ನವದೆಹಲಿ: ಕೇಂದ್ರದ ಮಾಜಿ ಸಚಿವ ಹಾಗೂ ಕಾಂಗ್ರೆಸ್ ಸಂಸದ ಶಶಿ ತರೂರ್ ಪತ್ನಿ ಸುನಂದಾ ಪುಷ್ಕರ್ ನಿಗೂಢ ಸಾವು ಹೊಸ ತಿರುವುಗಳನ್ನು ಪಡೆದುಕೊಳ್ಳುತ್ತಲೇ ಇದೆ. ಸುನಂದಾ ಸ್ವಾಭಾವಿಕವಾಗಿ ಸಾವನ್ನಪ್ಪಿದ್ದರು ಎಂದು ಮರಣೋತ್ತರ ಪರೀಕ್ಷೆ ವರದಿ ನೀಡುವಂತೆ ತಮ್ಮ ಮೇಲೆ ಒತ್ತಡ ಹೇರಲಾಗಿತ್ತು ಎಂದು ಸುನಂದಾ ದೇಹದ ಮರಣೋತ್ತರ ಪರೀಕ್ಷೆ ನಡೆಸಿದ ವೈದ್ಯರು ಆರೋಪಿಸಿದ್ದಾರೆ,

ಈ ಸಂಬಂಧ ಕೇಂದ್ರ ಆರೋಗ್ಯ ಸಚಿವ ಜೆ.ಪಿ ನಡ್ಡಾ ಅವರಿಗೆ ಪತ್ರ ಬರೆದಿದ್ದಾರೆ. ಏಮ್ಸ್ ಆಸ್ಪತ್ರೆ ವೈದ್ಯ ಡಾ. ಆದರ್ಶ್ ಕುಮಾರ್, ಡಾ. ಶಶಾಂಕ್ ಪುನಿಯಾ,  ಹಾಗೂ ವಿಧಿ ವಿಜ್ಞಾನ ಪ್ರಯೋಗಾಲಯದ ಮುಖ್ಯಸ್ಥ ಡಾ. ಸುದೀಂದ್ರ ಗುಪ್ತಾ ತಂಡ 52 ವರ್ಷ ವಯಸ್ಸಿನ ಸುನಂದಾ ಅವರ ಮರಣೋತ್ತರ ಪರೀಕ್ಷೆ ನಡೆಸಿತ್ತು. ಸುನಂದ ಅವರದ್ದು ಸ್ವಾಭಾವಿಕ ಸಾವು ಎಂದು ವರದಿ ನೀಡುವಂತೆ ತಂಡಕ್ಕೆ ಒತ್ತಡ ಹೇರಲಾಗಿತ್ತು,

ಆದರೆ ಯಾವುದೇ ಒತ್ತಡಕ್ಕೂ ಮಣಿಯದೇ ವೃತ್ತಿ ಧರ್ಮ, ತತ್ವಗಳ ಆಧಾರದ ಮೇಲೆ, ಸುನಂದಾ ಪುಷ್ಕರ್ ವಿಷಪ್ರಾಷನದಿಂದ ಸಾವಪ್ಪಿರುವುದಾಗಿ ಕಳೆದ ಸೆಪ್ಟಂಬರ್ ನಲ್ಲಿ ವರದಿ ನೀಡಿದ್ದಾಗಿ ಡಾ.ಕುಮಾರ್ ತಿಳಿಸಿದ್ದಾರೆ.

ಕಳೆದ ಒಂದು ವರ್ಷದಿಂದ ಅಂದರೆ ಸುನಂದಾ ಪುಷ್ಕರ್ ಮರಣೋತ್ತರ ವರದಿ ನೀಡಿದಾಗಿನಿಂದ ಏಮ್ಸ್ ನಿರ್ದೇಶಕ ಡಾ. ಎಂಸಿ ಮಿಶ್ರಾ ತಮ್ಮೊಂದಿಗೆ ಅಸಹಕಾರ ಚಳುವಳಿ  ಮುಂದುವರಿಸಿದ್ದಾರೆ ಎಂದು ಸಹ ಅವರು ಆರೋಪಿಸಿದ್ದಾರೆ. ಸುನಂದಾ ಸಾವನ್ನು ಸ್ವಾಭಾವಿಕವಾದದ್ದು ಎಂದು ಬಿಂಬಿಸುವಂತೆ  ಏಮ್ಸ್ ನಿರ್ದೇಶಕ ಡಾ. ಎಂಸಿ ಮಿಶ್ರಾ ಕೂಡ ಒತ್ತಡ ಹೇರಿದ್ದರು ಎಂದು ಡಾ. ಕುಮಾರ್ ದೂರಿದ್ದಾರೆ.