ಅಹಮದಾಬಾದ್: ಪ್ರಧಾನಿ ಪತ್ನಿ ಅನ್ನುವ ಕಾರಣಕ್ಕೆ ನೀಡಲಾಗಿರುವ ಭದ್ರತಾ ಸೌಲಭ್ಯದಿಂದ ಜಶೋದಾ ಬೆನ್ ಗೊಂದಲ ಹಾಗೂ ಆತಂಕಕ್ಕೆ ಗುರಿಯಾಗಿದ್ದಾರೆ.
ಇದೇ ಕಾರಣಕ್ಕೆ ತಮಗೆ ನೀಡಲಾಗಿರುವ ಭದ್ರತೆಗೆ ಸಂಬಂಧಿಸಿದ ವಿವರ ನೀಡುವಂತೆ ಅವರು ಆರ್‌ಟಿಐ ಮೊರೆ ಹೋಗಿದ್ದಾರೆ!
ನರೇಂದ್ರ ಮೋದಿ ಪ್ರಧಾನಿಯಾಗಿ ಆಯ್ಕೆಯಾದ ಬಳಿಕ ಪ್ರಧಾನಿ ಪತ್ನಿ ಎನ್ನುವ ಕಾರಣಕ್ಕೆ ಜಶೋದಾಗೆ ಕೇಂದ್ರ ಸರ್ಕಾರ 24 ಗಂಟೆ ಬಿಗಿ ಭದ್ರತೆ ಒದಗಿಸುತ್ತಿದೆ. ಆದರೆ, ಅನೇಕ ಬಾರಿ ಈ ಭದ್ರತೆ ಜಶೋದಾ ಅವರಲ್ಲಿ ಆತಂಕ ಸೃಷ್ಟಿಸಿದೆ.
ಈ ಹಿನ್ನೆಲೆಯಲ್ಲಿ ಸರ್ಕಾರಕ್ಕೆ ಮಾಹಿತಿ ಕೋರಿ ಅರ್ಜಿ ಸಲ್ಲಿಸಿರುವ ಅವರು, ಪ್ರಧಾನಿ ಪತ್ನಿ ಅನ್ನುವ ಕಾರಣಕ್ಕೆ ಶಿಷ್ಟಾಚಾರದಂತೆ ಒದಗಿಸಲಾಗಿರುವ ಭದ್ರ ಸೇರಿದಂತೆ ಇನ್ನಿತರ ಸೌಲಭ್ಯಗಳ ಮಾಹಿತಿ ನೀಡುವಂತೆ ಮನವಿ ಮಾಡಿದ್ದಾರೆ.
ಇದೇ ವೇಳೆ, ನಾನು ಸಾರ್ವಜನಿಕ ಸಾರಿಗೆಯಲ್ಲಿ ಪ್ರಯಾಣಿಸುತ್ತೇನೆ. ನನ್ನ ಭದ್ರತಾ ಸಿಬ್ಬಂದಿ ಸರ್ಕಾರಿ ವಾಹನದಲ್ಲಿ ಸಂಚರಿಸುತ್ತಾರೆ ಎಂದೂ ದೂರಿದ್ದಾರೆ. ಜತೆಗೆ, ಹಿಂದಿನ ಪ್ರಧಾನಿ ಇಂದಿರಾ ಗಾಂಧಿ ಅವರನ್ನು ಅವರ ಭದ್ರತಾ ಸಿಬ್ಬಂದಿಯೇ ಹತ್ಯೆ ಮಾಡಿದ್ದಾರೆ. ಇಂಥ ಪರಿಸ್ಥಿತಿಯಲ್ಲಿ ನನಗೆ ಒದಗಿಸಲಾಗಿರುವ ಭದ್ರತೆಯಿಂದ ಆತಂಕಗೊಂಡಿದ್ದೇನೆ ಎಂದು ಮನವಿ ಮಾಡಿದ್ದಾರೆ.