Hair Tips: ಮಗು ರಾತ್ರಿ ಎಣ್ಣೆ ಹಚ್ಚಿ ಮಲಗು - ಇದು ನಮ್ಮ ಅಜ್ಜಿಯರ ಡೈಲಾಗ್. ಆದರೆ ಆಫೀಸ್, ಮಕ್ಕಳು, ವೇಗದ ಜೀವನದಲ್ಲಿ ರಾತ್ರಿ ತಲೆ ಅಂಟು ಅಂಟು ಆಗೋಕೆ ಯಾರಿಗೆ ಟೈಮ್ ಇದೆ? ಹಾಗಾಗಿ ಬಹಳಷ್ಟು ಜನ ಬೆಳಿಗ್ಗೆ ಹಚ್ಚಿ 1-2 ಗಂಟೆಯಲ್ಲಿ ತೊಳೆದುಬಿಡುತ್ತಾರೆ. ಹಾಗಾದರೆ ನಿಜವಾಗ್ಲೂ ಎಣ್ಣೆ ಹಚ್ಚೋಕೆ ಬೆಸ್ಟ್ ಟೈಮ್ ಯಾವುದು? ಬೆಳಿಗ್ಗೆನಾ ರಾತ್ರಿನಾ? ನಿಮ್ಮ ಕೂದಲಿನ ಸಮಸ್ಯೆಗೆ ತಕ್ಕಂತೆ ಎಣ್ಣೆ ಹಚ್ಚುವ ಸರಿಯಾದ ಸಮಯo ಬಗ್ಗೆ ಇಲ್ಲಿದೆ ಮಾಹಿತಿ...

ಇದಕ್ಕೆ ಸರಿಯಾದ ಉತ್ತರವೆಂದರೆ: ಅದು ನಿಮ್ಮ ಕೂದಲಿನ ಸಮಸ್ಯೆ ಮತ್ತು ನೀವು ಎಣ್ಣೆಯನ್ನು ಎಷ್ಟು ಹೊತ್ತು ಇಡಲು ಬಯಸುತ್ತೀರಿ ಎಂಬುದರ ಮೇಲೆಯೇ ಅವಲಂಬಿತವಾಗಿದೆ.

1. ರಾತ್ರಿ ಎಣ್ಣೆ ಹಚ್ಚುವುದರಿಂದ ಆಗುವ ಲಾಭವೇನು?

ರಾತ್ರಿ ಮಲಗುವ ಮುನ್ನ ಎಣ್ಣೆ ಹಚ್ಚಿ ಮಲಗುವುದು ಡೀಪ್ ಕಂಡಿಷನಿಂಗ್ಗೆ ಬೆಸ್ಟ್.

• ಕಾರಣವೇನು? ನಾವು ಮಲಗಿರುವಾಗ 7-8 ಗಂಟೆಗಳ ಕಾಲ ಎಣ್ಣೆ ಕೂದಲು ಮತ್ತು ನೆತ್ತಿಗೆ ಹೀರಿಕೊಳ್ಳಲು ಸಮಯ ಸಿಗುತ್ತದೆ. ಇದರಿಂದ ಕೂದಲು ಆಳದಿಂದ ಪೋಷಣೆ ಪಡೆಯುತ್ತದೆ.

• ಯಾರಿಗೆ ಒಳ್ಳೆಯದು? ಒಣ ಕೂದಲು, ತಲೆಹೊಟ್ಟು, ಕೂದಲು ಉದುರುವಿಕೆ ಮತ್ತು ಬೆಳವಣಿಗೆ ನಿಧಾನವಾಗಿರುವವರಿಗೆ. ತೆಂಗಿನ ಎಣ್ಣೆ, ಬಾದಾಮಿ ಎಣ್ಣೆ, ಕ್ಯಾಸ್ಟರ್ ಎಣ್ಣೆಯನ್ನು ರಾತ್ರಿ ಹಚ್ಚಿ ಮರುದಿನ ತೊಳೆಯಿರಿ.

• ಜೊತೆಗೆ ಹಳೆಯ ದಿಂಬು ಕವರ್ ಬಳಸಿ ಅಥವಾ ಟವೆಲ್ ಸುತ್ತಿಕೊಳ್ಳಿ.

2. ಬೆಳಿಗ್ಗೆ ಎಣ್ಣೆ ಹಚ್ಚುವುದರಿಂದ ಆಗುವ ಲಾಭವೇನು?

ಬೆಳಿಗ್ಗೆ ಸ್ನಾನಕ್ಕೂ ಮುನ್ನ ಬೆಳಿಗ್ಗೆ 1 ರಿಂದ 2 ಗಂಟೆ ಮುಂಚೆ ಎಣ್ಣೆ ಹಚ್ಚುವುದು.

• ಕಾರಣವೇನು? ಕೂದಲಿಗೆ ಅಗತ್ಯವಾದ ಪೋಷಣೆ ಸಿಗುತ್ತದೆ ಮತ್ತು ಹೆಚ್ಚು ಹೊತ್ತು ಕೊಳೆ ಅಂಟಿಕೊಳ್ಳುವುದಿಲ್ಲ. ನೀವು ಹೊರಗೆ ಹೋಗುವವರಾದರೆ ಇದು ಬೆಸ್ಟ್.

• ಯಾರಿಗೆ ಇದು ಒಳ್ಳೆಯದು? ಎಣ್ಣೆ ಕೂದಲು ಇರುವವರು, ತಲೆ ತುಂಬಾ ಬೆವರು ವವರು ಮತ್ತು ಪ್ರತಿದಿನ ಎಣ್ಣೆ ಹಚ್ಚಲು ಇಷ್ಟಪಡುವವರು. ಹಗುರವಾದ ಆರ್ಗನ್ ಎಣ್ಣೆ ಅಥವಾ ಜೋಜೋಬಾ ಎಣ್ಣೆಯನ್ನು ಸ್ವಲ್ಪ ಪ್ರಮಾಣದಲ್ಲಿ ಹಚ್ಚಿ.

• ಜೊತೆಗೆ ಬಿಸಿಲಿಗೆ ಹೋಗುವ ಮುನ್ನ ಎಣ್ಣೆ ಹಚ್ಚಿ ಹೋಗಬೇಡಿ. ಯಾಕಂದ್ರೆ, ಬಿಸಿಲು ಪ್ಲಸ್ ಎಣ್ಣೆ ಅಂದ್ರೆ ಕೂದಲು ಡ್ಯಾಮೇಜ್.

ಹಾಗಾದರೆ ಸರಿಯಾದ ವಿಧಾನ ಯಾವುದು?

• ವಾರಕ್ಕೆ 2 ಬಾರಿ ರಾತ್ರಿ: ಕೂದಲು ಬೆಳವಣಿಗೆ ಮತ್ತು ಆಳವಾದ ಪೋಷಣೆಗಾಗಿ

• ವಾರಕ್ಕೆ 1 ಬಾರಿ ಬೆಳಿಗ್ಗೆ: ಕೂದಲಿಗೆ ಹೊಳಪು ಮತ್ತು ಫ್ರಿಜ್ ಕಂಟ್ರೋಲ್‌ಗಾಗಿ

ಏತನ್ಮಧ್ಯೆ, ಎರಡೂ ಟೈಂನಲ್ಲೂ ಎಣ್ಣೆಯನ್ನು ಬಿಸಿ ಮಾಡಿ, ನೆತ್ತಿಗೆ ಚೆನ್ನಾಗಿ ಮಸಾಜ್ ಮಾಡಿ. ಕನಿಷ್ಠ 45 ನಿಮಿಷದಿಂದ 8 ಗಂಟೆಗಳವರೆಗೆ ಬಿಡುವುದು ಮುಖ್ಯ. ಆದರೆ, ಪ್ರತಿದಿನ ಎಣ್ಣೆ ಹಚ್ಚುವುದರಿಂದ ನೆತ್ತಿಯ ರಂಧ್ರಗಳು ಮುಚ್ಚಿ ಕೂದಲು ಉದುರಬಹುದು. ಹಾಗಾಗಿ, ವಾರಕ್ಕೆ 2 ರಿಂದ 3 ಬಾರಿ ಮಾತ್ರವೇ ಸಾಕು.