ಮಾಂಸಾಹಾರಿಗಳ ಆಹಾರದ ತಟ್ಟೆಯಲ್ಲಿ ಚಿಕನ್ ಪ್ರಮುಖ ಸ್ಥಾನ ಪಡೆದಿರುತ್ತದೆ. ಫ್ರೈ, ಕಬಾಬ್, ಬಿರಿಯಾನಿ ಹೀಗೆ ಬಗೆಬಗೆಯ ಖಾದ್ಯಗಳನ್ನು ಸವಿಯಲು ಕೋಳಿ ಪ್ರಿಯರು ಸದಾ ಸಿದ್ಧರಾಗಿರುತ್ತಾರೆ. ಆದರೆ ಚಿಕನ್ ತಿನ್ನುವ ಆತುರದಲ್ಲಿ ನೀವು ಕೋಳಿಯ ಯಾವ ಭಾಗವನ್ನು ತಿನ್ನುತ್ತಿದ್ದೀರಿ ಎಂಬ ಕಲ್ಪನೆ ನಿಮಗಿದೆಯೇ? ಸಾಮಾನ್ಯವಾಗಿ ನಾವು ಕೋಳಿಯ ಮಾಂಸದ ಎಲ್ಲಾ ಭಾಗಗಳೂ ಆರೋಗ್ಯಕ್ಕೆ ಒಳ್ಳೆಯದು ಎಂದು ಭಾವಿಸುತ್ತೇವೆ. ಆದರೆ ವೈದ್ಯಕೀಯ ಸಂಶೋಧನೆಗಳ ಪ್ರಕಾರ ಕೋಳಿಯ ಕೆಲವು ನಿರ್ದಿಷ್ಟ ಭಾಗಗಳನ್ನು ತಿನ್ನುವುದು ಆರೋಗ್ಯಕ್ಕೆ ಅತ್ಯಂತ ಅಪಾಯಕಾರಿ ಎಂದು ಸಾಬೀತಾಗಿದೆ. ಆ ಕುರಿತ ವರದಿ ಇಲ್ಲಿದೆ:

ಅತ್ಯಂತ ಡೇಂಜರ್ ಭಾಗ ಯಾವುದು?

ಕೋಳಿಯ ಚರ್ಮ, ಕುತ್ತಿಗೆ ಮತ್ತು ಶ್ವಾಸಕೋಶದ ಭಾಗವನ್ನು ತಿನ್ನುವುದು ಅತ್ಯಂತ ಅಪಾಯಕಾರಿ ಎಂದು ಹೇಳಲಾಗುತ್ತದೆ. ಕೋಳಿಯ ಚರ್ಮದಲ್ಲಿ ಅತಿಯಾದ ಕೊಬ್ಬು ಮತ್ತು ಕೊಲೆಸ್ಟ್ರಾಲ್ ಇರುತ್ತದೆ. ಜೊತೆಗೆ ಕೋಳಿಗೆ ನೀಡುವ ಹಾರ್ಮೋನ್ ಮತ್ತು ಔಷಧಿಗಳ ಅಂಶವು ಚರ್ಮದಲ್ಲಿಯೇ ಹೆಚ್ಚಾಗಿ ಸಂಗ್ರಹವಾಗಿರುತ್ತದೆ. ಕುತ್ತಿಗೆಯ ಭಾಗದಲ್ಲಿ ದುಗ್ಧರಸ ಗ್ರಂಥಿಗಳು ಇರುವುದರಿಂದ ಅಲ್ಲಿ ಹೆಚ್ಚು ಬ್ಯಾಕ್ಟೀರಿಯಾ ಮತ್ತು ವೈರಸ್ ಇರುವ ಸಾಧ್ಯತೆ ಇದೆ.

ಏನೆಲ್ಲಾ ಆರೋಗ್ಯ ಸಮಸ್ಯೆ ಬರಬಹುದು?

ಈ ಭಾಗಗಳನ್ನು ನಿಯಮಿತವಾಗಿ ತಿನ್ನುವುದರಿಂದ ಹೃದಯದ ಕಾಯಿಲೆ, ಅಧಿಕ ರಕ್ತದೊತ್ತಡ ಮತ್ತು ಬೊಜ್ಜು ಹೆಚ್ಚಾಗುವ ಅಪಾಯವಿದೆ. ಕೋಳಿಯ ಕುತ್ತಿಗೆ ಮತ್ತು ಚರ್ಮದಲ್ಲಿರುವ ಹಾರ್ಮೋನ್ ಅಂಶಗಳು ದೇಹದ ಹಾರ್ಮೋನ್ ಸಮತೋಲನವನ್ನು ಹಾಳು ಮಾಡಬಹುದು. ಕೆಲವೊಮ್ಮೆ ಕ್ಯಾನ್ಸರ್ ಕಾರಕ ಅಂಶಗಳು ಕೂಡ ಇದರಲ್ಲಿ ಇರುತ್ತವೆ ಎಂದು ಅಧ್ಯಯನಗಳು ಹೇಳಿವೆ. ಜೊತೆಗೆ, ಜೀರ್ಣಕ್ರಿಯೆ ಸಮಸ್ಯೆ ಮತ್ತು ಫುಡ್ ಪಾಯ್ಸನ್ ಕೂಡ ಉಂಟಾಗಬಹುದು.

ವೈದ್ಯರು ಹೇಳುವುದೇನು?

ಫಾರ್ಮ್ ನಲ್ಲಿ ಬೆಳೆದ ಕೋಳಿಗಳಿಗೆ ಬೇಗ ಬೆಳವಣಿಗೆ ಆಗಲು ಅನೇಕ ರೀತಿಯ ಆ್ಯಂಟಿಬಯಾಟಿಕ್ ಮತ್ತು ಸ್ಟೀರಾಯ್ಡ್ ನೀಡಲಾಗುತ್ತದೆ. ಇವುಗಳು ಕೋಳಿಯ ಕೊಬ್ಬಿನ ಭಾಗ ಮತ್ತು ಚರ್ಮದಲ್ಲಿ ಶೇಖರಣೆಯಾಗುತ್ತವೆ. ಈ ಭಾಗವನ್ನು ತಿಂದರೆ ಆ ಔಷಧಿಗಳ ಅಡ್ಡಪರಿಣಾಮ ನೇರವಾಗಿ ಮನುಷ್ಯನ ದೇಹಕ್ಕೆ ಬರುತ್ತದೆ. ಆದ್ದರಿಂದ ಆದಷ್ಟು ಚರ್ಮರಹಿತ ಚಿಕನ್ ತಿನ್ನುವುದು ಒಳ್ಳೆಯದು ಎಂದು ವೈದ್ಯರು ಸಲಹೆ ನೀಡುತ್ತಾರೆ.

ಹಾಗಾದರೆ, ಸೇಫ್ ಆಗಿ ಚಿಕನ್ ತಿನ್ನುವುದು ಹೇಗೆ?

ಚಿಕನ್ ತಿನ್ನುವಾಗ ಯಾವಾಗಲೂ ಚರ್ಮವನ್ನು ಸಂಪೂರ್ಣವಾಗಿ ತೆಗೆದು ಹಾಕಿ. ಕುತ್ತಿಗೆ, ತಲೆಯಂತಹ ಕೆಲ ಭಾಗಗಳನ್ನು ತಿನ್ನುವುದನ್ನು ತಪ್ಪಿಸಿ. ಚಿಕನ್ ಅನ್ನು ಚೆನ್ನಾಗಿ ಬೇಯಿಸಿ ಅಥವಾ ಫ್ರೈ ಮಾಡಿ ತಿನ್ನಿ. ಹಸಿ ಅಥವಾ ಅರ್ಧಂಬರ್ಧ ಬೇಯಿಸಿದ ಚಿಕನ್ ತಿನ್ನಬೇಡಿ. ವಾರಕ್ಕೆ ಒಂದು ಬಾರಿಗಿಂತ ಹೆಚ್ಚು ಚಿಕನ್ ತಿನ್ನುವುದನ್ನು ಮಿತಿಗೊಳಿಸಿ ಮತ್ತು ಬ್ರಾಯ್ಲರ್ ಬದಲು ನಾಟಿ ಕೋಳಿಗೆ ಆದ್ಯತೆ ನೀಡಿ.