗಳಿಗೆ ಕೋಳ ತೊಡಿಸುವುದು ಯಾವ ಸೀಮೆಯ ಜನಪರ ಆಡಳಿತ ? ರೈತರ ಕಣ್ಣೀರು, ಆಕ್ರೋಶದ ಬೆಂಕಿಗೆ ರೈತ ವಿರೋಧಿ ಕಾಂಗ್ರೆಸ್ ಸರ್ಕಾರ ಭಸ್ಮವಾಗುವುದು ಖಂಡಿತ. ವಾಮಮಾರ್ಗದಲ್ಲಿ ರೈತರ ಧ್ವನಿ ಅಡಗಿಸಲು ಹೊರಟರೆ ಜೆಡಿಎಸ್ ಸುಮ್ಮನೆ ಕೂರಲ್ಲ. ರೈತರ ಭೂಮಿ ಉಳಿಯುವವರೆಗೂ ನಮ್ಮ ಹೋರಾಟ ನಿಲ್ಲದು ಎಂದು ಎಚ್ಚರಿಕೆ ನೀಡಿದೆ.
ಅನ್ನ ನೀಡುವ ರೈತನ ಕಣ್ಣೀರು ಮತ್ತು ಹೆಣ್ಣುಮಕ್ಕಳ ಶಾಪ ಕಾಂಗ್ರೆಸ್ ಸರ್ಕಾರವನ್ನು ಸರ್ವನಾಶ ಮಾಡದೇ ಬಿಡದು. ರಿಯಲ್ ಎಸ್ಟೇಟ್ ಕಂಸನ ಪಾಪದ ಕೊಡ ತುಂಬುತ್ತಿದೆ. ಬಡ ರೈತರು, ಮಹಿಳೆಯರ ಮೇಲಿನ ದಬ್ಬಾಳಿಕೆ, ದೌರ್ಜನ್ಯವನ್ನು ಎಂದಿಗೂ ಮರೆಯುವುದಿಲ್ಲ! ಈ ದುಷ್ಟ ಕಾಂಗ್ರೆಸ್ ಸರ್ಕಾರದ ಅಂತ್ಯವನ್ನು ನಾಡಿನ ಜನತೆ 2028ಕ್ಕೆ ಮಾಡುವುದು ಸತ್ಯ ಎಂದು ಎಚ್ಚರಿಕೆ ನೀಡಲಾಗಿದೆ.