ಫರೀಬಾದಬಾದ್: ಹರಿಯಾಣದಲ್ಲಿ ದಲಿತ ಕುಟುಂಬವೊಂದರ ಅಮಾಯಕ ಮಕ್ಕಳಿಬ್ಬರನ್ನು ಜೀವಂತ ಸುಟ್ಟು ಹಾಕಿದ ಘಟನೆಯನ್ನು ಖಂಡಿಸಿ ಗ್ರಾಮಸ್ಥರು ಬುಧವಾರ ರಸ್ತೆಯಲ್ಲಿ ಮಕ್ಕಳ ಶವವಿಟ್ಟು ಪ್ರತಿಭಟನೆ ನಡೆಸುತ್ತಿದ್ದಾರೆ.
ಮಕ್ಕಳ ಶವಸಂಸ್ಕಾರ ಮಾಡಲು ನಿರಾಕರಿಸಿರುವ ಸುನ್‌ಪದ್ ಗ್ರಾಮಸ್ಥರು ಆರೋಪಿಗಳ ಬಂಧನಕ್ಕೆ ಆಗ್ರಹಿಸಿ ಬಲ್ಲಾಭ್ ಗರ್- ಫರೀದಾಬಾದ್ ಹೆದ್ದಾರಿಯಲ್ಲಿ ಶವವಿಟ್ಟು ಪ್ರತಿಭಟನೆ ನಡೆಸುತ್ತಿದ್ದಾರೆ.
ಸೋಮವಾರ ತಡರಾತ್ರಿ ದೆಹಲಿಯ ಹೊರವಲಯದ ಸುನ್‌ಪದ್ ಗ್ರಾಮದಲ್ಲಿ ನೆಲೆಸಿರುವ ಜಿತೇಂದ್ರ-ರೇಖಾ ದಂಪತಿ ಮನೆಗೆ ಹೊರಗಿನಿಂದ ಚಿಲಕ ಹಾಕಿದ ದುಷ್ಕರ್ಮಿಗಳು ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಿದ್ದರು. ಘಟನೆಯಲ್ಲಿ ಮಕ್ಕಳು ಸಜೀವ ದಹನವಾಗಿದ್ದು, ಪೋಷಕರು ಸಣ್ಣಪುಟ್ಟ ಗಾಯಗಳೊಂದಿಗೆ ಪಾರಾಗಿದ್ದರು.
ಮೇಲ್ವರ್ಗದವರೊಂದಿಗೆ ವಾಗ್ವಾದ ನಡೆಸಿದ ಹಿನ್ನೆಲೆಯಲ್ಲಿ ಈ ಕೃತ್ಯ ಎಸಗಲಾಗಿದೆ.