ಹಸಿಮಾರಾ: ಭಾರತ ದೇಶ ಶಾಂತಿಪ್ರಿಯ ದೇಶವಾಗಿದ್ದು, ಅದಕ್ಕೆ ಬದ್ಧವಾಗಿರುತ್ತದೆ. ಆದರೆ ತನ್ನ ಸಾರ್ವಬೌಮತ್ವ ವಿಚಾರಕ್ಕೆ ಬಂದರೆ ರಕ್ಷಣೆಗೆ ನಮ್ಮ ಸಶಸ್ತ್ರ ಪಡೆಗಳನ್ನು ಬಳಕೆ  ಮಾಡಬೇಕಾಗುತ್ತದೆ ಎಂದು ರಾಷ್ಟ್ರಪತಿ ಪ್ರಣಬ್ ಮುಖರ್ಜಿ ಹೇಳಿದ್ದಾರೆ.

ಪಶ್ಚಿಮ ಬಂಗಾಳದ ಹಸಿಮಾರಾ ವಾಯುನೆಲೆಯಲ್ಲಿ ಭಾರತೀಯ ವಾಯುಪಡೆಯ ಎರಡು ಯುದ್ಧ ವಿಮಾನ ಘಟಕಗಳನ್ನು ಅನಾವರಣಗೊಳಿಸಿದ ಪ್ರಣಬ್ ಮುಖರ್ಜಿ ಅವರು, "ಭಾರತ ದೇಶ  ಸದಾ ಶಾಂತಿ ಬಯಸುತ್ತಿದ್ದು, ಅದಕ್ಕೆ ಬದ್ಧವಾಗಿದೆ. ಆದರೆ ಅನ್ಯ ದೇಶಗಳು ಅಥವಾ ಸಂಘಟನೆಗಳು ದೇಶದ ಸಾರ್ವಭೌಮತ್ವ ವಿಚಾರಕ್ಕೆ ಬಂದರೆ ಅದರ ರಕ್ಷಣೆಗೆ ನಮ್ಮ ಸಶಸ್ತ್ರ ಪಡೆಗಳು  ಸದಾ ಸನ್ನದ್ಧಗೊಂಡಿರುತ್ತವೆ ಎಂದು ಹೇಳಿದರು.

ಭಾರತ ದೇಶ ತನ್ನ ಸಶಸ್ತ್ರ ಪಡೆಯ ಸಾಮರ್ಥ್ಯವನ್ನು ಹೆಚ್ಚಿಸಿಕೊಂಡಿದ್ದರೂ, ಶಾಂತಿ ಪಾಲನೆ ಮೂಲಕ ವಿಶ್ವದ ಗಮನ ಸೆಳೆಯುತ್ತಿದೆ. ನಾವು ನಮ್ಮ ಬಲವನ್ನು ಕೇವಲ ನಮ್ಮ  ಸೌರ್ವಭೌಮತ್ವವನ್ನು ರಕ್ಷಿಸಲು ಮಾತ್ರ ಬಳಕೆ ಮಾಡುತ್ತೇವೆ. ಗಡಿಯಲ್ಲಿ ನಿಂತು ದೇಶದ ಹಿತರಕ್ಷಣೆಗಾಗಿ ತಾವು ಎದೆಕೊಟ್ಟು ಯೋಧರು ಹೋರಾಡುತ್ತಾರೆ. ಹೀಗಾಗಿ ದೇಶದ ಗಡಿಯಲ್ಲಿ ನಿಂತು  ಕರ್ತವ್ಯ ನಿರ್ವಹಿಸುತ್ತಿರುವ ಮಹಿಳಾ ಮತ್ತು ಪುರುಷ ಸಮವಸ್ತ್ರಧಾರಿಗಳಿಗೆ ನಾನು ಧನ್ಯವಾದ ಹೇಳುತ್ತೇನೆ ಎಂದು ಪ್ರಣಬ್ ಮುಖರ್ಜಿ ಹೇಳಿದರು.

ಇದೇ ವೇಳೆ ಭಾರತೀಯ ವಾಯುಸೇನೆಯನ್ನು ಕೊಂಡಾಡಿದ ಅವರು, ಭಾರತದ ತುದ್ದತುದಿಯವರೆಗೂ ಸೇನೆಯನ್ನು ರವಾನಿಸುವಲ್ಲಿ ವಾಯುಸೇನೆ ಪಾತ್ರ ಮಹತ್ವದ್ದಾಗಿದೆ ಎಂದು ಪ್ರಣಬ್ ಅಭಿಪ್ರಾಯಪಟ್ಟರು. ಯುದ್ಧ ಮತ್ತು ಶಾಂತಿ ಕಾಲದ ಎರಡೂ ಸಂದರ್ಭಗಳಲ್ಲಿ ದೇಶದ ಪೂರ್ವ ವಾಯುವಲಯದ ರಕ್ಷಣೆಯಲ್ಲಿ ಮಿಗ್- 27 ಯುದ್ಧ ವಿಮಾನಗಳು ತೊಡಗಿವೆ. ದೇಶ ಶಾಂತಿ  ಪ್ರಕ್ರಿಯೆಯಲ್ಲಿ ಸದಾ ನಂಬಿಕೆ ಇಟ್ಟಿದ್ದರೂ ಸಮವಸ್ತ್ರದಲ್ಲಿರುವ ನಮ್ಮ ಪಡೆಗಳು ಅಗತ್ಯ ಬಿದ್ದಾಗ ದೇಶದ ಗಡಿಗಳ ರಕ್ಷಣೆಯಲ್ಲಿ ತನ್ನ ಸನ್ನದ್ಧತೆಯನ್ನು ಮೆರೆದಿದೆ ಎಂದು ಪ್ರಣಬ್ ಮುಖರ್ಜಿ  ಹೇಳಿದರು.